Bakı, 8 may (AZƏRTAC, Elvin Mövsümov). Mayın 8-də Gənclər və İdman Nazirliyi yanında Gənclərlə iş üzrə İctimai Şuranın ulu öndər Heydər Əliyevin anadan olmasının 91-ci ildönümünə həsr edilmiş növbəti iclası keçirilmişdir.

AZƏRTAC xəbər verir ki, tədbirdə ulu öndər Heydər Əliyevin xatirəsi bir dəqiqəlik sükutla yad edilmişdir.

“Heydər Əliyev və Azərbaycan gəncliyi” mövzusuna həsr olunmuş iclasda çıxış edən gənclər və idman naziri Azad Rəhimov qeyd etmişdir ki, Şuranın bu iclası daha əlamətdardır. Çünki bu tədbir ümummilli lider Heydər Əliyevin anadan olmasının 91-ci ildönümü ilə eyni vaxta təsadüf edir. Nazir dahi rəhbər Heydər Əliyevin gənclərə daim diqqət göstərdiyini, onların problemlərinin həlli üçün mühüm işlər gördüyünü demişdir.

A.Rəhimov Ulu Öndərin müəllifi olduğu dövlət gənclər siyasətinin bu gün Prezident İlham Əliyev tərəfindən uğurla davam etdirildiyini vurğulamışdır. 2016-cı ildə Gəncənin “Avropanın gənclər paytaxtı” seçilməsinin Azərbaycanda aparılan gənclər siyasətinin beynəlxalq səviyyədə tanınmasının nəticəsi olduğunu deyən nazir dövlətimizin başçısı İlham Əliyevin rəhbərliyi ilə ölkədə gənclərə göstərilən diqqətdən danışmışdır. Bildirilmişdir ki, on il əvvəl Azərbaycanda 51 gənclər təşkilatı var idisə, bu gün onların sayı 250-ni keçmişdir. Prezident İlham Əliyev gənclərin dövlət quruculuğunda fəal iştirakını zəruri sayır. Bu da gənclərə diqqətin daha da artacağından xəbər verir. Nazir bu baxımdan 2014-cü il gənclər üçün Prezident mükafatlarının verilməsi haqqında dövlətimizin başçısının Sərəncamının əhəmiyyətini yüksək qiymətləndirmişdir.

Gənclər və İdman Nazirliyi yanında Gənclərlə iş üzrə İctimai Şuranın sədri Nurəddin Mehdiyev 1994-cü ildən etibarən fəaliyyət göstərən Şuranın əsas məqsədinin dövlət gənclər siyasətinin həyata keçirilməsi ilə bağlı qərarların qəbulu prosesində gənclərin qeyri-hökumət təşkilatlarının (ictimai birliklər və fondlar) iştirakını təmin etmək olduğunu bildirmişdir.

Xalqımızın ulu öndəri Heydər Əliyevin ölkəmizdə dövlət gənclər siyasətinin əsasını qoyduğunu diqqətə çatdıran N.Mehdiyev Azərbaycan Gəncləri Gününün təsis edilməsini dahi rəhbərin gənclərimizə hədiyyəsi olduğunu diqqətə çatdırmışdır. O, Azərbaycan gəncliyinin bu gün Prezident İlham Əliyevin rəhbərliyi ilə həyata keçirilən dövlət gənclər siyasətinin əsas hədəflərindən biri olduğunu diqqətə çatdırmışdır. Azərbaycan gəncliyi hər zaman olduğu kimi, bu gün də bu siyasəti dəstəkləyir.

“Böyük İpək Yolu” Beynəlxalq Gənclər İttifaqının sədri, Milli Məclisin deputatı Fuad Muradov bildirmişdir ki, Azərbaycan gəncliyi bütün istiqamətlərdə, o cümlədən sosial-iqtisadi sahədə layihələrin həyata keçirilməsində fəal rol oynayır. Çünki Azərbaycan gənclər ölkəsidir. Bu siyasətin təməlini ulu öndər Heydər Əliyev qoymuşdur. O, ulu öndər Heydər Əliyevin gənclərin bilikli, savadlı və intellektual səviyyədə yetişməsi üçün gördüyü işlərdən danışmışdır. F.Muradov gənclərimizin bundan sonra da onlara göstərilən yüksək etimadı doğruldacaqlarını bildirmişdir.

