Sloveniyada 28 May - Respublika Günü münasibətilə silsilə tədbirlər keçirilmişdir VİDEO
Lyublyana, 17 may (AZƏRTAC). Mayın 15-16-da Sloveniyada 28 May - Respublika Günü ilə əlaqədar silsilə tədbirlər keçirilmişdir.
Sloveniyanın paytaxtı Lyublyana şəhərində yerləşən Mons otelində Azərbaycan Xalq Cümhuriyyətinin yaranmasının 96-cı ildönümü münasibətilə qəbul təşkil olunmuşdur. Qəbulda Sloveniyanın dövlət və hökumət rəsmiləri, Lyublyana şəhərinin meri Oğuz Rayon İcra Hakimiyyətinin başçısı, Azərbaycan Silahlı Qüvvələrinin Sloveniyadakı hərbi nümayəndəsi, Azərbaycan Respublikası Dövlət Neft Şirkətinin (ARDNŞ) Avstriyadakı nümayəndəliyinin rəhbərliyi, bu ölkədə akkreditə olunmuş diplomatik korpusun nümayəndələri, eləcə də işgüzar dairələrin təmsilçiləri iştirak etmişlər.
Azərbaycanın Avstriyada, eyni zamanda Sloveniyadakı səfiri Qalib İsrafilov çıxış edərək ölkəmizin ötən əsrin əvvəllərində müstəqillik uğrunda mübarizəsindən, 1991-ci ildə müstəqilliyin bərpasından sonra respublikamızda gedən proseslərdən və əldə olunmuş uğurlardan danışmışdır.
Tədbirin bədii hissəsində gənc musiqiçi Çingiz Mustafayev tarda Rizvan Əliyevin müşayiəti ilə Azərbaycan və dünya musiqiçilərinin mahnılarını səsləndirmişdir.
Sonra ziyafət verilmişdir.
X X X
Mayın 16-da Nova Qoritsa şəhərinə səfər edən Azərbaycan nümayəndə heyəti şəhər merinin müavini Mitya Trtnik ilə görüşmüşdür. Görüşdə Azərbaycan ilə Sloveniya arasında əlaqələrin inkişaf etdiyi qeyd edilmiş, münasibətlərin genişlənməsində şəhər meriyasının və bu regiondakı əhalinin rolu xüsusi vurğulanmışdır. Sloven torpaqlarının faşistlərdən azad olunmasında Azərbaycanın igid oğullarının göstərdikləri şücaət qeyd edilmiş və onların əziz xatirəsinin qəlblərdə daim yaşayacağı bildirilmişdir.
Nova Qoritsa regionuna səfər çərçivəsində Azərbaycan nümayəndə heyəti mayın 16-da Trnova qəsəbəsindəki Xatirə parkında yerləşən memorial abidəni ziyarət etmişdir. Abidənin önünə Azərbaycan hökuməti və ARDNŞ adından əklil qoyulmuşdur.
Bildirilmişdir ki, buradakı qardaşlıq qəbiristanlığında uyuyan və adları arxiv sənədləri əsasında yeni tapılmış 22 Azərbaycan oğlunun adı yeni xatirə lövhəsinə həkk olunmuş, onların məzarları yenidən qurulmuşdur.
Burada keçirilmiş mərasimdə səfir Qalib İsrafilov çıxış etmiş və fəxrlə bildirmişdir ki, Azərbaycan igidləri bu torpaqların azad olunmasında şücaət göstərmiş və qəhrəmanlıqla həlak olmuşlar.
ARDNŞ-in Avstriyadakı nümayəndəliyinin direktoru Gülmirzə Cavadov çıxışında Sloveniya torpaqlarında uyuyan Azərbaycan oğullarının xatirəsinin əbədiləşdirilməsi üçün görülən işləri dəstəkləməyə hazır olduqlarını bildirmişdir.
