Bakı, 19 yanvar, Gülay Nəzərova, AZƏRTAC

Musiqi sadəcə səslərin harmoniyası deyil, nəsildən-nəslə ötürülən mənəvi yaddaşdır. Bu yaddaşı yaşatmaq və ona yeni nəfəs vermək isə sənətə sevgi, peşəkarlıq və böyük məsuliyyət tələb edir. Milli musiqi irsimizin qorunması və gənc nəslə ötürülməsi yolunda fəaliyyət göstərən sənətkarlar həm ənənələrin daşıyıcısı, həm də bu sahənin gələcəyini formalaşdıran əsas simalardır.

Beynəlxalq Muğam Mərkəzinin nəzdində fəaliyyət göstərən Əməkdar kollektiv Səid Rüstəmov adına Xalq Çalğı Alətləri Orkestrinin bədii rəhbəri və baş dirijoru, Azərbaycan Dövlət Mədəniyyət və İncəsənət Universitetinin Baş müəllimi, respublika və beynəlxalq müsabiqələr laureatı, Prezident mükafatçısı, tarzən və dirijor Mustafa Aşurov yaradıcılıq yolu və peşəkar fəaliyyəti ilə bu missiyanı uğurla həyata keçirən sənətkarlardandır.

Mustafa Aşurov AZƏRTAC-ın müxbiri ilə söhbətində musiqi yolunun başlanğıcından, milli musiqi irsinin qorunması istiqamətində görülən işlərdən, eləcə də yubiley ili çərçivəsində planlaşdırılan konsert proqramlarından danışıb.

Mustafa Aşurov bildirib ki, musiqiyə olan həvəsi çox erkən yaşlardan formalaşıb. Uşaqlıq illərində səslərə verdiyi xüsusi reaksiyalar onun gələcək sənət yolunun ilk işartıları olub. O bildirib ki, bu yoluna atası¬nın tövsiyəsi ilə qədəm qoyub. Atası da kiçik yaşlarında beş il tar təhsili alıb və ona bu alətlə məşğul olmağı tövsiyə edib. Beləliklə, onun musiqi təhsili məhz tar aləti ilə başlayıb. Sənətkar üçün əsas məqsəd konkret bir aləti seçmək deyil, ümumilikdə musiqi ilə məşğul olmaq, bu sahəni dərindən öyrənmək olub. Tar ifaçısı kimi qazandığı uğurlar, beynəlxalq müsabiqələrdə əldə etdiyi nəticələr və dövlət tərəfindən verilən yüksək mükafatlar onun sənət yolunun mühüm mərhələlərini təşkil edir.

Mustafa Aşurov gənc yaşlarından qazandığı uğurlar nəticəsində Prezidentin müvafiq Sərəncamı ilə adı Gənc istedadların "Qızıl kitabı”na daxil edilib, Prezidentin aylıq xüsusi təqaüdünə layiq görülüb. Respublika və beynəlxalq müsabiqələrdə iştirak edərək bir sıra uğurlar qazanıb, ölkəmizə beynəlxalq müsabiqələrdə ilk qızıl medalı gətirib. Eyni zamanda Azərbaycan Milli Konservatoriyasının bakalavr pilləsində tar ixtisası üzrə ali təhsil alıb. Daha sonra magistratura pilləsində dirijorluq ixtisasına qəbul olunub. Onun sözlərinə görə, dirijorluğa marağı sırf bu peşəni icra etmək məqsədi daşımayıb: “Tar ifaçılığımı davam etdirərkən hesab edirdim ki, dirijorluq sahəsi mənim üçün olduqca vacibdir. Çünki uzun illər klassik orkestr kollektivlərinin qarşısında, görkəmli dirijorların idarəçiliyi ilə çıxış etmişəm. Bu proseslər musiqiyə daha geniş baxış bucağından yanaşmağıma şərait yaradıb. Əsas məqsədim musiqini daha dərindən öyrənmək, ona daha geniş prizmadan yanaşmaq olub", - deyə o qeyd edib.

Onun sözlərinə görə, dirijorluq təhsili zamanı əldə etdiyi orkestrləşmə və aranjeman bilikləri yaradıcılıq fəaliyyətində mühüm rol oynayıb. Məhz bu biliklər tar ifaçılığını daha peşəkar səviyyəyə yüksəltməyə, orkestr düşüncəsini dərindən anlamağa imkan verib. Nəticədə sənətkar həm Azərbaycan Dövlət Mədəniyyət və İncəsənət Universitetinin Tələbə Orkestrində, həm də Səid Rüstəmov adına Xalq Çalğı Alətləri Orkestrində dirijor kimi fəaliyyət göstərməyə başlayıb.

