Ağsu, 19 yanvar (AZƏRTAC). Ağsu rayonunun bütün ümumtəhsil məktəblərində 20 Yanvar faciəsinin 22-ci öldönümü geniş sürətdə qeyd olunur.

AZƏRTAC xəbər verir ki, qanlı Yanvar hadisələri ilə əlaqədar rayonun 70 ümumtəhsil məktəbində, o cümlədən 35 tam orta, 28 ümumi orta və 17 ibtidai məktəbdə yığıncaqlar, “dəyirmi masa”lar keçirilmişdir.

Tədbirlərdə 20 Yanvar faciəsinin əsl mahiyyəti məktəblilərə ətraflı sürətdə çatdırılmışdır. Çıxış edənlər 20 Yanvar faciəsini Azərbaycan xalqının müstəqilliyi, torpaqlarımızın bütövlüyü uğrunda apardığı mübarizəyə qarşı başda Mixail Qorbaçov olmaqla sovet imperiyasının o vaxtkı rəhbərliyinin törətdiyi insanlığa yaraşmayan hərbi müdaxilə, cinayətkar basqın kimi dəyərləndirmişlər. Yeniyetmələr heç vaxt unudulmayacaq bu qanlı hadisəni həm də xalqımızın azadlıq və müstəqillik uğrunda mübarizəsinin şanlı tarixi kimi səciyyələndirmişlər.

Ümumtəhsil məktəblərində “20 Yanvar - iftixar günüdür” mövzusunda inşa yazılır, rəsm müsabiqələri keçirilmişdir.

Yanvarın 19-da rayonun bütün ümumtəhsil məktəblərində ilk dərslər 20 Yanvar faciəsinə həsr olunmuşdur.