“2+1” Eksperimental teatr festivalı başa çatmışdır
Bakı, 2 noyabr (AZƏRTAC). Noyabrın 2-də Azərbaycan Teatr Xadimləri İttifaqında “2+1” Eksperimental teatr festivalının yekunlarına həsr olunmuş tədbir keçirilmişdir.
Festival Azərbaycan Teatr Xadimləri İttifaqının (ATXİ) təşəbbüsü, Mədəniyyət və Turizm Nazirliyinin dəstəyi ilə reallaşmışdır.
AZƏRTAC xəbər verir ki, mərasimdə ATXİ-nin sədri, Xalq Artisti Azərpaşa Nemətov festivalın keçirilmə səbəblərindən, əhəmiyyətindən, məram və məqsədindən və əldə olunan nəticələrdən söz açmışdır.
Bildirmişdir ki, ilk dəfə 2011-ci ildə keçirilən festivaldan sonra ATXİ-yə çoxsaylı tamaşaçı məktubu daxil olmuş və onlar bu tədbirin davamlı təşkilini arzulamışlar. Biz tamaşaçı marağını nəzərə alaraq festivalın yenidən keçirilməsinə qərar verdik. Bu tədbirə nəinki paytaxtdan, habelə bölgələrdə fəaliyyət göstərən teatrlardan da qoşulmuşlar. Festivalda 6 kollektiv 7 tamaşa ilə iştirak etmiş və onların hər biri tamaşaçı marağı qazanmışdır.
A.Nemətov demişdir: “Biz adından da göründüyü kimi bu festivalı təşkil edərkən ənənəvi teatr düşüncəsini deyil, qeyri-adi düşüncə tərzi, avanqard, yəni gənclərdən daha müasir yanaşma gözləyirdik. Festivalda nümayiş olunan səhnə əsərləri istəklərimizi tam əks etdirməsə də, bütünlükdə festivalı uğurlu və dəyərli bir teatr hadisəsi adlandırmaq olar”.
Tədbirdə teatrşünas Məryəm Əlizadə, Vidadi Qafarov və başqaları nümayiş olunan tamaşalarla bağlı fikirlərini bölüşmüşlər.
Sonda fərqlənən tamaşaların rejissorlarına və aktyorlara diplomlar təqdim edilmişdir.
Bölmənin digər xəbərləri
