20 Yanvar şəhidlərinin xatirəsi anılmışdır
Bakı, 18 yanvar (AZƏRTAC). Yanvarın 18-də Qərb Universitetində 20 Yanvar faciəsinin 22-ci ildönümünə həsr olunmuş anım mərasimi keçirilmişdir.
AZƏRTAC xəbər verir ki, universitetin müəllim və tələbələrinin iştirakı ilə təşkil olunan tədbirdə faciə qurbanlarının xatirəsi bir dəqiqəlik sükutla yad edilmiş, Azərbaycanın Dövlət Himni səsləndirilmişdir.
Qərb Universitetinin professorları Fikrət Sadıqov və Qüdrət Əbdülsəlimzadə tariximizin faciəli, həm də qəhrəmanlıq səhifəsinə çevrilmiş Qanlı Yanvar hadisələrinin mahiyyətini açıqlamışlar. Bildirmişlər ki, 1990-cı il yanvarın 19-dan 20-nə keçən gecə təpədən-dırnağadək silahlanmış sovet ordusunun əsgərləri və zirehli texnikası Bakıda müstəqillik uğrunda ayağa qalxmış dinc, əliyalın insanlara qarşı amansız vəhşiliklər törətmişlər.
Natiqlər dünyada misli görünməmiş bu qırğının müəlliflərinin arzusunun puça çıxdığını, hərbi təcavüzün Azərbaycan xalqının əzmini, mübarizə ruhunu qıra bilmədiyini, qürur və milli birliyini daha da möhkəmləndirdiyini söyləmişlər.
Tədbirdə tələbə və şagirdlərin ifasında ədəbi-bədii kompozisiya təqdim olunmuşdur.
Sonra tədbir iştirakçıları Qərb Universitetinin dizayn fakültəsinin tələbələrinin hazırladıqları fotosərgi ilə tanış olmuşlar.
Bölmənin digər xəbərləri