Döyüşçülər və Veteranlar Şurasının vitse-prezidenti Rino Velikonya çıxışında Primorska və Nova Qoritsa regionlarının tarixən slavyan və roman dilli xalqların ortaq əraziləri olduğunu, tarix boyunca bu ərazilərdə bir çox xalqların nümayəndələrinin məskən saldığını, işğalçı kimi bu torpaqlara qədəm basdıqlarını bildirmişdir. O demişdir ki, azərbaycanlılar bu torpaqların azad olunması və sloven xalqının əsarətdən qurtulması üçün misilsiz xidmətlər göstərmişlər. Azərbaycanlıların bu torpaqlarda göstərdikləri igidlik heç zaman unudulmayacaqdır. Sloven torpaqlarının faşistlərdən təmizlənməsində xüsusi igidlik göstərmiş azərbaycanlılar sloven xalqının qəhrəmanlarıdır və onların xatirəsi gələcək nəsillər tərəfindən də əziz tutulacaqdır.
Sonra nümayəndə heyəti Azərbaycanın igid oğlu, Sovet İttifaqı Qəhrəmanı, sloven xalqının alman faşizminə qarşı partizan mübarizəsinin qəhrəmanı Mehdi Hüseynzadənin Çepovan kəndindəki məzarı və memorial abidə kompleksini ziyarət etmiş, abidə önünə əklil qoymuşdur.
Mərasimdə Mehdi Hüseynzadənin silahdaşları, müqavimət hərəkatında iştirak etmiş keçmiş partizanlar və yerli ictimaiyyətin nümayəndələri də iştirak etmişlər.
Sloveniyanın imamı Necat Qrabus qəbiristanlıqda uyuyan müsəlmanların ruhuna dua oxumuşdur.
Sonra Şempas qəsəbəsində M.Hüseynzadənin abidəsi və xatirə muzeyi ziyarət edilmiş, abidə önünə hökumət və ARDNŞ adından əklillər qoyulmuşdur. Vaxtilə partizan Mixaylonun istifadə etdiyi və Balkanlarda tanınmış silah kolleksioneri Zmaqo Yelinçiçin şəxsi kolleksiyasından əldə olunmuş alman istehsalı olan 9 millimetrlik kalibrli avtomat silahı (ERMA M40) xatirə muzeyinə hədiyyə edilmişdir.
Muzey rəhbərliyi təhlükəsizlik sisteminin yenidən qurulması və muzeylə bağlı digər işlərin görülməsində azərbaycanlı iş adamı Artur Abdinovun dəstəyini minnətdarlıqla qeyd etmişdir.
ARDNŞ-in nümayəndə heyəti Mixaylonun ən yaxın silahdaşı və müavini olmuş “Tolya” ləqəbli Tağı Əliyevin Rençe qəsəbəsindəki məzarını ziyarət etmiş, memorial kompleks önünə əklil qoymuşdur. Nova Qoritsa regional kitabxanasının direktoru olmuş Rayko Slokar və Nova Qoritsa regionu üzrə Tarixi Məzarlıqlar və Abidələr Komissiyasının rəhbəri İvan Trop bu məzarlıqda və ətraf ərazilərdəki digər məzarlıqlarda uyuyan azərbaycanlı döyüşçülər barədə danışmış, onların xatirəsinin əbədiləşdirilməsi istiqamətində səylə çalışacaqlarını bildirmişlər. Memorial kompleksin yenidən qurulmasında və ümumiyyətlə bu işlərdə göstərdiyi dəstəyə görə ARDNŞ-in nümayəndəliyinə təşəkkür edilmişdir.
Azərbaycan səfirliyinin “Azərbaycan döyüşçülərinin qəhrəmanlıq yolu ilə” adlı proqramı çərçivəsində Sloveniya və İtaliyanın şimal bölgələrində döyüşmüş azərbaycanlılar haqqında məlumatlar və onların uyuduqları məzarlar tapılaraq bərpa olunur. Eyni zamanda, yerli əhali arasında onların əziz xatirəsinin əbədiləşdirilməsi üçün müvafiq tədbirlər görülür.
Tədbir musiqi proqramı ilə başa çatmışdır.
Elgün Niftəliyev
AZƏRTAC-ın xüsusi müxbiri
Lyublyana/Nova Qoritsa
Bölmənin digər xəbərləri
