Beynəlxalq İnsan Hüquqları Günü qeyd olunub VİDEO
Bakı, 10 dekabr, AZƏRTAC
Azərbaycan Respublikasının insan hüquqları üzrə müvəkkili (ombudsman) Səbinə Əliyevanın və Birləşmiş Millətlər Təşkilatının Azərbaycandakı Nümayəndəliyinin birgə təşkilatçılığı ilə 10 Dekabr - Beynəlxalq İnsan Hüquqları Gününə həsr olunmuş tədbir keçirilib.
AZƏRTAC xəbər verir ki, Ombudsman Aparatının rəhbəri Aydın Səfixanlı tədbirdə çıxış edərək Ümumdünya İnsan Hüquqları Bəyannaməsinin insan hüquq və azadlıqlarının inkişafı, təşviqi və müdafiəsi baxımından önəmi, ölkəmizdə bu istiqamətdə həyata keçirilən kompleks islahatlar barədə məlumat verib və bu gün təşkil olunmuş tədbirin əhəmiyyətindən bəhs edib.
Aparat rəhbəri Bəyannamədə təsbit olunmuş hüquq və azadlıqların bir çox dünya dövlətlərinin konstitusiyalarında, o cümlədən Azərbaycan Respublikasının Konstitusiyasında təsbit olunduğunu, milli qanunvericiliyin məhz bu prinsiplər əsasında formalaşdığını qeyd edib. Son illər ərzində dünyada baş verən müharibələr, soyqırımı cinayətləri, tətbiq edilən ikili standartların Bəyannamədə və digər beynəlxalq sənədlərdə təsbit olunmuş hüquq və azadlıqların təmin olunmasında və müdafiəsində çətinliklər yaratdığı bildirilib.
Azərbaycanın da uzun illər münaqişədən əziyyət çəkən ölkələrdən biri olduğunu qeyd edən A.Səfixanlı Müzəffər Ali Baş Komandan, Prezident İlham Əliyevin rəhbərliyi altında rəşadətli Ordumuz tərəfindən torpaqlarımızın işğaldan azad edildiyini, keçmiş məcburi köçkünlərimizin öz doğma torpaqlarına qayıdışının təmin olunduğunu, onların pozulmuş hüquqlarının bərpa edildiyini diqqətə çatdırıb. Hazırda regionda və dünyada sülhün təmin olunması istiqamətində dövlətimiz tərəfindən mühüm addımların atıldığı, ölkəmizin BMT-nin qətnamələrinin icrasını təmin etdiyi vurğulanıb.
BMT-nin Rezident Əlaqələndiricisinin Ofisinin rəhbəri Kanako Mabuçi bu gün İnsan Hüquqları Bəyannaməsinin 75-ci ildönümünün qeyd edildiyini vurğulayıb. “Ötən dövrə nəzər salaraq deyə bilərik ki, biz münaqişələr, bərabərsizlik, iqlim dəyişiklikləri və təsisatlara azalan etimad olan dünyada yaşayırıq. Sülhün üstün olduğu halda belə, bir çoxları özlərini təhlükəsiz hiss etmirlər.
Qadın və qızlara qarşı zorakılıq insan hüquqlarının pozulmasının ən çox yayılmış hallarından biridir. Bu zəmanədə bizi birləşdirən dəyərlərə güclü dərəcədə sadiq qalmalı, ümumi bəşəriyyəti qorumalıyıq. Buna görə də insan hüquqları həyatımızın əsas dəyərləri kimi vacib hesab olunur. İnsan hüquqları abstrakt deyil, realdır. İnsan hüquqları müsbət məfhumdur. O, nəinki insanı mühafizə edir, gündəlik həyata sevinc, səadət, təhlükəsizlik hissi gətirir. İnsan hüquqları bölüşdüyümüz əsas dəyərlərdir. Bütün fərqlərə baxmayaraq, hamını birləşdirən ümumi bünövrədir. İnsan hüquqları əlçatandır. Onlar gündəlik seçimlərdə özünü büruzə verir. İnsan hüquqları icmaların ədalət və bərabərlik tələbi ilə bir araya gəldiyi zaman güclənir”, - deyə o bildirib.
Vəkillər Kollegiyasının sədr müavini Şahmar Məmmədov Azərbaycan Respublikasının Konstitusiyasının üçdəbir hissəsinin insan hüquq və azadlıqlarının qorunmasına həsr olunduğunu, bunun isə vəkillik fəaliyyətinin rolunu daha da artırdığını qeyd edib. Vətəndaşların yüksəkkeyfiyyətli hüquqi yardım almasını təmin etmək üçün Vəkillər Kollegiyasının həyata keçirdiyi tədbirlərdən bəhs edən Ş.Məmmədov deyib: “Vəkilliyə qəbul olmuş namizədlərə keçirilmiş təlimlərdə, vəkillərin tədris prosesində insan hüquqları və azadlıqlarına həsr olunmuş mövzulara xüsusi diqqət yetirilir. Vəkillərin böyük əksəriyyəti bu istiqamətdə təlimlərə cəlb olunurlar”.
Həmçinin aztəminatlı ailələrin hüquqi yardımla təmin olunması istiqamətində addımlardan danışan sədr müavini müxtəlif dövlət orqanları ilə aksiyaların keçirildiyini, hər il minlərlə vətəndaşın bu hüquqi yardımdan yararlandığını deyib. Qeyd olunub ki, bu gün də belə aksiyalar paytaxtla yanaşı, bölgələrdə də keçirilir.
Sonra BMT-nin Baş katibi Antonio Quterreşin və BMT-nin İnsan Hüquqları üzrə Ali Komissarı Volker Türkün Beynəlxalq İnsan Hüquqları Gününə həsr olunmuş videomüraciətləri dinlənilib.
Eyni zamanda, tədbirdə Beynəlxalq İnsan Hüquqları Gününə həsr edilmiş xüsusi “Fibonacci” intellektual oyunu təşkil olunub.
Tədbirdə, həmçinin Azərbaycan Respublikasının insan hüquqları üzrə müvəkkili (ombudsman) tərəfindən “Konstitusiya və suverenlik medianın gözü ilə” və “Konstitusiya və suverenlik uşaqların gözü ilə” mövzularında elan olunmuş jurnalist yazı və uşaq rəsm müsabiqələrinin qalibləri mükafatlandırılıblar.
Qalib jurnalistlər arasında AZƏRTAC-ın əməkdaşları da var.
Bölmənin digər xəbərləri
