20 ildə Azərbaycanda seysmoloji tədqiqatların inkişaf etdirilməsi sahəsində böyük uğurlara imza atılıb
Bakı, 10 oktyabr, AZƏRTAC
Bu il oktyabrın 15-də Azərbaycan Respublikasının Prezidenti İlham Əliyevin prezidentlik fəaliyyətinin 20 ili tamam olur. 2003-cü il Prezident seçkiləri ərəfəsində Azərbaycan xalqının böyük oğlu, Ulu Öndərimiz Heydər Əliyev İlham Əliyevin prezidentliyə namizədliyini irəli sürərkən “Mən ona özüm qədər inanıram” demişdi. Azərbaycan Respublikasının Prezidenti İlham Əliyev isə seçkilərə “Hər bir Azərbaycanlının prezidenti olacağam” şüarı ilə getmişdi. Bu gün biz Azərbaycan dövlətinin vətəndaşları hansı sahədə çalışmağımızdan asılı olmayaraq çox böyük fəxr və qürurla deyə bilirik ki, ötən iyirmi il ərzində İlham Əliyev hər bir azərbaycanlının Prezidenti olmağı bacardı. Bütün xalqımız öz Prezidentinə inanır, güvənir və bir yumruq kimi onun ətrafında birləşib.
Qeyd etməliyəm ki, möhtərəm Prezidentimiz İlham Əliyevin 20 illik prezidentlik dövründə həyata keçirilən çoxsaylı sosial layihələr, iqtisadiyyatın və qeyri-neft sektorunun yüksək sürətlə inkişaf etdirilməsi, geosiyasi proseslərdə öz qəti mövqeyini ortaya qoyması nəticəsində ölkəmiz iqtisadi və siyasi baxımından regional mərkəzə çevrilib.
Təbii ki, 20 ildə bütün sahələr kimi Azərbaycanda seysmoloji tədqiqatların inkişaf etdirilməsi sahəsində də böyük uğurlara imza atılıb. Bu gün Azərbaycan seysmoloji tədqiqatların aparılmasına görə dünya ölkələrinin sıralamasında beşinci, MDB ölkələri arasında isə birinci yerdədir. Biz bu inkişafa necə nail olduq? Təbii ki, dövlətimizin və dövlət başçımızın verdiyi dəstək, göstərdiyi diqqət və qayğı sayəsində. Bunu AZƏRTAC-a AMEA nəzdində Respublika Seysmoloji Xidmət Mərkəzinin Elektron xidmətlər şöbəsinin müdiri Vüsalə Rafiqqızı deyib.
O bildirib ki, 2000-ci ildə baş verən Bakı zəlzələsindən sonra Ulu Öndərimiz Heydər Əliyevin göstərişi ilə Azərbaycana ən müasir texnologiyalarla işləyən yeni seysmik stansiyalar alınması haqqında qərar qəbul edildi. Baxmayaraq ki, o dönəmdə ölkəmizin maliyyə imkanları elə də geniş deyildi, dövlətin gəlirləri əsasən 1 milyon qaçqın və məcburi köçkünlərin sosial problemlərinin həllinə, ölkənin müdafiə gücünün artırılmasına yönəldilmişdi, bütün bunlarla belə Ulu Öndərimizin göstərişi ilə dünya bazarında kifayət qədər bahalı olan seysmoloji avadanlıqlar - seysmoloji stansiya və cihazlar Azərbaycana alınıb gətirildi. İlkin olaraq, ABŞ-ın “Kinemetrcs” şirkətinin istehsalı olan 9 ədəd peyk rabitəsi ilə işləyən seysmik stansiyalar alındı. Bu stansiyalar ilk dəfə olaraq ölkəmizdə 2003-cü ildən fəaliyyətə başladı. Sonrakı illərdə Prezident İlham Əliyevin birbaşa diqqət və qayğısı sayəsində RSXM-nin Seysmik Monitorinq Şəbəkəsinin genişlənməsi prosesi davam etdirildi.
