28 MAY
1918-ci il. Müsəlman Şərqində ilk dünyəvi demokratik dövlət olan Azərbaycan Xalq Cümhuriyyəti elan edilib. Cümhuriyyətin mövcud olduğu 23 ay ərzində demokratik dövlət və ordu quruculuğu, iqtisadiyyat, təhsil, mədəniyyət və digər sahələrdə mühüm islahatlar həyata keçirilib. Özünü Azərbaycan Xalq Cümhuriyyətinin varisi elan edən müasir müstəqil Azərbaycanda 28 May - Respublika Günü dövlət səviyyəsində qeyd edilir.
1925-ci il. Siyasi xadim, şair, jurnalist, publisist Mustafa Bülənt Ecevitin doğum günü (1925-2006). Müxtəlif dövrlərdə Ankara, Zonquldağ və İstanbuldan millət vəkili olub. Dövlət naziri, Baş nazirin köməkçisi və Baş nazir kimi fəaliyyət göstərib, Cümhuriyyət Xalq Partiyasının sədri olub.
1927-ci il. Məşhur kaman ustası, Azərbaycanın Xalq Artisti Habil Əliyevin doğum günü (1927-2015). Onun ifasında “Sarı gəlin”, “Qaragilə”, “Sona bülbüllər” və digər xalq mahnıları mədəniyyətimizin qızıl fonduna daxildir. Geniş repertuarlı musiqiçi Azərbaycan xalqının milli sərvəti sayılan “Segah”, “Şur”, “Çahargah”, “Rast”, “Mahur”, “Zəminxarə”, “Bayatı-Qacar”, “Bəstənigar” muğamlarının yeni ifa tərzini formalaşdıraraq novatorluqla ənənənin sintezinə nail olub.
1963-cü il. Stend atıcılığı üzrə Olimpiya çempionu, dünya və Avropa çempionu Zemfira Əli qızı Meftahətdinovanın doğum günü. Sidney-2000 Olimpiya Oyunlarında Azərbaycanın stend atıcılığı üzrə yığma komandasına ilk qızıl medalı qazandırıb. Afina-2004 Olimpiya Oyunlarında bürünc medala layiq görülüb. Pekin-2008 Olimpiya Oyunlarının iştirakçısıdır.
