Salyan, Neftçala və Sabirabadda kollektor-drenaj şəbəkələri lildən təmizlənir VİDEO
Salyan, 29 aprel, AZƏRTAC
Meliorasiya və Su Təsərrüfatı Açıq Səhmdar Cəmiyyətinin Aşağı Muğan Meliorativ Sistemlərinin İstismarı İdarəsi Salyan, Neftçala və Sabirabad rayonları ərazisində yerləşən 132500 hektar əkin sahələrinə xidmət edir. Bu əkin sahələrində 3261 kilometr uzunluğunda kollektor-drenaj şəbəkələri var. Qrunt sularını kollektor-drenaj şəbəkələri vasitəsilə dənizə ötürmək üçün 25 ədəd meliorativ nasos stansiyası fəaliyyət göstərir.
Aşağı Muğan Meliorativ Sistemləri İstismarı İdarəsinin rəisi Azər İsmayılov AZƏRTAC-a bildirib ki, keçən il dənizə 852 milyon kubmetr minerallaşmış duz ötürülüb və minerallıq aşağı salınaraq litrdə 47 qram olub. Ümumilikdə, dənizə 3,9 milyon ton duz axıdılıb. “Prezident İlham Əliyevin biz melioratorların qarşısına qoyduğu vəzifələri əlimizdə rəhbər tutaraq, işlərimizi səylə davam etdiririk. Görülən işlər nəticəsində bu ilin birinci rübündə 128 kilometr kollektor-drenaj sistemi lildən təmizlənib. Bu sistem üzərinə 13 ədəd hidrotexniki qurğu təmir olunub. Hazırda bütün nasos aqreqatları və elektrik avadanlıqları saz vəziyyətdədir. Bu il 1 ədəd aşırımlı hidrotexniki qurğu və aşırımlı körpü, həmçinin Salyanda 11 aqreqatlı birləşmiş nasos stansiyası əsaslı təmir ediləcək. Bu işlər yaxın aylarda yerinə yetiriləcək”, - deyə o əlavə edib.
Kollektor-drenaj şəbəkələrində lildən təmizləmə işlərinin mütəmadi aparılması əkin sahələrində qrunt sularının qısa müddətdə kənarlaşdırılmasına səbəb olub. Bu isə torpaqların münbitliyini artırıb və nəticədə məhsuldarlıq yüksəlib. Görülən işlər əkinçiliklə məşğul olan fermerlərin də işini asanlaşdırır.
Hazırda idarə tərəfindən lildən təmizləmə işləri davam etdirilir. Salyan rayon Arbatan, Sarvan, Dayikənd, Çuxanlı və Seydan kəndlərində, Neftçalanın Aşağı Qaraymanlı, Xolqarabucaq və Boyat kəndlərindəki kollektorlar, eləcə də Sabirabadın “Qol” kollektoru lildən təmizlənir.
Azər İsmayılov deyib: “Bu il qarşımıza məqsəd qoymuşuq ki, torpaq istifadəçilərinin sahələrinin yanında olan kollektorlarda 550 kilometrə yaxın hissəni lildən təmizləyək və 52 ədəd hidrotexniki qurğunu təmir edək. Ümidvaram ki, qarşıya qoyulan tələbləri yerinə yetirəcək, ərzaq təhlükəsizliyinə, regionların sosial-iqtisadi inkişafı Dövlət proqramına və məhsuldarlığın artmasına öz töhfəmizi verəcəyik”.
Qeyd edək ki, cari ildə Aşağı Muğan Meliorativ Sistemləri İstismarı İdarəsi Salyan, Neftçala və Sabirabad rayonlarının ayrı-ayrı inzibati ərazilərində əkin sahələrinə xidmət göstərən kollektor-drenaj şəbəkələrində ümumilikdə 536 kilometr uzunluğunda lildən təmizləmə işləri aparıb.
Bölmənin digər xəbərləri
