6 APREL
1453-cü il. Osmanlı imperatoru Sultan II Mehmet Bizans imperiyasının paytaxtı Konstantinopolu mühasirəyə alıb. 53 gün sürən mühasirədən sonra 1453-cü il mayın 29-da Konstantinopol fəth edilib və İstanbul adlandırılaraq Osmanlı imperiyasının paytaxtı elan olunub.
1814-cü il. Fransa imperatoru Napoleon Bonapart (I Napoleon) taxt-tacdan əl çəkməsi barədə qərara imza atıb. Fransa ilə müharibə edən müttəfiq ölkələrin birgə qərarına əsasən, Napoleon Aralıq dənizindəki Elba adasına sürgünə göndərilib.
1896-cı il. Afinada I Yay Olimpiya Oyunlarına start verilib. Aprelin 15-dək davam edən yarışları I Beynəlxalq Olimpiya Oyunları adlandırılıb. On dörd ölkədən 241 idmançının qatıldığı yarışlar idmanın doqquz növü üzrə keçirilib.
1917-ci il. Amerika Birləşmiş Ştatları Almaniya imperiyasına müharibə elan edərək Birinci Dünya müharibəsinə qoşulub. Bundan sonra müttəfiqlər müharibədə aşkar üstünlük əldə ediblər.
1920-ci il. Türkiyə Respublikasının rəsmi informasiya agentliyi - Anadolu Ajansı yaradılıb.
1995-ci il. Azərbaycan Respublikası Panama ilə diplomatik əlaqələr qurub.
