Ümummilli lider Heydər Əliyevin anadan olmasının 91-ci ildönümü Buxarestdə geniş qeyd olunmuşdur VİDEO
Bakı, 10 may (AZƏRTAC). Mayın 9-da Rumıniyanın paytaxtı Buxarest şəhərinin mərkəzində yerləşən Heydər Əliyev Xiyabanında
Azərbaycan xalqının Ümummilli Liderinin anadan olmasının 91-ci ildönümü ilə əlaqədar geniş tədbir keçirilmişdir.
Mərasimdə Azərbaycanın Rumıniyadakı səfirliyinin, Heydər Əliyev Fondunun və Azərbaycan Respublikası Dövlət Neft Şirkətinin nümayəndəliklərinin əməkdaşları, Rumıniya-Azərbaycan Dostluq Cəmiyyətinin, Rumıniya-Azərbaycan Sənaye və Ticarət Palatasının, Rumıniya-Azərbaycan Mədəniyyət və Gənclər Assosiasiyası idarə heyətinin üzvləri, türk-tatar icmasının təmsilçiləri, Heydər Əliyev adına təqaüdə layiq görülmüş tələbələr, bu ölkədə yaşayan və təhsil alan azərbaycanlılar iştirak etmişlər.
Tədbir iştirakçıları ulu öndər Heydər Əliyevin Buxarest şəhərindəki büstü önünə əklil qoymuş, xatirəsini ehtiramla yad etmişlər.
Azərbaycanın Rumıniyadakı səfirliyinin nümayəndəsi Tehran Şükürov mərasimdə çıxış edərək dövlətçiliyimizin möhkəmləndirilməsində, ölkəmizdə sabitliyin bərqərar edilməsində, iqtisadi-sosial inkişafın təmin olunmasında, demokratik-hüquqi dövlətin və vətəndaş cəmiyyətinin qurulmasında və inkişafında, respublikamızın regionda və dünyada mövqelərinin güclənməsində Heydər Əliyevin əvəzolunmaz xidmətlərindən bəhs etmiş, bu siyasətin hazırda uğurla və qətiyyətlə davam etdirildiyini diqqətə çatdırmışdır. Sonra tədbir iştirakçıları Heydər Əliyev Fondunun Rumıniya nümayəndəliyini ziyarət etmişlər. Nümayəndəliyin direktoru İqbal Hacıyev Azərbaycan xalqının ümummilli lideri Heydər Əliyevin həyat və fəaliyyətindən, müstəqilliyimizin möhkəmlənməsində, ölkəmizdə demokratik, hüquqi, dünyəvi dövlət quruculuğunda, sabitliyin bərqərar olunmasındakı xidmətlərindən bəhs etmişdir. Həmçinin Heydər Əliyevin adını daşıyan Fondun çoxşaxəli humanitar xeyriyyəçilik fəaliyyətindən danışmışdır. Humanizm idealları əsasında fəaliyyət göstərən Heydər Əliyev Fondunun 10 il ərzində həyata keçirdiyi layihələrdən bəhs edən İ.Hacıyev demişdir ki, Fond daim ehtiyacı olanlara yardım edir, qayğı göstərir. Fond Ermənistan-Azərbaycan, Dağlıq Qarabağ münaqişəsi ilə bağlı həqiqətlərin dünya parlamentlərinə, beynəlxalq ictimaiyyətə çatdırılması istiqamətində də məqsədyönlü iş aparır. Xarici ölkələrdə tədbirlər, sərgilər keçirir, müxtəlif dillərdə buklet və kitablar nəşr etdirir.
Tədbirdə çıxış edən səfir Fərid Abdinbəyov müstəqil Azərbaycanda demokratik, hüquqi dövlət və vətəndaş cəmiyyətinin yaradılması, dinamik iqtisadi-sosial inkişafın təmin olunması, regionda və beynəlxalq aləmdə ölkəmizin mövqelərinin möhkəmləndirilməsi, dünyəvi dəyərlərə inteqrasiya istiqamətində Ümummilli Liderin həyata keçirdiyi siyasətin nəticələrindən bəhs etmiş, dahi şəxsiyyətin siyasi kursunun bu gün Prezident İlham Əliyev tərəfindən uğurla və qətiyyətlə davam etdirildiyini diqqətə çatdırmışdır.
Diplomat vurğulamışdır ki, bu il eyni zamanda bir sıra layihələri uğurla gerçəkləşdirən, mühüm xeyriyyəçilik fəaliyyəti və cəmiyyətə layiqli xidmətləri ilə seçilən Heydər Əliyev Fondunun yaradılmasının 10 ili tamam olur.
Bildirilmişdir ki, Ulu Öndərin zəngin dövlətçilik irsinin öyrənmək və təbliğ etmək, xalqın rifahının yüksəldilməsinə yönəlmiş faydalı təşəbbüsləri dəstəkləmək, elm, təhsil, mədəniyyət, incəsənət, səhiyyə və idmanın inkişafını təmin edən layihələrə yardımçı olmaq, milli mənəvi dəyərlərə sadiq gənclərin yetişdirilməsinə çalışmaq, respublikamızın nüfuzunu artırmaq kimi strateji əhəmiyyətli vəzifələri yerinə yetirmək Heydər Əliyev Fondunun əsas məqsədlərindəndir. Fond Ümummilli Liderin ideyalarından çıxış edərək ictimai həyatın müxtəlif sahələrində fundamental layihələr həyata keçirir, hər bir vətəndaşın zəruri istək və arzularının gerçəkləşməsinə, problemlərinin həllinə maddi-mənəvi dəstək verir.
Sonra tədbir iştirakçıları Heydər Əliyev Fondunun Rumıniya nümayəndəliyində təşkil olunan fotosərgi ilə tanış olmuş, AZƏRTAC-ın multimedia və videoxəbər şöbəsi tərəfindən hazırlanmış “Hər bir azərbaycanlının taleyində Heydər Əliyev dühasının bir zərrəsi var” sənədli filminə baxmışlar.
Bölmənin digər xəbərləri
