Arif Məlikovun əsəri İsveç musiqi məktəbinin repertuarına daxil olub – EKSKLÜZİV VİDEO
Stokholm, 28 dekabr, Nərgiz Cəfərli, АZƏRTAC
Dünyaşöhrətli Azərbaycan bəstəkarı Arif Məlikovun “Komdenin arzuları” əsəri İsveçin Lidingö musiqi məktəbinin repertuarına daxil edilib.
AZƏRTAC xəbər verir ki, bu məlumatı İsveçdə yaşayan pianoçu Aynur Məlikova agentliyin ölkədəki müxbirinə bildirib.
Aynur Məlikovanın təşəbbüsü ilə bəstəkar Üzeyir Hacıbəylinin 140 illik yubileyinə həsr olunmuş konsertlər İsveçdə, Danimarkada və Maltada təşkil edilib. Üzeyir Hacıbəylinin əsərləri ilə yanaşı, onun musiqi məktəbinin davamçıları olan Azərbaycan bəstəkarlarının da əsərləri yer alıb. Onların arasında Arif Məlikovun “Komdenin arzuları” əsəri həmvətənimiz pianoçu Aynur Məlikova və isveçli fleytaçı Katrin Sponberqin ifasında səslənib.
AZƏRTAC-ın müxbiri ilə qısa söhbətində Aynur Məlikova “Komdenin arzuları” əsərinin rəqəmsallaşdırılması və musiqi məktəbinin repertuarına daxil edilməsi barədə ətraflı məlumat verib:
”Vətəndən uzaqda Üzeyir bəyin yubileyi münasibətilə keçirilən tədbirdə çıxış etmək mənim üçün böyük bir şərəf və məsuliyyət idi. Tədbirin əsas məqsədi Üzeyir Hacıbəyli, Arif Məlikov, Fikrət Əmirov, Niyazi kimi dahi bəstəkarların zəngin yaradıcılığını və Azərbaycan musiqi mədəniyyətini xarici ictimaiyyətə daha yaxından tanıtmaq idi. “Komdenin arzuları”na gəldikdə isə deyə bilərəm ki, bu əsər Arif Məlikovun yaradıcılığında xüsusi yer tutur və dərin emosional təsiri, bədii dəyəri, eləcə də melodik zənginliyi ilə seçilir. Sözügedən əsəri hər dəfə ifa etdikdən sonra Katrin xanım bu əsər haqqında öz düşüncələrini mənimlə bölüşməyi çox təqdirəlayiq hesab edib.
“Bu əsər hər dəfə onu ifa etdikcə mənim üçün yeni məna qazanır və sanki daha da dərinləşir. Musiqi xəyalpərəst və dinc xarakter daşıyır, eyni zamanda düşünməyə imkan verir. Mən bu əsəri İsveç və Danimarkada ifa edəndə xüsusi bir atmosfer yaranırdı, bütün zalı bürüyən harmoniya və istilik hiss olunurdu”,-deyə Katrin xanım mənimlə hisslərini bölüşüb.
İsveçli musiqiçi Günnar Blomström bu əsəri dinlədikdən sonra onu analitik baxımdan daha yaxından tanımaq arzusunda olub. Əsərin ton ahəngi və musiqinin struktur baxımından möhtəşəmliyi onu bu əsər üzərində rəqəmsal versiya hazırlamağa sövq edib. Rəqəmsal versiyada müasir musiqi elementləri ilə yanaşı, orijinal kompozisiyanın ruhu və melodik xətti qorunub saxlanılıb.
Ən sevindirici məqamlardan biri isə odur ki, bizim ifalarimizdan sonra “Komdenin arzuları” əsəri İsveçin Lidingö musiqi məktəbinin repertuarına daxil edilib. Bu hadisə Azərbaycan musiqisinin beynəlxalq səviyyədə tanıdılması, eləcə də ölkəmizin zəngin musiqi irsinin Avropa musiqi tədrisinə inteqrasiyası baxımından olduqca önəmli bir addımdır.
Üzeyir bəyin yubileyinə həsr olunan layihələr təkcə bir silsilə konsert deyil, həm də ölkələr arasında mədəni körpü rolunu oynadı. Bu əməkdaşlıq nəticəsində müxtəlif musiqi dünyalarının bir araya gələrək necə gözəl nəticə verdiyini gördük. Gələcəkdə bu istiqamətdə daha genişmiqyaslı layihələr həyata keçirməyi, Azərbaycan bəstəkarlarının əsərlərinin Avropada daha çox səslənməsini və tədris olunmasını arzulayıram. Hesab edirəm ki, belə təşəbbüslər mədəniyyətimizin dünyada tanıdılmasına və Azərbaycan musiqisinin universal dəyərlərinin nümayişinə mühüm töhfə verir”.
Bölmənin digər xəbərləri