Yeni Azərbaycan Partiyası Gənclər Birliyinin sədri Seymur Orucov çıxışında Azərbaycan gəncliyinin bu gün ölkəmizin haqlı mövqeyini dünyada cəsarətlə dəstəklədiyini vurğulamışdır. O qeyd etmişdir ki, bu gün Azərbaycan gənclərinin səsi dünyanın aparıcı elm mərkəzləri, universitetləri, nüfuzlu təşkilatlarından gəlir. Bu, ulu öndər Heydər Əliyevin əsasını qoyduğu uzaqgörən siyasətin Prezident İlham Əliyev tərəfindən uğurla davam etdirilməsinin nəticəsidir.

Azərbaycan Tələbə Gənclər Təşkilatları İttifaqının sədri Şahin İsmayılov ümummilli lider Heydər Əliyevin Azərbaycan gəncliyinin inkişafı ilə bağlı müstəsna xidmətlərindən danışmışdır. Qeyd etmişdir ki, ulu öndər Heydər Əliyev hakimiyyətdə olduğu bütün dövrlərdə gənclərə xüsusi diqqət göstərmiş, onların sosial problemlərinin həlli istiqamətində tarixi işlər görmüşdür. O bildirmişdir ki, əsası ulu öndər Heydər Əliyev tərəfindən qoyulan gənclər siyasətinin Prezident İlham Əliyev tərəfindən uğurla davam etdirilməsinin nəticəsində bu gün gənclərimiz dünyanın nüfuzlu ali təhsil ocaqlarında təhsil alırlar.

Azərbaycan Respublikası Gənclər Təşkilatları Milli Şurasının baş katibi Seymur Hüseynov demişdir ki, gənclərimiz gündən-günə ölkəmizin ictimai-siyasi həyatında daha fəal rol oynayırlar. O, ölkəmizdə gənclər təşkilatlarının uğurla fəaliyyət göstərməsinin Azərbaycan gəncliyinə dövlət dəstəyi nəticəsində mümkün olduğunu vurğulamışdır.

Azərbaycan Gənclərinin Avropaya İnteqrasiyası Təşkilatının sədri Gülsel Səfərova ümummilli lider Heydər Əliyevin siyasi hakimiyyətə gəldiyi ilk illərdən gənclərə xüsusi diqqət göstərdiyini vurğulamışdır. Ulu öndər Heydər Əliyevin hakimiyyətə qayıdışından sonra Azərbaycanın Avropaya fəal inteqrasiya siyasətini həyata keçirməyə başladığını deyən G.Səfərova bu istiqamətdə gənclərə geniş şərait yaradıldığını bildirmişdir. O vurğulamışdır ki, məhz bu siyasətin nəticəsində Azərbaycan gəncləri ölkəmizin Avropaya inteqrasiyasına mühüm töhfə verirlər.

İclasa yekun vuran Prezident Administrasiyasının ictimai-siyasi məsələlər şöbəsinin müdiri Əli Həsənov bu gün Azərbaycan cəmiyyətinin ən avanqard hissəsi olan gənclərin ulu öndər Heydər Əliyevin anadan olmasının 91-ci ildönümünü geniş qeyd etdiklərini diqqətə çatdırmışdır.

Bildirilmişdir ki, bu, təsadüfi deyildir. Çünki ölkəmizdə digər sahələr kimi, dövlət gənclər siyasətinin də təməlini xalqımızın ümummilli lideri Heydər Əliyev qoymuşdur.

