Salyan, 21 iyun, İsmayıl Cəfərli, AZƏRTAC

Elm və Təhsil Nazirliyi tərəfindən ümumtəhsil müəssisələrində çalışan təhsilverənlərin sertifikatlaşdırılması prosesinin test imtahanı mərhələsinə başlanılıb. Əlbəttə, bu imtahan həm də müəllimlərin bilik və bacarıqlarının bir göstəricisidir. Yaxşı pedaqoq olmaq, gələcəyimiz olan şagirdlərə doğru təhsil vermək hər bir müəllimin əsas məqsədidir. İmtahanlar başladı və ilk sevindirici xəbər yayıldı. 57 yaşlı müəllimə Flora Dünyamalıyeva respublika üzrə ilk olaraq maksimum - 60 bal toplayıb.

AZƏRTAC-ın əməkdaşı Flora Dünyamalıyevanın təəssüratlarını öyrənmək üçün onun dərs dediyi Salyan rayon Salman Cəfərov adına Yenikənd kənd orta məktəbinə yollanıb.

Məktəbin ibtidai sinif müəlliməsi Flora Dünyamalıyeva gənclik illərindən, daha dəqiq desək, 34 ildir bu məktəbdə çalışır.

“Məktəbi Salyan rayonunda bitirmişəm. Sonra M.F.Axundzadə adına rus dili məktəbini başa vurmuşam, qırmızı diplomla. Orta məktəbi də əla qiymətlərlə oxumuşam. Sonra təyinatımı bu məktəbə aldım. 30 ildən çoxdur ki, burada çalışıram. Uşaqlarla işləməyi çox sevirəm”, - deyir Flora müəllimə.

Təhsilverənlərin sertifikatlaşdırılması prosesinin test imtahanında iştirak edən Flora müəllimə əvvəl bu qədər balı toplamasından xəbərsiz olub. Müsahibimiz deyir ki, imtahanda ancaq sualları diqqətlə oxumaq və düzgün cavab vermək haqqında düşünüb: “Sözün düzü, əvvəl yüksək bal topladığımı başa düşmədim. Çox həyəcanlı idim. Gördüm ki, hamısı sıfır yazılıb, bir də öndə 60 qeyd olunmuşdu. Elə bildim ki, cavabım qeydiyyata alınmayıb. Ona görə bir az həyəcan keçirdim. Sən demə, sıfır səhvlərim imiş”.

Flora Dünyamalıyevanı təbrik etmək üçün məktəbin pedaqoji kollektivi bir yerə toplaşmışdı. Hər kəs bu uğura sevinir, Flora müəlliməni təbrik edirdi.

Salyan təhsil sektorunun müdiri Razıgül Dadaşova: “Region üzrə imtahanlarda 1676 müəllimin iştirakı gözlənilirdi. Salyan üzrə isə 529 müəllim iştirak etməli idi. Bizim üçün çox qürurvericidir ki, Şirvan-Salyan Regional Təhsil İdarəsinin Salyan təhsil sektorundan 2 müəllim maksimum - 60 bal toplayıb. Dövlət başçımıza minnətdarlığımızı bildiririk ki, biz müəllimlər üçün əlverişli şərait yaradılıb. Bu şərait müəllimlərimizin öz üzərində davamlı inkişaf etməsi üçün böyük stimuldur. Sertifikatlaşma həm onların əməkhaqqının artmasında, həm də yaxşı müəllim kimi özünütəsdiq üçün gözəl imkandır”.

Flora müəllimə deyir ki, dərs dediyi şagirdlər arasında müxtəlif yüksək vəzifələrdə çalışanlar da var. Bəziləri isə onunla bərabər, elə bu məktəbdə müəllim kimi fəaliyyət göstərir. Şagirdləri arasında şəhid olanlar da var...

İndi yay tətilidir. Təhsilverənlərin sertifikatlaşdırılması prosesinin test imtahanında ilk olaraq 60 bal toplayan 57 yaşlı müəllimə bu gün boş sinif otağında şagirdləri ilə keçirdiyi xoş günləri xatırlayır, yeni tədris ilinin başlanmasını səbirsizliklə gözləyir.