Vaşinqton, 30 may (AZƏRTAC) Azərbaycan Respublikasının ABŞ-dakı səfirliyi 28 May - Respublika Günü münasibətilə təntənəli ziyafət təşkil etmişdir. Vaşinqtonun ən mötəbər tarixi binalarından biri olan “Endryu Mellon Auditorium” da keçirilən ziyafətdə ABŞ Administrasiyasının yüksək vəzifəli rəsmiləri, Konqresin üzvləri Mayk Törner, Henri Kueler, Donald Peyn, Şila Cəkson Li, Cim Moran, Stiv Stokman, Azərbaycan milli ordusunun tərəfdaşı olan Oklahoma Milli Qvardiyası komandanının müavini, general Qreqori Ferquson və ABŞ hərbi qüvvələrinin digər yüksək rütbəli zabitləri, Vaşinqtonda akkreditə olunmuş diplomatik korpusun nümayəndələri, ABŞ-dakı Azərbaycan, türk və yəhudi icmasının üzvləri daxil olmaqla 700-dən artıq qonaq iştirak etmişdir.

Argentina əsilli müğənni Mariya Entragusun ifasında Azərbaycanın və ABŞ-ın himnləri canlı şəkildə səsləndirilmişdir.

Azərbaycanın ABŞ-dakı səfiri Elin Süleymanov bir rəmz olaraq ölkəmizin dövlətçilik ənənələrinin nəsillərdən-nəsillərə ötürülməsi və onun müstəqil Azərbaycan Respublikasının timsalında bərpa edilməsində Respublika Gününün malik olduğu əhəmiyyət barədə fikirlərini bölüşmüşdür. O, həmçinin Azərbaycanın dövlət müstəqilliyinin qorunub saxlanmasının önəmini qeyd etmiş və bu mənada ümummilli lider Heydər Əliyevin xidmətlərini, Prezident İlham Əliyevin rəhbərliyi ilə müstəqil Azərbaycanın əldə etdiyi nailiyyətləri qonaqların diqqətinə çatdırmışdır. Səfir Azərbaycan-ABŞ münasibətlərinin davamlı inkişafına əminliyini bildirmişdir.

ABŞ-ın enerji nazirinin köməkçisi Conatan Elkaynd ziyafətdəki təbrik çıxışında ABŞ və Azərbaycan arasında dostluq münasibətlərini təqdir etmiş, Azərbaycanı ABŞ-ın mühüm tərəfdaşı kimi qəbul etdiklərini söyləmiş, qarşılılıqlı münasibətlərin sütunları olaraq siyasi, təhlükəsizlik və enerji istiqamətləri üzrə görülən işləri sadalamışdır. İlk dəfə 20 il əvvəl “Əsrin Müqaviləsi”nin imzalanması mərasimində iştirak üçün Azərbaycana səfər etmiş C.Elkaynd ötən illər ərzində ölkəmizdə əldə edilən inkişafı xüsusi vurğulamışdır. O, xüsusilə cavabdeh olduğu enerji sahəsindən söhbət açaraq, regionun enerji təhlükəsizliyinin təmin edilməsində Azərbaycanın oynadığı roldan danışmış, 2013-cü il dekabrın 17-də Bakıda “Şahdəniz-2” üzrə yekun investisiya qərarının imzalanması kimi mühüm bir hadisəyə şəxsən şahidlik etdiyini demiş və Xəzər dənizi hövzəsindən Avropaya təbii qaz ixrac edəcək “Cənub” qaz dəhlizinə ABŞ-ın dəstəyini bəyan etmişdir.

ABŞ Konqresində Azərbaycan-ABŞ dostluq qrupunun üzvü olan Ş.Cəkson Li Azərbaycan xalqını Respublika Günü münasibətilə təbrik edərək, ölkələrimiz arasında möhkəm tərəfdaşlıq və məhsuldar əməkdaşlığın genişləndirilməsi haqqında danışmışdır. Ölkəmizə səfərlərindən bəhs edən Çəkson Li Azərbaycanın parlaq gəncliyini alqışlamış və əldə etdiyimiz tərəqqini vurğulamışdır.

Sonra Vaşinqton şəhər meriyasının protokol və beynəlxalq əlaqələr katibliyinin rəhbəri Patrisia Elvud Vaşinqton şəhərinin meri Vinsent Qreyin təbrik Bəyannaməsini ziyafət iştirakçılarına oxumuşdur.

Ziyafət iştirakçılarına Azərbaycan mətbəxinin nümunələri təqdim edilmiş və tədbir rəngarəng musiqi proqramı ilə davam etmişdir.

Yusif Babanlı

AZƏRTAC-ın xüsusi müxbiri

Vaşinqton