20 Yanvar xalqımızın azadlığa gedən qəhrəmanlıq yolunun başlanğıcıdır
Bakı, 19 yanvar (AZƏRTAC). Yanvarın 19-da Azərbaycan Milli Elmlər Akademiyası İqtisadiyyat İnstitutunda xalqımızın azadlığa gedən qəhrəmanlıq yolunun başlanğıcı olan 20 Yanvar faciəsinin növbəti ildönümü münasibətilə tədbir keçirilmişdir.
AZƏRTAC xəbər verir ki, tədbir iştirakçıları əvvəlcə şəhidlərin müqəddəs ruhunu bir dəqiqəlik sükutla yad etmişlər.
İnstitutun direktoru, professor İsa Alıyev xalqımızın qəhrəmanlıq salnaməsində özünəməxsus yeri olan 20 Yanvar hadisəsini dinc vətəndaşların haqsızlığa qarşı etirazı, həmçinin milli birlik rəmzi kimi qiymətləndirmişdir. Bildirilmişdir ki, bu faciədə sovet imperiyasının o vaxtkı rəhbərliyi ilə yanaşı, onların Azərbaycandakı əlaltılarının da böyük günahı vardır. Həmin hadisəyə ilk hüquqi qiymət isə ümummilli liderimiz Heydər Əliyev tərəfindən verilmişdir. Məhz bundan sonra bütün dünya əsl günahkarların kim olduğunu bilmişdir. Qədirbilən xalqımız qəhrəman şəhidlərimizin müqəddəs ruhunu həmişə əziz tutur.
Digər çıxış edənlər müasir Azərbaycanın sürətli və dayanıqlı inkişaf dövrünü yaşadığını, buna görə azadlıq və müstəqilliyimiz yolunda şəhid olmuş insanlara borclu olduğumuzu bildirmişlər. Əminliklə vurğulanmışdır ki, adları xalqımızın şanlı tarixinə qızıl hərflərlə yazılmış 20 Yanvar şəhidləri heç vaxt unudulmayacaq, onların qəhrəmanlığı daim anılacaqdır.
Bölmənin digər xəbərləri
