Cəbrayıl, 4 mart, Tahir Ağaməmmədov, AZƏRTAC

Yolumuz yenə də adı dillər əzbəri olan və biz jurnalistlər üçün artıq doğma məkana çevrilmiş Cocuq Mərcanlı qəsəbəsinədir. O Cocuq Mərcanlıya ki, daşı-daş üstə qalmayan xarabazarlıqdan dövlətimizin qayğısı, insanların torpaq sevgisi və zəhməti sayəsində qısa müddətdə abad, müasir bir qəsəbəyə çevrilib.

AZƏRTAC-ın bölgə müxbirinin Cocuq Mərcanlıdakı ilk toydan hazırladığı reportajı təqdim edirik.

Cocuq Mərcanlıya budəfəki səfərimiz digərlərindən fərqlənir. Qəsəbəyə yaxınlaşdıqca daha aydın eşidilən şən musiqi sədaları qəlbimizi fərəh hissi ilə doldurur. 25 ildən sonra Cocuq Mərcanlıda ilk toy çadırı qurulub və yeni ailənin təməli qoyulur.

Toy yerinə yaxınlaşdıqca qarşımıza çıxan insanların tanış və doğma çöhrəsində eyni ifadəni görürük: sevinc və gələcəyə inam.

Həyətin bir tərəfində iri qazanlarda xörəklər buğlanır, manqalların üstündə çeşid-çeşid kabablar bişirilir. Gələn qonaqların ardı-arası isə kəsilmir.

Mağarın önündə bizi öz doğmaları kimi qarşılayan bəy və gəlinin valideynləri ilə görüşür, təbriklərimizi çatdırırıq. Gəlinin əmisi - Cocuq Mərcanlını heç vaxt tərk etməyən, doğma torpağa bağlılıq nümunəsi göstərən Oqtay Həziyev deyir: "Allaha şükürlər olsun ki, ordumuzun qüdrəti və dövlətimizin qayğısı sayəsində doğma torpağımızda, el-obamızın əhatəsində toy etmək də nəsib oldu. Hamımız sevinc içindəyik. Çünki Cocuq Mərcanlıda 25 ildən sonra ilk toy məclisi keçirilir. Bu, Cəbrayıl rayonunda, işğaldan azad edilmiş torpaqlarımızda ilk toydur. Cocuq Mərcanlı məcburi köçkünlərin öz doğma yurdlarına qayıdışının başlanğıcı olduğu kimi, işğaldan azad edilmiş torpalarımızda toylarımızın da başlanğıcıdır. Allah cavanlarımızı xoşbəxt eləsin. Bu şəraiti bizim üçün yaradan Prezidentimizə minnətdarıq".

Bəy atası Maşallah Fərhadov söhbətə qoşulur: "Biz uzun illər bir arzu ilə yaşamışıq: torpaqlarımız düşməndən azad olunsun və övladlarımızın toyunu doğma yurdda edək. Şükürlər olsun ki, bu arzumuz da gerçəkləşdi. Həm yurd-yuvamıza qayıtmışıq, həm də burada övladlarımıza toy edirik. Allah bu səadəti doğma yurdlarından didərgin düşmüş digər soydaşlarımıza da nəsib eləsin".

Qonaqlardan biri, Bakı şəhərindən gələn Cəbrayıl rayonunun Mehdili kənd sakini Kamil Sadıqov isə deyir: "Uzun illərdən sonra öz torpağıma toya gəlmişəm. Bu toya ölkəmizin digər yerlərində məskunlaşmış Cəbrayıl sakinləri də gəliblər. Onlar heç də cocuq mərcanlılılardan az sevinmirlər. Əminəm ki, işğal altında olan bütün torpaqlarımız azad ediləcək, belə toy çadırları Qarabağımızın hər yerində qurulacaq".

Cocuq Mərcanlı toyu indiyədək gördüyümüz digər toylardan fərqlənir. Təmtəraqla bəzədilmiş toy mağarı, insanların deyib-gülməsi, yuxarı başda əyləşmiş bəy və gəlin, bir-birini əvəz edən təbriklər, ürək sözləri, ara verməyən rəqslər toydan çox möhtəşəm bayram şənliyini xatırladırdı. Ailənin yaxın qohumu Nəsibə Hüseynova sevincini belə ifadə edir: "Doğma kəndimizə qayıdışdan sonra şənliklərimiz, bayram tədbirlərimiz çox olub. Ancaq bu gün ilk dəfədir ki, Cocuq Mərcanlı sakinləri bir araya gəlib. Bu toyda bütün kənd sakinləri iştirak edir. Digər bölgələrdən və Bakıdan da qonaqlarımız var. Bu gün biz həm yeni qəsəbəmizin ilk toyunu, həm də uzun illərin ayrılığından sonra ellikcə bir araya gəlməyimizi bayram edirik".

O, rəqs edən cavanları göstərib deyir: "Cocuq Mərcanlının toylu-düyünlü günləri başlayır. İrəlidə bizi hələ çox toylar gözləyir".

Sonra xoş musiqi sədaları altında "Xınayaxdı" mərasimi başlayır. Qız-gəlinlər bəylə gəlini dövrəyə alır, gəlinin əlinə xına yaxırlar. Hər tərəfdən alqış səsləri eşidilir.

Artıq axşam düşmək üzrədir. Toy şənliyi isə davam edir. Qəsəbədən çıxanda ayaq saxlayıb, musiqi sədalarının bürüdüyü Cocuq Mərcanlıya və üçrəngli, ay-ulduzlu bayrağımızın dalğalandığı Lələtəpəyə baxırıq. Qəlbimizdə bir daha sonsuz fərəh və qürur hissləri oyanır.