Gəncə avtomobil zavodunun direktoru: Gəncədə istehsal olunan “KamAZ” avtomobilləri xarici bazarlara da çıxarılacaq
Gəncə, 16 aprel, Sabir Əliyev, AZƏRTAC
Ölkəmizin nəhəng avtomobil istehsalçısı olan Gəncə avtomobil zavodu, sözün əsl mənasında, özünün inkişaf dövrünü yaşayır. Dövlətimizin başçısının diqqət və qayğısı sayəsində müəssisə bu gün nəinki respublikamızın, eləcə də regionun nəhəng avtomobil istehsalçısına çevrilib.10 il əvvəl bu müəssisənin qısa vaxt ərzində yüksək keçidli, ağır tonnajlı avtomobillər istehsal edəcəyini söyləyəndə, çoxları təəccübünü gizlətmirdi.Ancaq indi zavod artıq “KamAZ” istehsalına da başlayıb.Rusiyanın “KamAZ” Açıq Səhmdar Cəmiyyəti (ASC) ilə bağlanan uzunmüddətli müqaviləyə əsasən Gəncə zavodunda yığıma başlanılan ilk avtomobil aprelin 14-də konveyerdən yüksək keyfiyyətlə çıxıb.
AZƏRTAC zavodun direktoru Kamran Nəzərovla müsahibəni təqdim edir:
-Kamran müəllim, yeni istehsal xəttinin açılması münasibətilə sizi və kollektivinizi təbrik edirik.Zavodun 10 illik fəaliyyəti dövründə ilk “KamAZ”ın istehsalı doğrudan da əlamətdar hadisədir.
- Çox sağ olun. Artıq müxtəlif ölkələrlə əməkdaşlıq müqavilələrimiz yeni mərhələyə qədəm qoyub. Ötən il dekabrın 22-də Rusiyanın “KamAZ” ASC ilə bağlanmış ikitərəfli müqaviləyə görə cari ilin əvvəllərindən başlayaraq yüksəkkeçidli, ağırtonnajlı avtomobillərin yığımına başlamalı idik.Gördüyünüz kimi, hər iki tərəf götürdüyü öhdəliyi yerinə yetirdi. Yeni konveyer xəttinin açılışında hətta Rusiya Federasiyası Tatarıstan Respublikasının Prezidenti Rüstəm Minnixanov da iştirak etdi.
- Yəqin ki, istehsal etdiyiniz texnikaların satışında elə bir problem yaşanmayacaq...
-Bilirsiniz, biz hər hansı texnikanın istehsalına başlamaq üçün dəfələrlə məsləhətləşir, araşdırma aparırıq.Yaxşı bilirik ki, cəmi 10 yaşı olan zavodda xırda bir səhvə yol vermək, müəssisənin iflası deməkdir.Odur ki, müqavilə bağlanmazdan əvvəl tədqiqat aparılır. Əvvəlcə istehsal olunacaq texnikanın alıcılıq qabiliyyətini yoxlayırıq.Bu işdə mütəxəssislərin fikirləri öyrənilir. Qeyd edim ki, “KamAZ” ASC Rusiyanın yük avtomobili texnikası istehsalçısıdır.Şirkət SSRİ dövründə yaradılıb və müasir qloballaşma şəraitində böyük inkişaf yolu keçib.İstehsala başlayandan “KamAZ” avtomobilləri keçmiş sovetlər məkanında populyarlıq qazanıb və indiyədək MDB-nin bir çox ölkələrində avtomobil yükdaşımalarında böyük paya malikdir. “KamAZ” beynəlxalq avtomobil biznesinə inteqrasiya edilmiş şirkətdir.Şirkət istehsalatda müasir texnologiyaları və dünyanın qabaqcıl istehsalçılarının ən son komponentlərini tətbiq edir.Odur ki, gündən-günə inkişaf edən ölkəmizdə bu avtomobillərə də böyük tələbat var. Gəncədə istehsal olunan “KamAZ” avtomobillərinin ilk mərhələdə Azərbaycan bazarında, sonra isə xarici bazarlarda satışını planlaşdırmışıq.Hazırda Nəqliyyat Nazirliyindən, eləcə də Gəncə Şəhər İcra Hakimiyyətindən sifarişlər almışıq.Yəqin ki, konveyerdən çıxan ilk avtomobillər həmin sifarişlərə yönəldiləcək.
