Bu il Almaniyada yüksək temperaturla əlaqəli ölüm hallarının sayı 14 mini ötüb
Bu ilin əvvəlindən Almaniyada yüksək temperaturla əlaqəli ölüm hallarının sayı 14 mini ötüb.
AZƏRTAC xəbər verir ki, Almaniyanın Robert Kox İnstitutunun məlumatına görə, avqustun 9-dək ölkədə istilərlə əlaqəli ən azı 14 min ölüm halı qeydə alınıb. Bu, indiyədək qeydə alınmış ən yüksək illik göstəricidir.
Ən yüksək göstəricilər 2018-ci və 2019-cu illərdə qeydə alınıb və bu illərində hər biri üzrə ildə təxminən 7 min və ya daha çox insanın istilərlə əlaqəli səbəblərdən öldüyü təxmin edilir. 2020-ci, eləcə də 2022-2024-cü illərdə istidən ölüm hallarının sayı hər il təxminən 3 min və ya daha çox olub. 2016-cı, 2017-ci və 2021-ci illərdə isə bu göstərici təxminən 1200-2000 arasında dəyişib.
İnstitutun məlumatına görə, isti havanın təsirinə, xüsusilə yaşlı insanlar məruz qalırlar. Bu il istilərlə əlaqəli ölümlərin təxminən 10,5 mini 75 və daha yuxarı yaşda olan insanların payına düşür. Ölümlərin təxminən 9,6 mini iyunun 22-dən 28-dək davam edən və Almaniyanın bir çox bölgəsində temperaturun 40 dərəcədən yuxarı olduğu isti həftədə baş verib.
Qeyd edək ki, Avropa İttifaqının “Kopernik” İqlim Dəyişikliyi Xidmətinin məlumatına görə, 2026-cı ilin iyun ayı Qərbi Avropada istilərin müşahidəsinin aparılmasına başlanmasından indiyədək qeydə alınan ən isti iyun olub.
Elvin Mövsüm
Bölmənin digər xəbərləri
