Saatlıda badam yığımına başlanılıb - reportaj VİDEO
Sınaq üçün salınan zeytun bağının ərazisi də genişləndiriləcək
Saatlı, 20 avqust, Aydın Yavərzadə, AZƏRTAC
Saatlı rayonu ərazisində dövlət dəstəyi ilə yaradılan aqroparkda badam yığımına başlanılıb. İnnovativ texnologiya ilə becərilən bağda məhsul boldur.
AZƏRTAC-ın bölgə müxbiri xəbər verir ki, rayonun Azadkənd kəndi ərazisində 7 min hektar sahədə salınan ID parkın yaradılmasında dövlət dəstəyinin önəmli rolu var. Aqroparkın əsas hissəsini bağçılıq təşkil edir.
Aqronom Təbriz Xəlilov bildirir ki, hazırda mövsümə uyğun olaraq badam bağlarında məhsul yığımı aparılır: “Aqroparkda badam bağının sahəsi 220 hektardır. Mərhələli şəkildə salınan bağın 40 hektarı hazırda tam məhsul verir. İlk dəfə 2018-ci ildə sınaq üçün 5 hektarlıq badam bağı salınıb. Həmin sahədən bu il hər hektardan 4 ton məhsul yığılır. 2019-cu ildə salınan 35 hektarlıq badam bağından isə hər hektara 3 ton məhsul gözləntimiz var”.
Onun sözlərinə görə, badam ağacları yaxşı inkişaf etdiyi üçün 2023-cü ildə əlavə olaraq 180 hektar sahədə bağ salınıb. Bu bağda 11 badam növü əkilib. Bağda damcı suvarma sistemi quraşdırılıb.
Badam bağlarında məhsul yığımı avqustun əvvəlindən başlayıb və bir aya yekunlaşacaq.
Aqroparkda təkcə badam bağı deyil, nar, gavalı, həmçinin digər meyvə bağları da salınıb.
Avtomatlaşdırılmış su sistemi üzrə mühəndis Çingiz İsmayılzadə bildirir ki, burada təkcə badam bağları deyil, digər ağaclar da müasir suvarma sistemi ilə becərilir, bu da yüksək məhsul götürməyə şərait yaradır. “Aqropark ərazisində 600 hektarı əhatə edən damcı suvarma şəbəkəsi yaradılıb. Bu şəbəkə iki suvarma stansiyasından qidalanır. Sistem suvarma zamanı suya qənaət etməyə şərait yaradır. Həmçinin bağlara lazımi səviyyədə və davamlı şəkildə su vermək mümkün olur. Damcı suvarma sistemi, eyni zamanda, bağların yemləmə və gübrələmə prosesini də asanlaşdırır. Suvarma stansiyalarında olan yemləmə çənləri vasitəsilə ağaclara lazımi maddələr və gübrələr suya qatılaraq bağlara ötürülür. Bu isə məhsuldarlığa yaxşı təsir edir".
Aqroparkın icraçı direktoru Xanlar Həmidovun sözlərinə görə, burada sınaq üçün zeytun bağları da salınıb və ilk sınaq uğurlu alınıb. Növbəti ildən bağın sahəsi genişləndirilərək 300 hektara çatdırılacaq.
Çoxillik bağlardan əlavə, aqropark ərazisində mövsümi bitkilər də becərilir. “Təkcə bu il 220 hektar sahədə taxıl yetişdirilib və yüksək sentnerlə məhsul yığılıb. Hazırda isə 42 hektar ərazidə becərilən darı sahəsində yığım aparılır və hər hektara 25-30 sentner məhsul tədarük edilir. Aqropark həm də iş yerlərinin açılmasına imkan yaradır. Hazırda parkda daimi olaraq 150 işçi çalışır. Mövsümlə əlaqədar isə çalışanların sayı 400-500 nəfərə çatır", - deyə X.Həmidov əlavə edib.
Qeyd edək ki, aqroparkda növbəti ay nar bağlarında yığım başlayacaq. Məhsullar yerli və xarici bazara çıxarılır. Ötən il nar bağından 3 min tona yaxın məhsul tədarük olunub və bu il də bol məhsul gözlənilir.
Bölmənin digər xəbərləri
