Xuraman Qənbərova: Şəhidlərimizin izini şəxsi yazılarla korlamaq yolverilməzdir
Bakı, 6 sentyabr, AZƏRTAC
Şuşada daş və qayaların üstünə müxtəlif adların yazılması halları yolverilməzdir.
Bu sözləri AZƏRTAC-a açıqlamasında şəhid polkovnik-leytenant Mehman Qənbərovun həyat yoldaşı Xuraman Qənbərova söyləyib. O vurğulayıb ki, şəhidlərimizin qanı bahasına azad edilən müqəddəs torpaqlarımızın hər bir qarışı bizə onlardan əmanətdir. Bu yerləri ziyarət edən turistlərin öz adlarını daşlara yazaraq “xatirə” buraxmağa çalışması təəssüf və narahatlıq doğurur.
“Tarixi yaddaşımızı korlayan, şəhidlərin izlərini və fədakarlıq nişanələrini bu cür vandalizmlə yox etməyə yönələn hər bir hərəkət vətəndaşlıq məsuliyyətsizliyidir. Vətən naminə canından keçən polkovnik-leytenant Mehman Qənbərov və bütün qəhrəmanlarımızın xatirəsinə qarşı göstərilən bu cür etinasızlıq xalqımızın mənəvi dəyərlərinə vurulan ağır zərbədir”, - deyə Xuraman Qənbərova bildirib.
Şəhidin xanımı hesab edir ki, qayaların, tarixi divarların və döyüş mövqelərinin şəxsi xatirə vasitəsinə çevrilməsi yolverilməzdir: “Şəhidlərin qanı ilə suvarılmış ərazilərdə öz adlarını daşlara yazanlar unudurlar ki, o qəhrəmanların izləri və fədakarlığı olmasaydı, bu gün orada heç bir turist azad şəkildə gəzə bilməzdi. Bu torpaqları ziyarət edən hər bir şəxs, bələdçi və vətəndaş tarixi yaddaşın toxunulmazlığını qorumağı özünə mənəvi borc bilməlidir”. O əlavə edib ki, söhbət yalnız coğrafi ərazinin qorunmasından getmir: “Biz həm də o daşların mənəvi ruhunu və şəhidlərimizin bizə qoyub getdiyi silinməz irsi qorumalıyıq. Qəhrəmanlarımızın izinə toxunan, daşların yaddaşını öz adları ilə korlamağa cəhd edən hər bir şəxsə qarşı ictimai qınağımız daim barışmaz olacaq”.
Xuraman Qənbərova bildirib ki, şəhid ailələri üçün bu məkanların hər biri xüsusi mənəvi əhəmiyyət daşıyır: “Şəhidlərimizin ruhu və onların bizə əmanət qoyduğu ailələri qarşısında baş əyərək bəyan edirik ki, bu xatirələrin insan əli ilə ucuzlaşdırılmasına və yox edilməsinə əsla icazə verməyəcəyik. Bu etirazımız sadəcə keçmişə hörmət deyil, həm də gələcəyimizə, milli ləyaqətimizə və vətənpərvərlik dəyərlərimizə sahib çıxmağımızın bariz göstəricisidir.
Hər bir azərbaycanlı bu abidələrin keşiyində durmalı, turistlərin özbaşınalığına qarşı öz səsini ucaltmaqdan çəkinməməlidir. Şəhidlərin izini belə yazılarla itirmək Vətənin ən şərəfli səhifələrini tarixdən silmək və unutmaq deməkdir. Biz şəhidlərimizin bu torpaqlardakı silinməz möhürünə hər zaman sahib çıxacağıq”.
Müxbir - Tünzalə Arazlı
Bölmənin digər xəbərləri
