REGİONLAR
Xocavənd rayonu üzrə sosial-iqtisadi göstəricilər müzakirə edilib
Beyləqan, 26 iyul, Tahir Ağaməmmədov, AZƏRTAC
Xocavəndli məcburi köçkünlərin sosial vəziyyətinin yaxşılaşdırılması, problemlərinin öyrənilməsi və vaxtında həll olunması daim diqqət mərkəzində saxlanılır. 2018-ci ilin birinci yarısında xocavəndli məcburi köçkünlərin məskunlaşdıqları 10 rayonda 22 səyyar qəbul keçirilib. 472 nəfər sakinin iştirak etdiyi görüşlərdə müxtəlif problemlərlə bağlı 44 məsələ barədə müraciətlər olunub. Qaldırılmış məsələlər öz müsbət həllini tapıb.
AZƏRTAC-ın bölgə müxbiri xəbər verir ki, bu barədə Beyləqan rayonu ərazisindəki Xocavənd qəsəbəsində 2018-ci ilin altı ayının yekunlarına həsr olunan yığıncaqda məlumat verilib.
Xocavənd Rayon İcra Hakimiyyətinin başçısı Eyvaz Hüseynovun məruzəsində bildirilib ki, bu il ilk dəfə olaraq ipəkqurdu bəsləyən Beyləqan rayonu ərazisində məskunlaşan xocavəndli məcburi köçkünlər 1 ton 47 kiloqram barama tədarük ediblər. Cari ilin məhsulu üçün əkilmiş 7881,8 hektar buğda sahəsindən 16 min 236,51 ton, 220 hektar arpa sahəsindən 506 ton məhsul əldə olunub. 97 hektarda pambıq, 70 hektarda soğan, baramaçılığın inkişafı məqsədilə 5500 ədəd tut tingi əkilib, 7 hektarda fındıq, 2 hektarda nar bağları salınıb.
Diqqətə çatdırılıb ki, rayonun təsərrüfatlarında 2076 baş iribuynuzlu mal-qara, 18 min 703 baş qoyun və keçi var. Birinci yarımildə 5746 sentner ət, 15 min 211 sentner süd, 151 sentner yun istehsal edilib.
Məruzə və çıxışlarda görülmüş işlərlə yanaşı, mövcud problem və çatışmazlıqlar da qeyd olunub, qarşıda duran vəzifələrdən danışılıb.
Bölmənin digər xəbərləri