Müstəqilliyimizin ilk illərində ölkə həyatının bütün sahələri kimi, Azərbaycan gəncliyinin də ağır sosial-iqtisadi böhrana məruz qaldığını vurğulayan Əli Həsənov məhz bu dövrdə bəzi qüvvələr tərəfindən gənclərimizin silahlandırılaraq hakimiyyət uğrunda mübarizəyə cəlb olunduğunu demişdir. Ümummilli lider Heydər Əliyev hakimiyyətə qayıtdıqdan sonra 1994-cü ildə Gənclər və İdman Nazirliyini yaratmış və bununla da gəncliyi birbaşa dövlət siyasətinin hədəfinə çevirmişdir. Ulu Öndərin təşəbbüsü ilə Azərbaycan gəncləri ilə bağlı mühüm tədbirlərin həyata keçirildiyini diqqətə çatdıran Əli Həsənov demişdir ki, bunun nəticəsində biz bu gün Azərbaycan dövlətinin bütün sahələrində sağlam, rəqabətə davamlı gəncliyi görürük. Azərbaycan gənclər siyasətinin təməlində ümummilli lider Heydər Əliyevin ideyaları dayanır. Bu gün Azərbaycan gəncliyi haqlı olaraq öz Ümummilli Lideri ilə qürur duyur, onun ideyalarının daşıyıcıları qismində bütün imkanlarını səfərbər edir və Heydər Əliyevin dövlətçilik və azərbaycançılıq ideyalarını yaşadır, həyata keçirir.

Prezident Administrasiyasının şöbə müdiri demişdir ki, dövlətimizin başçısı İlham Əliyev hakimiyyətə gələndən sonra Azərbaycanda gənclər siyasətinə diqqət daha da artırılmışdır. Çünki Prezident İlham Əliyevin özü də dövlət siyasətinə məhz gənclik sırasından daxil olmuşdur.

Azərbaycan Prezidenti İlham Əliyevin hakimiyyəti dövründə gənclər məsələsinin ölkəmizdə həyata keçirilən bütün dövlət proqramlarında diqqət mərkəzində saxlandığını vurğulayan Əli Həsənov “Azərbaycan gəncliyi 2011-2015-ci illərdə Dövlət Proqramı”nı, “Azərbaycan gənclərinin xarici ölkələrdə təhsili üzrə Dövlət Proqramını (2007-2015-ci illər)”, Azərbaycan Respublikasının Prezidenti yanında Gənclər Fondunun yaradılmasını və bu qəbildən digər tədbirlərin əhəmiyyətini yüksək qiymətləndirmişdir. Bölgələrdə gənclər evlərinin açılmasının Azərbaycan dövlətinin gənclərlə bağlı siyasətinin reallaşmasını və onların bütün sahələrdə idarəçiliyə, istehsalata, sosial sahələrə cəlb olunmasını şərtləndirdiyini bildirən Əli Həsənov dövlətimizin başçısının ölkəmizdə bütün sahələr üzrə ən çox fərqlənən, nailiyyətlər əldə edən gənclər üçün mükafatların verilməsi barədə Sərəncamını diqqətə çatdırmışdır.

Azərbaycan dövlətinin gənclərlə bağlı siyasətindən danışan Prezident Administrasiyasının şöbə müdiri gənclərin milli mənəvi dəyərlər ruhunda yetişməsi, istedadlı gənclərə xüsusi qayğının göstərilməsi, gənclərin sağlamlığının qorunması, məşğulluqlarının təmin edilməsi, gənc ailələrə və gənclər təşkilatlarına dövlət dəstəyinin artırılmasını bu siyasətin əsas istiqamətlərindən olduğunu diqqətə çatdırmışdır.

Ölkəmizdə gənclər siyasətinin təməlində real işlərin dayandığını bildirən Əli Həsənov Azərbaycan gəncliyinin böyük ümidlər verdiyini, gələcək nəsillərin formalaşmasının uğurla getdiyini vurğulamışdır. O demişdir ki, biz bu gün gələcəkdə hakimiyyətdə bizi əvəzləyəcək yeni nəslin formalaşmasından razıyıq və bu prosesə bütün sahələrdə ciddi diqqət yetirilir.