Mürvət Əsgərov: Şəhidlərimiz adlarını daşlara deyil, qanları ilə tarixə yazdılar
Bakı, 6 sentyabr, AZƏRTAC
Şuşa Azərbaycanın tarixi, mədəni və mənəvi yaddaşını özündə yaşadan şəhərdir. Buradakı hər daş, hər qaya xalqımızın keçdiyi şərəfli yolun, qəhrəmanlıq salnaməsinin bir parçasıdır. Bu torpaqlar minlərlə şəhidimizin qanı bahasına azad olunub və onların xatirəsinin qorunması hər bir vətəndaşın mənəvi borcudur.
Bu fikirləri AZƏRTAC-a açıqlamasında Xətai Rayon Ağsaqqallar Şurasının sədri, Vətən müharibəsi şəhidi mayor Rüfət Əsgərovun atası Mürvət Əsgərov bildirib. O qeyd edib ki, son günlər Şuşaya səfər edən bəzi turistlərin qaya daşlarının üstünə ad və müxtəlif yazılar həkk etməsi dərin təəssüf doğurur və bu cür davranış nə milli-mənəvi dəyərlərimizə, nə də tarixi irsimizə hörmət nümunəsidir.
“Şəhidlərimiz öz adlarını daşlara deyil, qanları ilə Azərbaycanın şanlı tarixinə əbədi həkk etdilər. Şuşanın qayaları, küçələri və abidələri bizim ortaq sərvətimizdir. Onlara zərər vurmaq, üstündə yazılar yazmaq qəbuledilməzdir. Bu şəhəri gələcək nəsillərə olduğu kimi, saf və bütöv şəkildə ötürməliyik. Tarixi abidələri qorumaq, şəhidlərimizin bizə əmanət qoyduğu Vətənə sahib çıxmaq hər birimizin vicdan və vətəndaşlıq borcudur”, – deyə Mürvət Əsgərov vurğulayıb.
Şəhid atası bütün vətəndaşları, xüsusilə gəncləri tarixi-mədəni irsə həssas yanaşmağa çağıraraq bildirib ki, Şuşanı qorumaq yalnız dövlət qurumlarının deyil, hər bir azərbaycanlının məsuliyyətidir.
Bölmənin digər xəbərləri
