“Oğlum Qələbənin nə olduğunu biləndən sonra şəhidlik zirvəsinə yüksəldi” – Aprel şəhidinin atası VİDEO
Cəlilabad, 3 aprel, İlkin Adıyev, AZƏRTAC
2016-cı ilin aprelində Ermənistan silahlı qüvvələrinin qoşunların təmas xəttində ardıcıl təxribatlarına cavab olaraq keçirilmiş əks-əməliyyat zamanı qazanılmış tarixi Zəfər Azərbaycan Ordusunun qələbə əzmini bir daha göstərib. Dörd gün davam edən Aprel döyüşləri hərb tariximizin ən önəmli günlərindən biridir. Həmin döyüşlər zamanı Lələtəpə yüksəkliyi və bir çox strateji ərazilər düşməndən azad edilib. Əslində bu döyüş 44 günlük Vətən müharibəsinin başlanğıcı idi. Torpaqlarımızın azad olunması yolunda canlarından keçmiş şəhidlərimizin hünəri bu gün də gənclərimizə örnəkdir.
AZƏRTAC-ın bölgə müxbiri xəbər verir ki, döyüşlər zamanı şəhidlik zirvəsinə ucalan, adı tarixə yazılan qəhrəman hərbçilərimizdən biri Cəlilabad rayonundan olan Röyal Nəsirovdur. Röyal Cəlilabadın Aprel döyüşlərində şəhid olan tək hərbçisidir. O, 19 il yaşamasına baxmayaraq, torpaqlarımız uğrunda şəhidlik zirvəsinə ucalaraq adını tarixə yazdı. Bunun üçün də hər zaman anılır və sevilir...
Röyalın atası İmran Nəsirov bildirir ki, oğlu Tərtərin Qapanlı kəndi ətrafında gedən döyüşlərdə ilk saatlarda düşmən cəbhəsinin yarıb, irəli gedənlərdən biri olub. Onunla birlikdə döyüşən dostları deyirlər ki, ilk döyüş saatlarında Röyal çiynindən yaralanıb. Yanındakı döyüş yoldaşları da yaralı olub. Özü yaralı olsa da, yoldaşlarını döyüş meydanından çıxar bilib, sonra isə yenə döyüşə qayıdıb. Düşmənin arxasına keçərək, orada bir neçə erməni əsgərini pulemyotla məhv edib. Qəhrəman hərbçimiz düşmən snayperinə tuş gəlib və şəhidlik zirvəsinə ucalıb.
“Röyal məni üzüağ, alnıaçıq etdi. Martın 16-sı ad günü idi. Zəng etdi ki, ata məzuniyyətə gələcəyəm, ad günümü evimizdə qeyd edərik. Amma gəlmədi... Sonuncu dəfə martın 28-də danışdım. Soruşdum ki, niyə gəlmədin? “Ata öz növbəmi əsgər yoldaşıma verdim ki, o getsin evlərinə. Mən sonra gələcəyəm”, - dedi. O gündən sonra mən Röyalla əlaqə saxlaya bilmədim. Komandirləri ilə əlaqə qurmağa çalışsam da, mümkün olmadı. Sonra mənə zəng etdilər ki, oğlun şəhid olub...” - deyə şəhid atası söyləyir.
“Röyal Qələbənin nə olduğunu biləndən sonra şəhidlik zirvəsinə yüksəldi” ,- deyən İmran dayı oğlu ilə qürur duyduğunu bildirir.
Qeyd edək ki, Röyal Nəsirov ölümündən sonra “Hərbi xidmətdə fərqlənməyə görə” üçüncü dərəcəli medalı ilə təltif olunub.
Bölmənin digər xəbərləri
