Gülnarə Səfərova: Azərbaycan musiqisinin təbliği xaricdə yaşayan soydaşlarımızın ən mühüm missiyasıdır
Bakı, 20 avqust, AZƏRTAC
Bu ilin yayında Tokioda “Zaman və məkanın fövqündə klassik musiqi. Azərbaycandan dünyaya” (“Classical Music Beyond Time and Space from Azerbaijan to the World”) adlı böyük konsert keçirilib. Konsertdə Azərbaycan, Yaponiya və Avropa bəstəkarlarının əsərləri təqdim olunub. Konsertin təşkilatçısı, proqram tərtibçisi, həmçinin gecənin solisti Azərbaycan pianoçusu Gülnarə Səfərova olub. O, AZƏRTAC-ın müxbiri ilə söhbətində keçirilən tədbir barədə danışıb.
“Konsertdə 600-dən çox tamaşaçı iştirak edirdi. Onların əksəriyyəti yaponlar, eləcə də Yaponiyada yaşayan əcnəbilər və diplomatik korpusun nümayəndələri idi. Konsertə əsas dəstəyi Azərbaycanın Diasporla İş üzrə Dövlət Komitəsi göstərdi və buna görə onlara səmimi təşəkkürümü bildirirəm. Konsertin reklamına Yaponiyadakı Azərbaycan səfirliyi, Zama şəhərinin Beynəlxalq Mədəni Əlaqələr Assosiasiyası, “ZEN-ON” not nəşriyyatı, həmçinin Yaponiyanın ən böyük musiqi şirkətlərindən biri olan “Kawai” kömək etdi. Bundan başqa, hər il konsertlərimizə gələn klassik musiqi həvəskarları da həmişə olduğu kimi bizə dəstək oldular”, - deyə G.Səfərova bildirib.
Tədbirdə dirijor Kenta Minovun idarə etdiyi kamera ansamblı ilə yanaşı, Yaponiyada Azərbaycanın uşaqlar üçün yazılmış fortepiano əsərlərini ifa edən ilk pianoçu — bir neçə beynəlxalq müsabiqənin laureatı iştirak edib. Gülnarə Səfərova ilə yanaşı, konsertin solistləri Brüssel Konservatoriyasının məzunu olan yapon pianoçu Kosuke Nara və Milan Konservatoriyasında təcrübə keçən vokalçı Taişö Kato olub.
Həmsöhbətimizin sözlərinə görə, konsert proqramı üç hissədən ibarət olub: “Birinci hissədə diskimdə yer alan əsərləri ifa etdik. Bu, Asiyada Azərbaycan bəstəkarı Qara Qarayevin musiqilərindən ibarət ilk diskdir və Diasporla İş üzrə Dövlət Komitəsinin dəstəyi ilə nəşr olunub. Layihənin təşkilati, yaradıcı və ifaçılıq işlərini üzərimə götürmüşdüm. Çox çətin, böyük mənəvi və fiziki səylər tələb edən bir proses olsa da, sonda uğurlu bir iş ərsəyə gəldi. Diskdə bəstəkarın yalnız fortepiano əsərləri deyil, həmçinin kvartetləri, skripka və digər kompozisiyaları da yer alıb”.
Konsertin ikinci hissəsi Qərbi və Şərqi Avropa klassik musiqisinə həsr olunmuşdu. Bu hissədə Şopen, Raxmaninov, Franse və Tostinin əsərləri səsləndirildi.
Nəhayət, üçüncü hissədə Azərbaycan musiqisinə qayıtdıq və onu yapon bəstəkarları Rentaro Taki, Kozaburo Hiray, Yasuhiro Kasamatsu və digər bəstəkarların görkəmli əsərləri ilə birləşdirdik. Bu hissədə əsasən vokal musiqi təqdim olundu. Burada Fərhad Bədəlbəylinin “Ave Mariya” əsəri səsləndirildi, həmçinin Fikrət Əmirovun “Gülüm” mahnısı ilk dəfə ifa edildi. Konsertdə xor kapellası da iştirak etdi və möhtəşəm çıxış etdi”.
G.Səfərovanın sözlərinə görə, tamaşaçılar konsertdən çox razı qalıblar.
“Konsertdən sonra tamaşaçıların doldurduqları anketlərdə çoxlu təbrik və xoş sözlər yer almışdı. İfaçılardan tutmuş aparıcıya və komandamızın köməkçilərinə qədər konsertin bütün iştirakçıları birlikdə böyük, möhtəşəm musiqi bayramı yaratdıq.
Konsert günü, həmçinin foyedə Yaponiyada həyata keçirdiyimiz və hazırda da davam etdirdiyimiz musiqi fəaliyyətimizi əks etdirən kiçik fotosərgi təqdim etdik. Bura bütün konsertlərimiz, xeyriyyəçilik fəaliyyətimiz və digər işlərimiz daxil idi. Fotosərgimizin əsasını Yaponiyada Azərbaycan musiqisini təbliğ edən layihələrimiz təşkil edirdi.
Qeyd etmək istərdim ki, çoxəsrlik milli mədəniyyətimizin tərkib hissəsi olan Azərbaycan musiqisinin təbliği xaricdə yaşayan soydaşlarımızın ən mühüm missiyasıdır. Əlbəttə, hər hansı yeni işə başlamaq həmişə çətindir, xüsusilə də Yaponiya kimi bir ölkədə. Çünki yaxın vaxtlara qədər burada ölkəmiz və mədəniyyətimiz haqqında çox az məlumat var idi. Lakin sevinirəm ki, yapon musiqiçilərinin, Yaponiyanın aparıcı not və kitab nəşriyyatlarının, klassik musiqinin çoxsaylı pərəstişkarlarının və daimi tamaşaçılarımızın simasında böyük dəstəyimiz var”, – deyə həmsöhbətimiz vurğulayıb.
Qeyd edək ki, Gülnarə Səfərova 2025-ci ilin yanvarında Yaponiyada Azərbaycan musiqisinin təbliğinə verdiyi töhfəyə görə Azərbaycan Respublikasının Diasporla İş üzrə Dövlət Komitəsi tərəfindən medalla təltif olunub.
Müəllif – Anara Axundova
Bölmənin digər xəbərləri
