20 Yanvar hadisəsi xalqımızın azadlıq əzminin sarsılmaz olduğunu sübuta yetirmişdir
Bakı, 20 yanvar (AZƏRTAC). Sovet ordusunun ölkəmizdə axıtdığı qanlar xalqımızın yaddaşını oyatmış, qəhrəmanlıq ənənələrini təzələmişdir.
Bu sözləri AZƏRTAC-a müsahibəsində 20 Yanvar facisəi qurbanlarının məzarlarını ziyarət etmək üçün Şəhidlər xiyabanına gəlmiş Müdafiə Sənayesi Nazirliyinin əməkdaşı Mirfəttah Fəttayev demişdir.
M.Fəttayev bildirmişdir ki, bu qanlı faciədən 22 il keçir. Buna baxmayaraq, həmin hadisə yalnız ümumxalq hüzn günü kimi deyil, eyni zamanda, öz azadlığına və müstəqilliyinə can atan xalqımızın mübarizliyini və məğrurluğunu nümayiş etdirən bir qəhrəmanlıq nümunəsi kimi qeyd olunur. 1990-cı il yanvarın 20-də sovet rəhbərliyinin Azərbaycanda azadlıq uğrunda mübarizəyə qalxmış dinc insanlara qarşı törətdiyi cinayət dəhşətli bir cinayətdir. O qanlı faciə göstərdi ki, xalqımız milli istiqlal və dövlətçilik ideyalarına sıx bağlıdır. Bu qanlı hadisə sovet imperiyasının qaniçənliyini təsdiqləməklə yanaşı, həm də xalqımızın azadlıq əzminin sarsılmaz olduğunu sübuta yetirmişdir.
Bölmənin digər xəbərləri
