“Qəbələ - MDB-nin mədəniyyət paytaxtı” çərçivəsində yekun tədbir keçirilmişdir
Azərbaycanın bu şəhəri 2013-cü ildə MDB-nin mədəniyyət paytaxtı missiyasını uğurla yerinə yetirmişdir VİDEO
Qəbələ, 15 mart (AZƏRTAC). 2013-cü ildə Qəbələnin MDB-nin mədəniyyət paytaxtı elan edilməsi ilə əlaqədar rayonda keçirilən yekun tədbirlərin təntənəli bağlanış mərasimi olmuşdur.
AZƏRTAC xəbər verir ki, tədbirdə MDB ölkələrinin mədəniyyət və incəsənət xadimləri, bir sıra ölkələrin Azərbaycandakı səfirləri, rayon ictimaiyyətinin nümayəndələri və digər nüfuzlu qonaqlar iştirak etmişlər.
Tədbir iştirakçıları əvvəlcə Qəbələnin mərkəzində ulu öndər Heydər Əliyevin abidəsini ziyarət edərək önünə gül dəstələri düzmüşlər.
Tədbirin rəsmi hissəsində çıxış edən Qəbələ Rayon İcra Hakimiyyətinin başçısı Səbuhi Abdullayev bu günün rayonun həyatında əlamətdar hadisə olduğunu bildirmişdir. Qeyd etmişdir ki, 2013-cü ildə Qəbələyə “MDB-nin mədəniyyət paytaxtı” titulu Birliyə üzv dövlətlərin humanitar Əməkdaşlıq Şurasının və təşkilata üzv ölkələrin Humanitar Əməkdaşlıq üzrə Dövlətlərarası Fondunun qərarına əsasən verilmişdir. Bu müddət ərzində Qəbələdə bir sıra beynəlxalq mədəni tədbirlər keçirilmişdir. Azərbaycan dövləti və Heydər Əliyev Fondunun dəstəyi ilə hazırda Qəbələdə təşkil edilən mədəni tədbirlər nəinki MDB, hətta dünya mədəni irsinə böyük töhfədir.
Sonra Səbuhi Abdullayev “MDB-nin Mədəniyyət paytaxtı” estafetinin 2014-cü ildə bu ada layiq görülən Qazaxıstanın Almatı və Qırğızıstanın Oş şəhərinə keçdiyini bildirmişdir. İcra hakimiyyətinin başçısı Azərbaycanın Rusiyadakı səfiri, MDB ölkələrinin Humanitar Əməkdaşlıq üzrə Dövlətlərarası Fondunun İdarə Heyətinin sədri Polad Bülbüloğluna, Fondun icraçı direktoru Anatoli İksanova, Qazaxıstanın Almatı şəhərinin mədəniyyət idarəsinin rəis müavini Juldız Ömərbəyova və Qırğızıstanın mədəniyyət, informasiya və turizm naziri Sultan Rayevə diplomlar təqdim etmişdir.
Sonra çıxış edən Azərbaycanın Rusiyadakı səfiri Polad Bülbüloğlu Qəbələnin MDB-nin mədəniyyət paytaxtı missiyasını uğurla yerinə yetirməsindən qürur duyduğunu bildirmişdir. O demişdir ki, Qəbələdə yaradılan müasir infrastruktur rayonda beynəlxalq əhəmiyyətli mədəni tədbirləri ən yüksək səviyyədə keçirməyə imkan verir.
Mədəniyyət və turizm nazirinin müavini Sevda Məmmədəliyeva qədim tarixə və gözəl təbiətə malik Qəbələnin MDB-nin mədəniyyət paytaxtı kimi mühüm nailiyyətə imza atdığını bildirmişdir. Qeyd etmişdir ki, bu cür layihələr mədəni sahədə ölkələr və xalqlararası münasibətləri daha da genişləndirir. Nazir müavini onu da demişdir ki, Mədəniyyət və Turizm Nazirliyinin qərarı ilə Qəbələ 2014-cü ildə “Azərbaycanın əfsanələr paytaxtı” elan olunmuşdur.
Tədbirin rəsmi hissəsindən sonra maraqlı konsert proqramı təqdim edilmişdir. Konsertdə “XXI əsrin tenorları” art-layihəsi üzvlərinin bir-birindən maraqlı ifaları tədbir iştirakçılarının əhval-ruhiyyəsini daha da artırmışdır.
Sonda “Qorxma, mən səninləyəm! 1919” bədii filminin nümayişi olmuşdur. Cəfər Cabbarlı adına “Azərbaycanfilm” Kinostudiyası və Rusiyanın “Vayt Media” kino şirkətinin birgə istehsalı olan filmin çəkilişləri ölkəmizin 6 rayonunda aparılmışdır. Ötən əsrin 80-ci illərində çəkilmiş “Qorxma, mən səninləyəm” bədii filminin davamı kimi ekranlaşdırılan yeni ekran əsərində tanınmış azərbaycanlı və rusiyalı aktyorlar çəkilmişlər.
Filmin ssenari müəllifi və rejissoru Rusiyanın Xalq Artisti Yuli Qusman və əsas rollardan birinin ifaçısı Polad Bülbüloğlu kino əsərinin yaranma tarixindən danışmışlar. Onlar filmin ərsəyə gəlməsində Azərbaycan dövlətinin başçısı İlham Əliyevin və Heydər Əliyev Fondunun prezidenti Mehriban Əliyevanın böyük dəstəyindən bəhs etmişlər. Polad Bülbüloğlunun bir neçə sevimli mahnını ifa etməsi isə tədbir iştirakçılarının bayram əhval-ruhiyyəsini daha da artırmışdır.
Sonra film nümayiş etdirilmişdir.
Beləliklə, Qəbələnin ötən il MDB-nin mədəniyyət paytaxtı elan edilməsi ilə əlaqədar rayonda keçirilən yekun tədbirlər bir daha sübut etmişdir ki, Azərbaycanın dilbər guşələrindən biri olan bu rayon “MDB-nin mədəniyyət paytaxtı” kimi mühüm titulu layiqincə daşımışdır.
Bölmənin digər xəbərləri
