20 Yanvar şəhidləri tariximizin ən parlaq səhifəsini yazmışlar
Qax, 20 yanvar (AZƏRTAC). Xalqımızın azadlıq mübarizəsinin şanlı səhifələrindən olan 20 Yanvar faciəsinin iyirmi ikinci ildönümü ilə əlaqədar yanvarın 20-də Qax şəhərində ümumrayon tədbiri keçirilmişdir.
AZƏRTAC xəbər verir ki, rayon ictimaiyyətinin nümayəndələri əvvəlcə Şəhidlər xiyabanına gələrək 20 Yanvar şəhidlərinin xatirəsinə ucaldılmış abidənin önünə gül-çiçək düzmüş, şəhidlərin ölməz xatirəsini ehtiramla yad etmişlər.
Daha sonra rayon icra hakimiyyətində “20 Yanvar qan yaddaşımızdır” mövzusunda “dəyirmi masa” keçirilmişdir. İştirakçılar foyedə məktəblilərin “Qanlı Yanvar” mövzusunda çəkdikləri rəsm əsərlərindən ibarət sərgi ilə tanış olmuşlar.
Tədbiri rayon İcra hakimiyyəti başçısının birinci müavini Tahir İsmayılov açaraq xalqımızın azadlıq mübarizəsi və qəhrəmanlıq tarixində şanlı səhifə olan 20 Yanvar hadisələrindən 22 il vaxt ötdüyünü, faciənin ildönümü ilə əlaqədar hər yerdə olduğu kimi, Qax rayonunda da silsilə tədbirlərin, anma mərasimlərinin keçirildiyini diqqətə çatdırmışdır.
20 Yanvar hadisələrindən bəhs edən film nümayiş etdirilmişdir.
“Dəyirmi masa”da “20 Yanvar qan yaddaşımızdır” mövzusunda məruzə dinlənilmiş, çıxışlar olmuşdur.
Bölmənin digər xəbərləri
