London, 18 yanvar, AZƏRTAC

Mirkazım Seyidzadə artıq 7 ildir ki, Londonda yaşayır. O, buraya ilk gəldiyi zaman tələbə kimi bir çox çətinliklərlə üzləşib. Həmin təcrübələr onda digər tələbələrə dəstək olmaq üçün təşəbbüs yaratmaq ideyası yaradıb. Mirkazım Londona gəlmə təcrübəsi və mobil tətbiqin yaranma prosesi barəsində AZƏRTAC-ın London bürosuna müsahibə verib. Müsahibəni təqdim edirik.

-Mirkazım, Londona gəldiyiniz ilk günlərdə hansı çətinliklərlə üzləşdiniz? Bu çətinliklər sizə nələr öyrətdi?

-Londona ilk gəldiyim günlərdə hər şey mənim üçün çətin və qarışıq idi. Ev tapmaq, yeni dostlar qazanmaq, tədbirlər və Londondakı imkanlar haqqında məlumat əldə etmək böyük maneələr kimi görünürdü. Buradakı sistem tamamilə fərqli idi və nəyi haradan başlayacağımı bilmək çox vaxt alırdı.

Daha sonra tək olmadığımı gördüm və anladım ki, mənim kimi bura gələn digər tələbələr də eyni problemləri yaşayır. Bu təcrübələr mənə öyrətdi ki, belə vəziyyətlərdə insan dəstək axtarır, düzgün yönləndiriləndə isə hər şey daha asan olur. Məhz bu hisslər məni tələbələr üçün köməkçi bir platforma yaratmağa ruhlandırdı.

Əvvəlcə tələbələr üçün sosial media platformalarında qruplar yaratmağa başladım. Bu qruplar vasitəsilə tələbələr öz aralarında ünsiyyət qurur, ehtiyaclarını paylaşır və bir-birlərinə kömək edirdilər. Mənim üçün bu qruplar təkcə tələbələr arasında əlaqə qurmaq vasitəsi deyil, həm də onların hansı problemlərlə üzləşdiyini anlamaq üçün bir imkan idi.

Qruplarda gördüm ki, bir çox tələbənin yaşadığı çətinliklər oxşardır – ev tapmaq, tədbirlərdən xəbərdar olmaq, akademik məsələlər və ya gündəlik həyat problemləri. Bildim ki, bu qruplar əhəmiyyətli olsa da, onların imkanları məhduddur və daha geniş, daha əlçatan bir platforma yaratmaq lazımdır. 2024-cü ilin əvvəlində bu ideyanı həyata keçirmək üçün dostum Sahib Zülfiqar ilə birləşdik. Sahib də tələbələrin yaşadığı çətinliklərə yaxından bələd idi və biz bu problemi həll etmək üçün birlikdə işləmək qərarına gəldik. İlk günlərdən hər addımı diqqətlə planlaşdırmağa başladıq – texniki tələblərdən tutmuş istifadəçi təcrübəsinə, hətta tətbiqin dizaynına qədər hər bir detalı düşünürdük.

6 aylıq sıx əməkdən sonra, nəhayət 2024-cü ilin iyun ayında “TALAB”ı təqdim etdik. Bu layihə bizim üçün yalnız texniki bir yenilik deyildi, həm də tələbələr üçün əsl dəstək mexanizmi idi. “TALAB”ın təqdim edilməsindən sonra tələbələr bu platforma vasitəsilə bir çox ehtiyaclarını qarşılaya və bir-birlərinə daha asan şəkildə dəstək ola bildilər. Bu nəticəni görmək bizim üçün həm sevindirici, həm də ilhamverici oldu.

-TALAB sözünün mənası nədir?

-“TALAB” sözü həm “tələbə”, həm də “tələb” sözlərinin mənalarını birləşdirir. Bu, bizim əsas missiyamızı – tələbələrin ehtiyaclarını qarşılamağı əks etdirir. Bu adı seçməyimiz təsadüfi deyil; bu ad həm tələbə həyatının mərkəzindəki ehtiyacları vurğulayır, həm də xidmət etdiyimiz auditoriyanın kim olduğunu göstərir. Bizim şüarımız isə bu konsepsiyanı mükəmməl izah edir: “We supply students’ talabs” – “Biz tələbələrin tələblərini təmin edirik”. Bu, təkcə bir ifadə deyil, həm də gördüyümüz işin əsas fəlsəfəsidir.

-Tətbiq indiyə qədər hansı uğurları əldə edib və hazırda istifadəçi bazası necədir?

