28 May - Respublika Günü münasibətilə Qırğızıstanda rəsmi qəbul keçirilib
Bişkek, 28 may, AZƏRTAC
Azərbaycanın Qırğızıstandakı səfirliyi 28 May - Respublika Günü münasibətilə rəsmi qəbul keçirib.
AZƏRTAC xəbər verir ki, tədbirdə Qırğızıstanın mədəniyyət, informasiya və turizm naziri Azamat Jamankulov, Xarici İşlər nazirinin birinci müavini Nurlan Niyazaliyev, Prezident Aparatının və Hökumətin rəsmiləri, digər yüksəkvəzifəli şəxslər, Joqorku Keneşin (Parlamentin) deputatları, səfirlər və digər diplomatla, ziyalılar, diaspor nümayəndələri, jurnalistlər iştirak ediblər.
Əvvəlcə Azərbaycanın və Qırğızıstanın dövlət himnləri səslənib.
Azərbaycanın Qırğızıstandakı səfiri Hidayət Orucov 28 May - Respublika Gününün müqəddəs Ramazan ayına təsadüf etdiyini vurğulayıb və bu münasibətlə bütün iştirakçıları təbrik edib.
Səfir müsəlman dünyasının ilk demokratik parlamentli respublikası olan AXC-nin Azərbaycan xalqının və bütün müsəlman dünyasının tarixinə qızıl hərflərlə yazıldığını qeyd edib.
Diplomat deqeyd edib ki, Cümhuriyyətin yaranması və fəaliyyəti Azərbaycanın müstəqillik əzminin, xalqımızın öz dövlətçilik ənənələrinə sədaqətinin və azadlıq mücadiləsinin nəticəsidir.
Bildirilib ki, AXC siyasi sisteminə, həyata keçirdiyi islahatlara, demokratik dövlət quruluşuna, eləcə də təyin etdiyi məqsəd və vəzifələrinə görə Avropanın ənənəvi demokratik dövlətlərindən geridə qalmayıb. Qeyd edilib ki, Azərbaycan müsəlman dünyasında qadınlara seçki hüququ verən ilk ölkə olub və hətta bu baxımdan bir sıra Avropa və Amerikanın ənənəvi demokratik dövlətlərini qabaqlayıb.
Səfir müstəqil Azərbaycanın AXC-nin siyasi və mənəvi varisi olduğunun və 101 il əvvəl olduğu kimi, torpaqlarımızın erməni təcavüzü ilə üzləşdiyi barədə ətraflı məlumat verib. Səfir Azərbaycan müstəqilliyinin bərpasından sonra Ermənistanın ölkəmizə qarşı təcavüzü nəticəsində ərazimizin 20 faizinin işğal edildiyini və 1 milyon insanın öz doğma torpağında qaçqın və məcburi köçkün vəziyyətinə düşdüyünü ifadə edib, işğala son qoyulması, zəbt edilmiş torpaqların qeyd-şərtsiz azad olunması barədə BMT Təhlükəsizlik Şurasının 1993-cü ildə dörd qətnamə qəbul etdiyini diqqətə çatdırıb. Bundan əlavə, bu məsələ ilə bağlı BMT Baş Assambleyasının, Avropa Şurası Parlament Assambleyasının, Avropada Təhlükəsizlik və Əməkdaşlıq Təşkilatının, İslam Əməkdaşlıq Təşkilatının və digər nüfuzlu beynəlxalq təşkilatların qətnamələrinin də mövcud olduğunu qeyd edib.
H.Orucov bildirib ki, Azərbaycan əsrlərboyu müxtəlif mədəniyyətlərin, etnik qrupların və dinlərin nümayəndələrinin birgə yaşayıb-yaratdığı və təmasda olduğu bir məkandır. Azərbaycan həmişə milli və dini dözümlülük nümunəsi olub. Deyilib ki, multikulturalizm hazırda müstəqil Azərbaycanın dövlət siyasətidir. Azərbaycan multikulturalizm modelinin dövlət siyasəti olaraq qurucusu ulu öndər Heydər Əliyev olub. Bu gün həmin siyasət Azərbaycan Prezidenti İlham Əliyev tərəfindən qlobal miqyasda həyata keçirilir. Azərbaycan multikulturalizm modeli dünya miqyasında tanınır.
Diplomat çağdaş Azərbaycanın tərəqqisindən, qitələrarası layihələrin həyata keçirilməsində iştirakından, dünya birliyində yerindən və mövqeyindən söz açıb. Səfir Azərbaycanın Qırğızıstanla əlaqələrindən danışaraq bildirib ki, bizim xalqlarımız etnik, tarixi əlaqələr, mədəniyyət, adət-ənənələr və dil ilə bağlıdırlar, bu da öz növbəsində, yaxın və səmərəli əməkdaşlıq üçün böyük imkanlar açır. Əməkdaşlığın, iş birliyinin genişləndirilməsi və dərinləşdirilməsi Azərbaycan Prezidenti İlham Əliyev və Qırğızıstanın dövlət başçısı Sooronbay Jeenbekovun siyasətinin prioritet istiqamətlərindəndir.
H. Orucov ölkələrimiz arasında son vaxtlar bütün sahələrdə, xüsusilə humanitar sahədə əməkdaşlığın uğurla inkişaf etdiyini vurğulayıb. Qeyd edib ki, son illər ərzində həm Bişkekdə, həm Bakıda çoxlu mühüm tədbirlər keçirilib, Azərbaycanın Qırğızıstanda və bu ölkənin isə Azərbaycanda daha yaxından tanıdılması üçün müvafiq işlər aparılıb. Səfir vurğulayıb ki, Azərbaycan ilə Qırğızıstan arasında əməkdaşlıq münasibətləri bütün sahələri əhatə etməkdədir.
Nurlan Niyazaliyev Azərbaycan xalqını və salona toplaşanları təbrik edərək müstəqil Azərbaycan ilə Qırğızıstanın əlaqələrinin yüksələn xətlə inkişaf etdiyini, beynəlxalq təşkilatlar çərçivəsində məhsuldar əməkdaşlıq münasibətlərinin qurulduğunu vurğulayıb.
N.Niyazaliyev ölkələrimiz arasında uğurlu əməkdaşlığın bundan sonra da möhkəmləyəcəyinə əminliyini bildirərək, Azərbaycan və qırğız xalqlarının qardaş xalqlar olduğunu vurğulayıb. Nazir müavini iki ölkə arasında əməkdaşlığın inkişafında Azərbaycanın Qırğızıstandakı səfirliyinin aktiv fəaliyyətini yüksək qiymətləndirib.
Tədbir geniş konsert proqramı ilə davam edib.
Qulu Kəngərli
AZƏRTAC-ın xüsusi müxbiri
Bişkek
Bölmənin digər xəbərləri
