20 Yanvar faciəsi qurbanlarının xatirəsi Penitensiar Xidmətin Mühafizə Alayında ehtiramla yad edilmişdir
Bakı, 20 yanvar (AZƏRTAC). Penitensiar Xidmətin Mühafizə Alayında 20 Yanvar faciəsi qurbanlarının xatirəsinə həsr olunmuş mərasim keçirilmişdir.
Penitensiar xidmətin ictimaiyyətlə əlaqələr şöbəsindən AZƏRTAC-a bildirmişlər ki, əvvəlcə, şəhidlərin xatirəsi bir dəqiqəlik sükutla yad edilmişdir.
Sonra alay komandiri, ədliyyə polkovniki Mehman Məmmədov çıxış edərək tarixi xronologiyanı bir daha xatırlatmışdır. 1990-cı ildə yanvarın 19-dan 20-nə keçən gecə sovet ordusunun əsgərlərinin silahsız Azərbaycan xalqına qarşı misli görünməmiş cinayət törətdiyini diqqətə çatdırmışdır. Bildirmişdir ki, qanlı 20 Yanvar faciəsinə birinci olaraq ümummilli lider Heydər Əliyev Azərbaycanın Moskvadakı daimi nümayəndəliyində verdiyi etiraz bəyanatı ilə münasibətini bildirmişdir. Ulu öndər Heydər Əliyevin xalqın təkidi ilə yenidən hakimiyyətə qayıdışından sonra 20 Yanvar hadisələrinə siyasi-hüquqi qiymət verilmiş, şəhidlərin xatirəsi əbədiləşdirilmiş, şəhid ailələrinə və o faciəli gecədə sağlamlığını itirmiş soydaşlarımıza dövlət qayğısı göstərilmişdir.
Digər natiqlərin çıxışlarından sonra Hüseynqulu Sarabski adına mədəniyyət evinin kollektivi ədəbi-bədii kompozisiya təqdim etmişdir.
Bölmənin digər xəbərləri
