Mədəni-tarixi abidələrimizə zərər vurmağa heç kimin haqqı yoxdur - AÇIQLAMA
Bakı, 6 sentyabr, AZƏRTAC
Şuşada qayaların üstünə şəhidlərimizin adlarının yazılmasını onların ruhuna və xatirələrinə hörmətsizlik hesab edirəm və bu hərəkətləri kəskin qınayıram.
Bu fikirləri AZƏRTAC-a açıqlamasında “Qürur” Şəhid Ailələri Xeyriyyə İctimai Birliyinin sədri, Qarabağ müharibəsi veteranı və Azərbaycanın Milli Qəhrəmanı Səfiyar Behbudovun bacısı Naibə Behbudova səsləndirib. O bildirib ki, şəhidlərimizin qanı bahasına azad edilmiş bu müqəddəs yerlərə sahib çıxmalı, onları qorumalıyıq: “Şəhid ailələri adından hər bir vətəndaşa çağırış edirəm. Şəhidlərimizin qanı bahasına işğaldan azad edilmiş bu müqəddəs yerləri göz bəbəyi kimi qorumalıyıq. Şəhidlərimizin adları Allah yanında uca məqamdadır. Onların adları dövlətimiz və xalqımız tərəfindən hörmətlə anılır. Şəhidlərimizin adlarını əbədiləşdirmək üçün memorial komplekslər, abidələr ucaldılır, muzeylər, xiyabanlar salınır. Onların adları küçələrə verilir, filmlər çəkilir, kitablar yazılır, dastanlar qoşulur. Şuşa dünyanın diqqət mərkəzindədir. Belə bir vaxtda nə şəhidlərimizin adlarını ucuzlaşdırmağa, nə də qədim mədəni-tarixi abidələrimizə zərər vurmağa heç kimin haqqı yoxdur”.
Müxbir - Nailə Həsənova
Bölmənin digər xəbərləri
