Kəlbəcərdə Minalardan və partlamamış hərbi sursatlardan təmizləmə üzrə İşçi qrupun iclası keçirilib VİDEO
Bu il Kəlbəcər rayonu ərazisində yaşayış infrastrukturu, energetika və ekoloji layihələr olmaqla 4 min 719 hektar ərazi mina və partlamamış hərbi sursatlardan təmizlənib
Bakı, 1 sentyabr, AZƏRTAC
Azərbaycan Respublikasının işğaldan azad edilmiş ərazilərində məsələlərin mərkəzləşdirilmiş qaydada həlli ilə bağlı yaradılmış Əlaqələndirmə Qərargahının İdarələrarası Mərkəzinin nəzdində fəaliyyət göstərən Minalardan və partlamamış hərbi sursatlardan təmizləmə üzrə İşçi qrupunun növbəti səyyar iclası avqustun 31-də Kəlbəcər rayonunda keçirilib.
Azərbaycan Respublikası Minatəmizləmə Agentliyindən (ANAMA) AZƏRTAC-a verilən məlumata görə, tədbirdə ANAMA-nın İdarə Heyətinin sədri, İşçi qrupun rəhbəri Vüqar Süleymanov, İşçi qrupda təmsil olunan müvafiq dövlət qurumlarının səlahiyyətli nümayəndələri iştirak ediblər.
İclasda çıxış edən Vüqar Süleymanov işğaldan azad olunmuş ərazilərdə minatəmizləmə fəaliyyətinə cəlb edilmiş qurumlar tərəfindən illik tədbirlər planına uyğun həyata keçirilən işlərin gedişatı barədə məlumat verib. Habelə mina təhlükəsi ilə mübarizə fəaliyyətində qurumların birgə təmizləmə layihələrinin icrasının, Agentlik tərəfindən aparılan monitorinq və keyfiyyətə nəzarət yoxlamalarının keçirilməsinin vacibliyini vurğulayıb.
İşçi Qrupda təmsil olunan Azərbaycan Respublikasının Müdafiə Nazirliyinin (MN) rəsmisi MN-in humanitar minatəmizləmə əməliyyatlarına cəlb olunan istehkamçıları tərəfindən 2023-cü il ərzində Kəlbəcər rayonu ərazisində yaşayış infrastrukturu, energetika və ekoloji layihələr olmaqla 4 min 719 hektar ərazinin mina və partlamamış hərbi sursatlardan təmizləndiyini bildirib.
İclasda işğaldan azad edilmiş ərazilərdə hökumət tərəfindən müəyyənləşdirilmiş müvafiq layihələrin icrası məqsədilə ərazilərin mina və partlayıcı qurğulardan təmizlənməsi fəaliyyəti barədə hesabatlar dinlənilib, hesabatlarda əksini tapmış məsələlər müzakirə olunub, eləcə də əməliyyatlara cəlb olunmuş texnika və avadanlıqlar barədə məlumat verilib.
Eyni zamanda, mina təhlükəsi ilə mübarizə fəaliyyətində informasiya dəstəyinə qurumlararası müştərək layihələrin icrasının vacibliyi vurğulanıb. Bu sahədə birgə əməkdaşlığın perspektivləri ətrafında fikir mübadiləsi aparılıb.
Kəlbəcər rayonuna səfər çərçivəsində İşçi qrup üzvləri Müdafiə Nazirliyinin icra etdiyi “Yanşaq yaşayış məntəqəsi” təmizləmə layihəsi, bitmiş layihə olan “Kəlbəcər-1” Kiçik Su Elektrik Stansiyası ilə tanış olub, layihələr barədə məlumatlandırılıblar.
Bölmənin digər xəbərləri
