Qəbələdə mühafizə bəndləri tikilir, yeni suvarma kanalları inşa edilir VİDEO
Qəbələ, 28 mart, AZƏRTAC
Ölkənin şimal-qərbində yerləşən Qəbələ rayonunda meliorativ tədbirlər davam edir. Ötən il olduğu kimi, bu il də rayondan keçən dağ çaylarında mühafizə bəndləri tikilir, suvarılmanın intensivliyini artırmaq üçün yeni kanallar inşa olunur.
AZƏRTAC-ın bölgə müxbiri xəbər verir ki, Qəbələ Suvarma Sistemləri İdarəsinin əsas fəaliyyətlərindən biri rayonun inzibati ərazilərinin və kənd təsərrüfatına yararlı torpaq sahələrinin sel sularından mühafizəsini təşkil etməkdir. Bu məqsədlə Qəbələ rayonunda hər il əsaslı işlər görülür. 2021-ci ildə bu məqsədlə Qəbələnin ən gur sulu və sel təhlükəsi törədən, o cümlədən rayonun şəhər mərkəzinə, eyni zamanda, Zarağan, Aydınqışlaq, Sultan və Nuxa kəndlərinə sel təhlükəsi törədən Dəmiraparan çayında 100 paqonometr əsaslı bənd, həmçinin dövlət investisiyası hesabına 165 paqonometr əsaslı bənd vurulub. Bundan əlavə, Qəbələ rayonunun digər çaylarında da məcra təmizləmə işləri görülüb. Cari ildə Qəbələ rayonunda daha 120 paqonometr əsaslı bənd vurulması planlaşdırılır. Bu bəndin vurulması Dəmiraparan çayında indiyə qədər tikilmiş bəndlərin davamı olaraq nəzərdə tutulub.
Azərbaycan Meliorasiya və Su Təsərrüfatı ASC-nin nümayəndəsi Qurbanəli Daşdəmirov görülən işlərdən danışarkən deyib: “Ətrafında dayandığımız rayonun ən gur sulu çayı olan Dəmiraparan başlanğıcını Qafqaz sıra dağlarından götürür. Aprel, may və iyun aylarında havaların isti keçməsi və qarın əriməsi ilə əlaqədar bu çaydan bəzən olur ki, bir saniyədə hətta 150-200 kubmetr su keçir. Bu çayda son illərdə qurulmuş əsaslı mühafizə bəndlərinin hesabına demək olar ki, ətrafa ziyan dəyməsinin qarşısı alınıb. Dayandığımız Dəmiraparan çayının sağ və sol sahilində ümumilikdə rayonun təxminən 50 faizi yaşayır”.
Yaşayış məntəqələrinin sel sularından mühafizəsi ilə yanaşı, Qəbələ suvarma sistemləri idarəsinin əsas fəaliyyət sahəsi Qəbələdə kənd təsərrüfatı ilə məşğul olan fərdi fermer təsərrüfatlarının suvarma suyu ilə təmin edilməsindən ibarətdir. Bu məqsədlə Qəbələ suvarma sistemləri idarəsi 970 kilometrlik kanal və arxlardan qurulmuş böyük bir suvarma şəbəkəsi ilə 11300-dən artıq fermer təsərrüfatına xidmət edir. Hər olduğu kimi, bu il də kənd təsərrüfatı bitkilərinin suvarılmasını daha yaxşı təmin etmək məqsədi ilə kanal və arxlarda lildən təmizləmə işlərinə başlanılıb. 2021-ci ildə daha 834.000 kub kanal və arxlarda lildən təmizlənmə işləri aparılacaq.
Qurbanəli Daşdəmirov bildirib ki, bu günə qədər 60 min kubmetrdən artıq lildən təmizlənmə işləri görülüb: “Bu da o deməkdir ki, təxminən 25 kilometrdən artıq kanal və arxlarda lildən təmizlənmə işləri həyata keçirilib və işlər bu gün də sürətlə davam edir. Son illər ölkə rəhbərinin kənd təsərrüfatının inkişafı, xüsusilə də meliorasiya sahəsinə qayğısı sayəsində Qəbələ rayonunda da xeyli iş görülüb. Belə ki, ötən illərdə su itkilərinin qarşısının alınması məqsədi ilə əsas kanallara beton üzlük çəkilməsi yüksək templə aparılır”.
Beton üzlüklü kanalların suvarmada rolu çox böyükdür. Çünki, bu kanallar torpaq kanallardan fərqli olaraq suyu tam itkisiz olaraq əkin sahələrinə çatdıra bilir.
Bu günə qədər 11 kilometrdən artıq təsərrüfatlararası kanallarda beton üzlük çəkilib. Qurbanəli Daşdəmirovun sözlərinə görə, bu il də təxminən 2000 paqonometrə qədər beton üzlük çəkilməsi planlaşdırılıb və hazırda bu işlərə başlanılıb. “Hazırda üzərində dayandığımız və iş gedən Zalamqobu kanalı ən böyük kanallardan biridir. Bu kanalın əhatəsində 1500 hektardan artıq suvarılan sahə mövcuddur. Hər il olduğu kimi, bu il də yaz suvarmaları ilə əlaqədar yanvar ayından başlayaraq magistral kanalların təmizlənməsi işlərinə start vermişik”, - deyə o vurğulayıb.
Qeyd edək ki, rayon ərazisində 972,5 kilometr uzunluqda suvarma şəbəkəsi mövcuddur. Əsas su mənbələri Dəmiraparan çay, Vəndam çay, Həmzəlli, Bum, Tikanlı, Qara çay və qara sularıdır.
Bölmənin digər xəbərləri