Mustafa Aşurov qeyd edib ki, həm şəxsi yaradıcılıq arzusu, həm də sahənin tanınmış mütəxəssislərinin tövsiyələri əsasında tar ifaçılığı ilə dirijorluğu eyni səhnədə birləşdirmək ideyası formalaşıb. Bu yanaşma əsasında hazırlanan konsert proqramlarında o, eyni zamanda həm dirijor, həm də tar ifaçısı kimi çıxış edir, orkestr isə onun üçün hazırlanan xüsusi orkestrləşmələri və aranjemanları ifa edir. Bu sintez tamaşaçılar tərəfindən böyük maraqla qarşılanır və artıq kollektivin yaradıcılıq xəttinə çevrilib.

Səid Rüstəmov adına Xalq Çalğı Alətləri Orkestrinin fəaliyyəti haqqında danışan dirijor bildirib ki, kollektiv mütəmadi olaraq solo konsert proqramları, müxtəlif yaradıcılıq layihələri və beynəlxalq tədbirlərdə çıxışlar həyata keçirir.

O vurğulayıb ki, orkestr yeniliklərə açıq olsa da, hər zaman klassik ənənələrə sadiqliyi əsas prinsip kimi qoruyur: "Konsert proqramlarında görkəmli bəstəkarların Xalq Çalğı Alətləri Orkestri üçün yazdığı klassik əsərlər xüsusi yer tutur. Yeni işləmələr və aranjemanlar hazırlanarkən alınan təhsil, toplanmış təcrübə və milli musiqi ənənələri əsas götürülür. Çünki savadlı yanaşma olmadan edilən yeniliklər musiqidə bayağılığa gətirib çıxara bilər. Bu baxımdan kollektiv klassika ilə müasir yanaşma arasında düzgün tarazlığı qorumağa çalışır.

Bu ilin orkestr üçün xüsusi əhəmiyyət daşıdığını qeyd edən sənətkar bildirib ki, 2026-cı il Səid Rüstəmov adına Xalq Çalğı Alətləri Orkestrinin 95 illik yubileyi, eyni zamanda onun 35 illik yubileyi və 25 illik musiqi fəaliyyəti ilə əlamətdardır. Belə ki, orkestrin yubileyi münasibətilə yeni konsert proqramları hazırlanır. Sözügedən proqramlar çərçivəsində həm kollektivin zəngin və özünəməxsus repertuarının genişləndirilməsi, həm də Azərbaycan musiqisinin ölkə daxilində və beynəlxalq səviyyədə təbliğinin daha da gücləndirilməsi nəzərdə tutulur.

Gənclərin musiqiyə marağı məsələsinə toxunan Mustafa Aşurov bu sahədə pedaqoji fəaliyyətin əhəmiyyətini xüsusi vurğulayıb: "Musiqi böyük zəhmət və davamlı çalışma tələb edən bir sahədir. İstedad vacibdir, amma təhsil, məşq və zəhmət olmadan davamlı uğur mümkün deyil. Gənclər yenilikdən qorxmamalıdırlar, lakin bu yenilik mütləq peşəkarlıq və möhkəm musiqi savadı üzərində qurulmalıdır”.

Son dövrlərdə onun üçün əlamətdar yaradıcılıq hadisələrindən biri də uzun illər solist-tar ifaçısı kimi çıxış etdiyi Qara Qarayev adına Dövlət Kamera Orkestrinin qarşısına bu dəfə dirijor kimi çıxması olub. Görkəmli bəstəkar Tofiq Quliyevin mahnılarından ibarət konsert proqramında orkestrin dirijorluğu və bədii rəhbərliyi ona həvalə edilib. Həmin kollektivlə birgə Qətərdə keçirilən Azərbaycan Mədəniyyəti Günlərinin qala konsertində iştirak olunub. Proqram çərçivəsində həm Dövlət Xalq Çalğı Alətləri Orkestri, həm də Dövlət Kamera Orkestri üçün yeni partituralar hazırlanaraq təqdim edilib.

Mustafa Aşurov deyir: “Əsas vəzifəmiz harada çıxış etməyimizdən asılı olmayaraq Azərbaycanı layiqincə təmsil etmək, milli irsimizi qorumaq və onu gələcək nəsillərə peşəkar şəkildə ötürməkdir”.