-Birgə əməkdaşlıq haqqında müqavilə bağladığınız şirkətlər işinizdən razıdırlarmı?
- Əlbəttə. Misal üçün “KamAZ” zavodu ilə müqavilə imzalanmazdan əvvəl müəssisənin baş direktoru Sergey Koqoqin mütəxəssislərlə birlikdə bizim zavoda olublar.Direktor müəssisəmizin istehsalat sahələrini gəzdikdən sonra bildirdi ki, sonuncu dəfə Gəncə haqqında 10 il bundan əvvəl eşidib. O, elə hesab edirdi ki, zavod hələ tam qurulmayıb və açığı, burada “KamAZ”ın istehsal xəttinin işə salınacağına bir az şübhə ilə yanaşırdı.Lakin S.Koqoqin Gəncə avtomobil zavodunda gördüklərindən sözün yaxşı mənasında təəccübləndi. Etiraf etdi ki, burada çox böyük işlər görülüb.Müəssisə texnoloji parametrlər baxımından avtomobil istehsalına hazırdır.Zavodun 500-dən artıq əməkdaşının olması, onların yığım təcrübəsi Gəncədə “KamAZ”ın istehsalına imkan verir. Zənnimcə, bu fikirlər bizim zavodun üzərinə düşən işi layiqincə yerinə yetirdiyini təsdiqləyir.
-Rusiyada istehsal olunan avtomobillə Gəncədə yığılan avtomobil arasında hər hansı fərq ola bilərmi?
-Qətiyyən ola bilməz.Çünki aparılan danışıqlarda bir fikir səsləndirilib: “KamAZ” brendi Rusiya üçün çox önəmlidir.Gəncədə yığılan “KamAZ” avtomobillərinin keyfiyyəti əsas konveyerdəkilərdən fərqlənməməlidir.Bu istəyə nail olmaq üçün rusiyalı mütəxəssislər bizim mütəxəssislərə hər cür yardım edirlər.
- Məlum olduğu kimi, zavodda müxtəlif markalı texnikaların yığımı da həyata keçirilir.“MAZ” avtomaşını, “Belarus” traktorları, hətta Almaniyanın “HALLER” şirkəti ilə bağlanmış müqaviləyə əsasən kommunalyönümlü maşınlar istehsal edilir.Müxtəlif markalı, müxtəlif tutumlu və müxtəlif təyinatlı avtomaşınların yığımı çətinliklər yaratmır ki?
-Açığını deyim ki, əvvəllər müəyyən çətinliklər olurdu.Ancaq son vaxtlar elə bir çətinlik hiss etmirik.Çünki artıq müəssisəmizdə yüksək texnologiyaları mənimsəmiş çoxlu sayda mütəxəssislər yetişib.Bundan başqa, istehsal edəcəyimiz texnikanın strukturunu mənimsəmək üçün qabaqcadan həmin zavoda mütəxəssislər ezam edirik.Demək olaq ki, onlar qısa vaxt ərzində yığımı mənimsəyir və bu prosesi digər yoldaşlarını da öyrədirlər.
- İstifadəyə verilmiş yeni konveyerdə il ərzində 1500 “KamAZ”ın yığılması nəzərdə tutulub.Əgər sifariş olarsa, bunun öhdəsindən gələ biləcəksiniz?
-Əlbəttə.Bunun üçün həm imkanımız, həm də lazımi şəraitimiz var.
- Müsahibəyə görə çox sağ olun, sizə işlərinizdə uğurlar arzulayırıq.
- Sağ olun.
Bölmənin digər xəbərləri
