20 YANVAR ŞƏHİDLƏRİNİN XATİRƏSİNƏ EHTİRAM

18.01.2004 [12:46]
Çap et
A⁺ A^-

Bərdə rayonunun bütün yaşayış məntəqələrində, qaçqın və məcburi köçkünlərin məskunlaşdıqları çadır şəhərciklərində 20 Yanvar faciəsinin 14-cü ildönümünə həsr olunmuş anma mərasimləri keçirilir. Qanlı Yanvar qırğınından bəhs edən videofilmlər göstərilir, fotostendlər, sərgilər nümayiş etdirilir.

AZƏRTAC-ın bölgə müxbiri xəbər verir ki, keçirilən matəm mərasimlərində çıxış edənlər ümumxalq hüzn gününün, ildönümünün keçirilməsi ilə əlaqədar ölkə Prezidenti İlham Əliyevin xüsusi Sərəncamını müstəqilliyimiz, suverenliyimiz uğrunda canlarından keçmiş şəhidlərin ruhuna dərin ehtiramı kimi qiymətləndirirlər.

Yanvar şəhidlərinin xatirəsinə həsr olunmuş anma mərasimlərində xalqımızın xilaskar oğlu, görkəmli siyasətçi, ümummilli liderimiz Heydər Əliyevin əziz xatirəsi hörmətlə yad edilir.

Şəhidlərin xatirə kompleksi ziyarət olunur, abidələr önünə əklillər qoyulur, gül-çiçək dəstələri düzülür.

20 Yanvar faciəsinin 14-cü ildönümü ilə əlaqədar Ağdam, Ağcabədi, Tərtər, Yevlax, Laçın və Beyləqan rayonlarında da anma mərasimləri keçirilir.