-Tətbiq hazırda 5 mindən çox aktiv istifadəçiyə malikdir və 20-dən çox tərəfdaş şirkətlə əməkdaşlıq edir. Bu tərəfdaşlar vasitəsilə tələbələrə müxtəlif xidmətlər və imkanlar təqdim edirik. Ən maraqlı məqamlardan biri odur ki, istifadəçilərimizin yalnız 25%-i azərbaycanlı tələbələrdir. Qalan istifadəçilər əsasən ərəb və türk tələbələrdir. Bu fakt onu göstərir ki, tətbiq yalnız bir etnik qrupa deyil, geniş beynəlxalq auditoriyaya xidmət göstərmək potensialına malikdir. Bu, bizim üçün böyük bir uğurdur. Çünki layihəmiz təkcə azərbaycanlı tələbələrin deyil, dünyanın müxtəlif yerlərindən gələn tələbələrin ehtiyaclarını qarşılamaq məqsədini daşıyır.

-Mobil tətbiqin yaradılması prosesində hansı çətinliklərlə üzləşdiniz?

-Ən böyük çətinlik tələbələrin ehtiyaclarını dərindən anlamaq və onların problemlərinə uyğun həllər təqdim etmək idi. Bu, sadəcə “bir tətbiq yaratmaq” deyildi; işin görünməyən tərəfində tələbələrin real ehtiyaclarını analiz etmək və ən uyğun həll yollarını tapmaq dayanırdı.

Texniki məsələlər də öz çətinliyini göstərdi. Tətbiqin funksionallığını təmin etmək, interfeys hazırlamaq və bütün prosesləri mükəmməl şəkildə birləşdirmək üçün çox çalışmalı olduq. Marketinq strategiyasını düzgün qurmaq və maliyyə resurslarını idarə etmək də bizim üçün böyük bir sınaq idi. Lakin bu çətinliklər düzgün planlaşdırma, yaradıcı yanaşma və komanda işinin gücü ilə aradan qaldırıldı.

-Gələcək planlarınız və hədəfləriniz nədir?

-Əsas hədəfimiz Britaniyanın ən yaxşı 10 tələbə tətbiqi sırasına daxil olmaqdır. Bu, sadəcə bir ambisiya deyil, həm də tələbələrə daha keyfiyyətli və genişmiqyaslı xidmət təqdim etmək üçün bir istiqamətdir. Bununla yanaşı, qlobal səviyyəyə çatmaq əsas prioritetlərimizdən biridir. Məqsədimiz, yalnız Böyük Britaniyada deyil, dünyanın müxtəlif ölkələrində oxuyan və yaşayan tələbələrin ehtiyaclarını qarşılamaqdır.

Bu hədəflərə çatmaq üçün davamlı olaraq yeniliklər tətbiq edir, istifadəçilərin rəy və ehtiyaclarını diqqətlə öyrənirik. Tətbiqin funksiyalarını genişləndirmək, yeni tərəfdaşlarla əməkdaşlıq qurmaq və tələbələr üçün daha çox imkanlar yaratmaq üçün ardıcıl işləyirik.

-Tələbələrə tövsiyələriniz nələrdir?

-Tələbələrə ilk tövsiyəm hədəflərini dəqiq müəyyənləşdirmək və planlı şəkildə irəliləməkdir. Hər bir uğurun arxasında yaxşı düşünülmüş bir strategiya dayanır. Böyük Britaniyada oxumaq və yaşamaq istəyənlər üçün vaxt və maliyyə idarəçiliyi xüsusilə vacibdir. Burada həyat ritmi çox sürətlidir və hər bir fürsəti düzgün dəyərləndirmək tələb olunur.

Əlavə olaraq, qorxularınıza qalib gəlməyə çalışın. Hər bir böyük uğur kiçik addımlarla başlayır. İlk addımlar çətin ola bilər, lakin bu, sizi məqsədinizə aparacaq yeganə yoldur. Unutmayın ki, qarşılaşdığınız çətinliklər, əslində, yeni fürsətlərə çevrilə bilər - təki onları düzgün qiymətləndirə biləsiniz.

Sonda, tələbələrə mesajım budur: İnanın ki, iradə və istək ilə hər şey mümkündür. Mən “TALAB”ı yaratmaq prosesində bu dərsi dəfələrlə öyrəndim. Yol heç vaxt asan olmayacaq - texniki, maliyyə və şəxsi çətinliklər mütləq olacaq. Amma əgər məqsədinizə bağlı qalırsınızsa və səbirlə çalışırsınızsa, nəticə bütün zəhmətinizə dəyəcək.

Aytən Abbaslı

AZƏRTAC-ın xüsusi müxbiri

London