Bolqarıstanın “Kanal 3” televiziya kanalında Ermənistanın təxribatı barədə məlumat verilib VİDEO
Sofiya, 21 iyul, AZƏRTAC
Azərbaycanın Bolqarıstandakı səfiri Nərgiz Qurbanova Bolqarıstanın aparıcı televiziya kanallarından olan “Kanal 3”də yayımlanan “Lyubo Oqnyanov ilə hücum” verilişinə müsahibə verib. Müsahibədə N.Qurbanova cari ilin 12 iyul tarixində Ermənistan silahlı qüvvələrinin Azərbaycan-Ermənistan dövlət sərhədinin Tovuz istiqamətində mövqeləri ələ keçirmək məqsədilə artilleriya atəşlərindən istifadə edərək hücuma keçmək cəhdi, həmçinin iyulun 12-13-də Ermənistan silahlı qüvvələri bölmələrinin Şahbuz və Culfa rayonları istiqamətində müdafiə mövqelərimizi atəşə tutması, bu zaman beş hektara qədər ərazinin yanması, təxribat nəticəsində Azərbaycan Ordusunun biri general olmaqla 12 hərbi qulluqçusunun və bir mülki şəxsin həlak olması barədə məlumat verib.
Səfir, həmçinin bildirib ki, Azərbaycan-Ermənistan dövlət sərhədinin Tovuz rayonu istiqamətində son gərginliyin hərbi təhlili onu göstərir ki, təxribat Ermənistan tərəfindən başlanıb. Ermənistan məqsədyönlü şəkildə bu təxribata hazırlaşıb və qəflətən artilleriya qurğularından istifadə edib. Diplomat guya Azərbaycanın UAZ maşını ilə erməni mövqelərinə hücuma keçməsi ilə bağlı Ermənistan tərəfinin iddiasının ağlasığmaz olduğunu vurğulayıb. O, Azərbaycan tərəfinin belə bir istəyi olacağı təqdirdə UAZ-dan deyil, öz ordusunun arsenalında olan güclü, dağıdıcı vasitələrdən istifadə edəcəyini diqqətə çatdırıb. N.Qurbanova Ermənistanın bu təxribatı törətməkdə məqsədinin təkcə diqqəti bu ölkədə olan ağır sosial-iqtisadi vəziyyətdən və COVID-19 ilə bağlı acınacaqlı durumdan yayındırmaq deyil, eyni zamanda, sərhəddə gərginlik yaradaraq Ermənistanın üzv olduğu Kollektiv Təhlükəsizlik Müqaviləsi Təşkilatını (KTMT) münaqişəyə cəlb etmək olduğunu deyib.
Səfir Ermənistan silahlı qüvvələri tərəfindən azərbaycanlı mülki əhalinin və yaşayış məntəqələrinin atəşə tutulduğunu diqqətə çatdırıb. Azərbaycan-Ermənistan dövlət sərhədinin Tovuz istiqamətində baş verən son hadisələrin Paşinyan rejiminin real təxribatı olduğunu qeyd edən səfir bu təxribatı sözügedən rejimin xarici düşmən obrazı yaratmaqla ölkə əhalisini və müxalifəti məşğul etmək cəhdi kimi qiymətləndirib. O, Ermənistanın ağır siyasi və iqtisadi böhranda olduğu və Paşinyan əleyhinə müxalifət koalisiyasının yarandığı bir vaxtda Ermənistan tərəfindən bu təxribatın Paşinyanın hakimiyyətdə qalma müddətinin uzadılmasına xidmət etdiyini qeyd edib.
N.Qurbanova təxribatın yatırılması və gərginliyin aradan qaldırılması məqsədilə Azərbaycan-Ermənistan dövlət sərhədinin Qazax və Tovuz rayonları boyunca Azərbaycan Dövlət Sərhəd Xidmətinin bölmələrinin yerləşdirildiyini, bunun əksinə olaraq Ermənistan tərəfindən iki ölkə arasında dövlət sərhədinin hərbiləşdirilməsini diqqətə çatdırıb. O qeyd edib ki, beynəlxalq hüququn normalarına uyğun olaraq rəsmi Bakı nəinki özünümüdafiə, eyni zamanda, öz torpaqlarını işğaldan azad etmək hüququna malikdir. Belə ki, BMT Nizamnaməsinin 51-ci maddəsinə uyğun olaraq, Azərbaycan ayrılmaz hissələri olan Dağlıq Qarabağ bölgəsini və ətraf 7 rayonu azad etmək hüququna malikdir.
Azərbaycanın diplomatik cavabının necə olacağı ilə bağlı suala cavab olaraq səfir bildirib ki, regionda gərginliyin qarşısının alınması üçün Ermənistan, ilk növbədə, işğal siyasətinə son verməli, Ermənistan silahlı qüvvələri Azərbaycanın işğal olunmuş ərazilərindən çıxarılmalıdır. N.Qurbanova Ermənistanın milli təhlükəsizlik strategiyasında təcavüzkarlıq siyasətinin elementlərinə toxunaraq sözügedən sənəddə yeni ərazilərin ələ keçirilməsi və gərginliyin artırılması cəhdlərinin açıq-aydın nümayiş olunduğuna diqqəti çəkib.
COVID-19 pandemiyası ilə mübarizə şəraitində Ermənistan tərəfinin son təxribatının onun ikiüzlü siyasətini ifşa etdiyini bildirən səfir təxribatın bu ölkənin BMT Baş katibinin qlobal atəşkəs barədə təşəbbüsünü guya dəstəklədiyi barədə bəyanatına zidd olduğunu vurğulayıb.
Səfir regionda sülh və təhlükəsizlik məsələlərində maraqlı olan bütün dövlətlərin, xüsusilə Avropa İttifaqına üzv dövlətlərin bütün səylərinin Ermənistanın işğalçı siyasətinə son qoymalı olduğunu bildirib.
Son təxribata, eləcə də regionda gərginliyə, etnik təmizləmə siyasətinin qurbanları olan 100 minlərlə insanın fundamental hüquqlarının pozulmasına görə məsuliyyətin ərazilərimizin 20 faizini işğal edən Ermənistanın üzərinə düşdüyünü vurğulayan səfir bir çox ölkələrin vəziyyətin gərginləşməsi ilə əlaqədar narahatlıqlarını ifadə etdiyini qeyd edib. O, həmçinin Azərbaycanın ərazilərinin işğal altında qalması ilə heç zaman barışmayacağını və öz ərazi bütövlüyünü bərpa etmək üçün əlindən gələni edəcəyini bildirib. BMT Təhlükəsizlik Şurasının münaqişə ilə bağlı 4 qətnaməsini xatırladan səfir beynəlxalq birliyin Azərbaycana qarşı güc tətbiqini qətiyyətlə qınadığını, onun Dağlıq Qarabağ bölgəsi və 7 ətraf rayon da daxil olmaqla beynəlxalq tanınmış sərhədləri çərçivəsində suverenliyi və ərazi bütövlüyünü tanıdığını ifadə edib.
Diplomat münaqişənin tənzimlənməsinin yalnız Azərbaycanın ərazi bütövlüyü və suverenliyi çərçivəsində mümkün olacağını qeyd edib, Azərbaycan ərazilərinin hərbi işğalının problemin həlli yolu olmadığını və bu kimi təxribatların Ermənistan üçün arzuolunan nəticələrə gətirib çıxarmayacağını deyib.
İqbal Hacıyev
AZƏRTAC-ın xüsusi müxbiri
Sofiya
Bölmənin digər xəbərləri
