Beyləqan, 8 fevral, Tahir Ağaməmmədov, AZƏRTAC 

Xocavəndli məcburi köçkünlərin sosial vəziyyətinin yaxşılaşdırılması, problemlərinin öyrənilməsi və vaxtında həll olunması daim diqqət mərkəzində saxlanılır. 2017-ci ildə xocavəndli məcburi köçkünlərin məskunlaşdıqları 10 rayonda 46 səyyar qəbul keçirilib. 1019 nəfər sakinin iştirak etdiyi görüşlərdə müxtəlif problemlərlə bağlı 77 məsələ barədə müraciətlər olunub. Qaldırılmış məsələlər müsbət həllini tapıb.

AZƏRTAC-ın bölgə müxbiri xəbər verir ki, bu barədə Beyləqan rayonu ərazisindəki Xocavənd qəsəbəsində 2017-ci ilin yekunlarına həsr olunan yığıncaqda məlumat verilib.

Yığıncaq iştirakçıları əvvəlcə ümummilli lider Heydər Əliyevin Xocavənd qəsəbəsindəki abidəsi önünə gül dəstələri qoyub, mədəniyyət evinin qarşısında ötən ilin sosial-iqtisadi göstəricilərini əks etdirən stendlərə baxıblar.

Rayon icra hakimiyyətinin başçısı Eyvaz Hüseynovun məruzəsində bildirilib ki, ərazisi işğal altında olan Xocavəndin azərbaycanlı əhalisi respublikanın 36 şəhər və rayonunda məskunlaşıb. Xocavəndli məcburi köçkünlər əsasən Beyləqan rayonu ərazisində yerləşən Xocavənd, Yeni Xocavənd, Yeni Tuğ, Qaradağlı, 320 ailəlik qəsəbələrdə, Ağcabədi rayonu ərazisində salınmış yaşayış massivində kompakt şəkildə yaşayırlar. 2017-ci ildə 320 ailəlik qəsəbədə məskunlaşmış sakinlərin məşğulluğunun təmin edilməsi məqsədilə hər bir ailəyə 0,60 hektar torpaq sahəsi verilib. Xocavənd qəsəbəsi ilə Füzuli rayonunun “Qayıdış” qəsəbələrini birləşdirən 2 kilometr yola asfalt örtük salınıb, Xocavənd qəsəbəsi ilə “Yeni Qaradağlı” qəsəbələrini birləşdirən avtomobil yolu qum-çınqıl örtüyü ilə təmir edilib. 4 nömrəli Xocavənd tam orta məktəb binasının tavan hissəsi əsaslı təmir olunub. Xocavənd qəsəbəsində elektrik naqillərinin kabelləşdirilməsinə başlanılıb, məcburi köçkünlərin məskunlaşdıqları ərazilərdə abadlıq və yaşıllaşdırma işləri davam etdirilib, 950 ədəd küknar ağacı əkilib.

Diqqətə çatdırılıb ki, hesabat dövründə rayonun təsərrüfatlarında 2363 baş iribuynuzlu mal-qara, 21 min 396 baş qoyun və keçi olub. Bu dövrdə 5504 sentner ət, 22 min 978 sentner süd, 310 sentner yun istehsal edilib. Rayon üzrə 5500 hektar buğda sahəsindən 10 min 812,6 ton, 127 hektar arpa sahəsindən 228 ton məhsul götürülüb. Bundan başqa, fermerlər tərəfindən 299 ton kartof, 1056 ton tərəvəz, 336 ton bostan məhsulları, 180 ton pambıq istehsal edilib. Baramaçılığın inkişaf etdirilməsi, ipəkqurdu üçün yem bazasının yaradılması məqsədilə 5500 tut tingi əkilib.

Məruzə və çıxışlarda görülmüş işlərlə yanaşı, mövcud problem və çatışmazlıqlar da qeyd olunub, qarşıda duran vəzifələrdən danışılıb.

Hesabat yığıncağında Prezident Administrasiyasının məsul əməkdaşı Ağaəli Əhmədov və Milli Məclisin deputatı Elman Məmmədov çıxış edərək, ölkəmizdə həyata keçirilən uğurlu islahatlardan, qaçqın və məcburi köçkünlərə göstərilən diqqət və qayğıdan danışıblar.