Şəhid atası: Şuşanın qayalarına yazılan adlar o torpağın mənəvi dəyərinə kölgə salır
Bakı, 6 sentyabr, AZƏRTAC
Şuşaya gedən insan ilk növbədə bu şəhərin hansı tarixi mərhələlərdən keçdiyini nəzərə almalı, orada davranışına xüsusi diqqət yetirməlidir.
Bu sözləri AZƏRTAC-a açıqlamasında Naxçıvan Muxtar Respublikasının Şahbuz rayonunun Nursu kəndindən olan şəhid Niyamin Niftalızadənin atası Xaliq Məhərrəmov söyləyib.
“Mən Nursu kəndindənəm. Oğlum Niyamin də orada doğulub. Mənim üçün Şuşanın qayasında yazılan bir ad sadəcə bir yazı deyil. Mən həmin qayaya baxanda orada Vətən uğrunda döyüşən oğullarımızı, onların ailələrini düşünürəm. Ona görə də kiminsə gəlib həmin qayaya öz adını yazması mənə çox ağır gəlir”, - deyə şəhid atası bildirib. O qeyd edib ki, insanlar bəzən “xatirə” məqsədilə etdikləri hərəkətin əslində hansı məna daşıdığını düşünmürlər: “İnsan düşünür ki, adımı yazım, buradan keçdiyim bilinsin. Amma niyə mütləq o qayaya yazmalısan? Şuşa sənin şəxsi dəftərin deyil. Oraya gələn hər kəs bilməlidir ki, onun qarşısında qorunmalı bir tarix var”.
Xaliq Məhərrəmov deyib ki, Şuşanın qayalarında və daşlarında olan izlərə münasibət xüsusilə diqqətli olmalıdır: “Sonradan yazılan adlar və çəkilən cızıqlar həmin məkanın təbii görünüşünü dəyişməklə yanaşı, gələcəkdə orada aparılacaq araşdırmalar üçün də arzuolunmaz nəticələr yarada bilər. Bir nəfərin etdiyi hərəkəti başqa birisi də təkrarlaya bilər. Hər kəs bir yerə öz adını yazsa, Şuşanın qayaları nə vəziyyətə düşər? Biz buna indidən “yox” deməliyik”.
Şəhid atası üçün məsələnin digər mühüm tərəfi isə həmin ərazilərin onun oğlu kimi gənclərin döyüş yolu ilə bağlı olmasıdır. Niyamin Niftalızadə 23 yaşında könüllü olaraq Vətən müharibəsinə gedib, Füzuli, Cəbrayıl və Xocavənd istiqamətlərində döyüşüb və 2020-ci il oktyabrın 7-də şəhid olub.
Atasının sözlərinə görə, Niyaminin hərbi xidmətə münasibəti hələ gənclik illərindən fərqli olub. Həqiqi hərbi xidmətini başa vurduqdan sonra aşpaz kimi uğurlu fəaliyyət göstərsə də, ordu sıralarına qayıtmaq istəyib. Komandiri polkovnik İlqar Mirzəyevin şəhid olmasından sonra isə könüllü olaraq döyüşlərə qoşulub.
“Oğlumun ürəyi hərb ilə döyünürdü. Biz onu qorumaq istəyirdik, amma o deyirdi ki, bir gün hərbi sahəyə qayıdacaq. Sonda da qayıtdı. İstəyirəm ki, onun getdiyi, döyüşdüyü torpaqlara insanlar hörmətlə yanaşsınlar. Orada qayaya ad yazmaq mənim üçün çox mənasız və ağrılı bir hərəkətdir”, - deyə müsahibimiz bildirib. Onun sözlərinə görə, Şuşaya səfər edənlərin həmin şəhərdən yaddaşlarında gözəl təəssüratlarla ayrılması mümkündür, bunun üçün tarixi və təbii mühitə müdaxiləyə ehtiyac yoxdur: “Şuşadan xatirə aparmaq istəyirsənsə, şəkil çəkdir, gördüklərini danış, övladlarına göstər. Amma qayaya əl vurma. Sən gedəndən sonra o qaya orada qalacaq. Biz isə istəyirik ki, Şuşa gələcək nəsillərə bu gün necədirsə, mümkün qədər elə də çatsın”.
Şəhid atası hesab edir ki, bu məsələ ilə bağlı maarifləndirmə işləri də gücləndirilməlidir. Xüsusilə Şuşaya təşkil olunan səfərlərdə bələdçilərin turistlərə tarixi və mədəni məkanların qorunması ilə bağlı əvvəlcədən məlumat verməsi vacibdir.
“İnsan bilməyəndə səhv edə bilər. Amma bilə-bilə etmək tamam başqa məsələdir. İstərdim ki, Şuşaya gedən hər kəsə əvvəlcədən deyilsin: bu daşlara, qayalara yazı yazmaq olmaz. Çünki bu şəhər hamımızındır və onun qorunmasına cavabdehik”, - deyə Xaliq Məhərrəmov bildirib. O vurğulayıb ki, şəhid ailələri üçün bu məsələ sadəcə qayaların üzərindəki yazılardan ibarət deyil.
“Niyamin 23 yaşında getdi. O yaşda bir insanın arzuları, gələcəyi olur. Mən oğlumu itirmişəm. İndi mənim üçün o torpaqlarda qalan hər bir iz qiymətlidir. İstəyirəm ki, insanlar bunu anlasınlar və Şuşanın hər daşına ehtiramla yanaşsınlar”, – deyə şəhid atası fikrini yekunlaşdırıb.
Müxbir - Tünzalə Arazlı
Bölmənin digər xəbərləri
