Avropa Komissiyasının Prezidenti Qrenlandiyaya səfər edib
Avropa Komissiyasının Prezidenti Ursula Fon der Lyayen Qrenlandiyaya ikigünlük səfərə gedib.
AZƏRTAC xəbər verir ki, səfər çərçivəsində Avropa İttifaqı ilə Qrenlandiya arasında əməkdaşlığın genişləndirilməsi, yeni tərəfdaşlıq haqqında birgə bəyanatın imzalanması nəzərdə tutulur. Həmçinin yüz milyonlarla avro həcmində investisiya öhdəliklərinin açıqlanacağı gözlənilir.
U.Lyayeni Nuuk hava limanında Qrenlandiyanın Baş naziri Yens-Frederik Nilsen və Danimarkanın Baş naziri Mette Frederiksen qarşılayıblar.
Aİ Komissiyasının Prezidenti səfərlə bağlı “X” hesabındakı paylaşımında bildirib: “Biz bir ailəyik. Unikal tərəfdaşlığımızı daha da gücləndirmək üçün üzərində birlikdə işlədiyimiz Tərəfdaşlıq Paketi ilə geri qayıtmışam”.
Qeyd edək ki, bu səfər ABŞ Prezidenti Donald Trampın Qrenlandiyaya nəzarət iddialarını yenidən gündəmə gətirdiyi bir vaxta təsadüf edir. ABŞ administrasiyası adanın strateji və təhlükəsizlik baxımından əhəmiyyətini, eləcə də zəngin kritik xammal ehtiyatlarını xüsusi vurğulayır.
Qrenlandiya Danimarka Krallığının tərkibində olsa da, geniş muxtariyyətə malikdir və Avropa İttifaqına daxil deyil.
Elvin Mövsüm
Bölmənin digər xəbərləri