Hazırda mərkəzin respublika ərazisində 84 seysmik stansiya fəaliyyət göstərir. Bundan başqa, 24 GPS stansiyası, 6 geofiziki, 5 geokimyəvi stansiya fəaliyyət göstərir ki, bu da ölkəmizdə kompleks seysmoloji-geofiziki tədqiqatların yüksək səviyyədə aparmağa imkan verir.
Qeyd edək ki, Müzəffər Ali Baş Komandanımız, möhtərəm Prezidentimizin rəhbərliyi altında rəşadətli Azərbaycan Ordusu Qarabağı işğaldan azad edəndən sonra mərkəz tərəfindən 30 ildən artıq heç bir tədqiqat aparılmayan Qarabağ iqtisadi rayonundakı ərazilərdə 10 seysmik stansiyanın açılması planlaşdırılıb. Çünki erməni vandalları tərəfindən ötən əsrin 90-cı illərinin əvvəllərində Qarabağ və ətraf rayonlarımız işğal edilərkən həmin ərazilərdə Seysmoloji Mərkəzə məxsus stansiyalar da darmadağın edilmişdi. Bu səbəbdən 30 ildən çoxdur ki, mürəkkəb geoloji quruluşa malik olan Qarabağda heç bir seysmoloji-geofiziki tədqiqatlar aparılmayıb.
Torpaqlarımız düşmən tapdağından xilas ediləndən sonra bölgədə genişmiqyaslı quruculuq-abadlıq işlərinə başlanılıb. Seysmoloji Xidmət Mərkəzi də aparılan işlərin gedişatına və ərazilərimizin minalardan təmizlənməsi prosesinə paralel olaraq Qarabağda seysmik stansiyalar quraşdıracaq. Artıq bu istiqamətdə işlər ilkin olaraq bütün Türk dünyasının mənəvi paytaxtı olan Şuşada başlanılıb.
Qardaş Türkiyə Respublikasının DİN-in Təbii Fəlakət və Fövqəladə Halların İdarə Olunması Agentliyi (AFAD) tərəfindən Azərbaycana hədiyyə edilən bir ədəd quyudibi seysmik stansiyanın Şuşada quraşdırılması istiqamətində texniki işlər hazırda davam etdirilir. Bundan başqa, Qarabağ bölgəsindəki 9 rayonumuzda seysmik stansiyalar quraşdırılacaq ki, bu stansiyaların fəaliyyətə başlaması nəticəsində mərkəz tərəfindən aparılan kompleks seysmoloji-geofiziki tədqiqatlar tam şəkildə ölkə ərazisini əhatə edəcək.
“Onu da qeyd etmək istərdim ki, MDB məkanında Azərbaycan həm ən müasir seysmik stansiyalar şəbəkəsinin olmasına, həm də aparılan tədqiqatların səviyyəsinə görə liderdir. Bu gün mərkəzimiz dünyanın 30-dan çox xarici seysmoloji təşkilat və mərkəzi ilə yaxından əməkdaşlıq edir. Dünyanın nüfuzlu Oksford, Missiru, Miçiqan, Kolumbiya və s. kimi universitetləri ilə birgə elmi tədqiqat layihələri həyata keçirir.
Bütün bu uğurların əldə olunması isə sözsüz ki, Seysmoloji Mərkəzin işinə dövlət başçımızın birbaşa diqqət və qayğısının nəticəsidir. Odur ki, biz seysmoloqlar dövlət və Prezident qarşısında hər zaman məsuliyyətimizi anlayırıq. Eyni zamanda, hər birimiz Azərbaycan dövlətinin vətəndaşları kimi öz Prezidentimizlə fəxr edir və ona inanırıq. Tanrı dövlətimizi və Prezidentimizi qorusun!”, deyə Respublika Seysmoloji Xidmət Mərkəzinin
Elektron xidmətlər şöbəsinin müdiri Vüsalə Rafiqqızı fikirlərini yekunlaşdırıb.
Bölmənin digər xəbərləri
