8 Noyabr - Azərbaycanın ən parlaq və şərəfli tarixidir
Bakı, 8 noyabr, AZƏRTAC
“Mən işğal dövründə deyirdim, hər birimiz azadlıq gününü, bu müqəddəs günü öz işimizlə yaxınlaşdırmalıyıq, yaxınlaşdırırdıq və yaxınlaşdırdıq”. Prezident, rəşadətli Ali Baş Komandan İlham Əliyevin bu müdrik kəlamı onun uzaqgörən siyasi xadim, Lider dövlət başçısı olduğunu bir daha təsdiqləyir. 2003-cü ildə keçirilən prezident seçkilərində qalib gələn İlham Əliyev andiçmə mərasimindəki nitqində də bildirmişdi ki, Azərbaycanın işğal altında olan torpaqları azad ediləcək, məcburi köçkün soydaşlarımız doğma ata-baba yurdlarına qayıdacaqlar. Bu gün həm xalqımız, həm də dünya ictimaiyyəti bu reallığın şahididir. Artıq Qarabağ və Şərqi Zəngəzur dünyanın diqqət mərkəzinə çevrilib və keçmiş məcburi köçkün soydaşlarımız böyük coşqu ilə isti ocaqlarına qayıdırlar.
Bu fikirləri AZƏRTAC-a açıqlamasında Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə 8 Noyabr - Zəfər Günü ilə əlaqədar bildirib.
Hüquq müdafiəçisi deyib ki, Qalib Ali Baş Komandan İlham Əliyev Prezident kimi 2003-cü ildən bu günə qədər bütün addımlarını Azərbaycanın gücləndirilməsinə yönəltmişdir. Dövlətimizin başçısının Vətən müharibəsinə qədər bütün fəaliyyəti bir amala xidmət etmişdir: biz torpaqlarımızı azad edək, düşməni torpağımızdan qovaq. Tanınmış hüquqşünas sözünə davam edərək deyib ki, 1988-ci ildə başlayan Qarabağ hadisələri, erməni ideoloqlarının “dənizdən- dənizə Ermənistan” adlı sərsəm ideyasını reallaşdırmaq cəhdi kəndlərin, şəhərlərin dağıdılması, on minlərə günahsız insanın ölümü, yüz minlərlə azərbaycanlının öz tarixi torpaqlarından didərgin salınması ilə nəticələnmişdir. Ermənistan silahlı qüvvələrinin Azərbaycan torpaqlarını işğal etməsi azərbaycanlıları doğma yurd-yuvalarından didərgin salmaqla yanaşı, ölkəmizin iqtisadiyyatına və mədəni irsinə də ağır zərbə vurmuşdur. Bir milyondan çox azərbaycanlı 30 il ərzində qaçqın və məcburi köçkün həyatı sürməyə məcbur olmuşdur. Ermənistan bu müddət ərzində işğal altında saxladığı Azərbaycan ərazilərini acınacaqlı vəziyyətə salmış, şəhər və kəndlərdə infrastrukturu tamamilə məhv etmiş, Azərbaycana milyardlarla dollar dəyərində maddi ziyan vurmuşdur.
Ç.Qənizadə işğal altında olan torpaqlarımızın düşməndən azad edilməsi və Azərbaycanın bütün sərhədləri boyunca bayrağımızın dalğalanmasını dövlət siyasətinin mütləq prioriteti və strateji hədəfi olduğunu diqqətə çatdırıb. Prezident İlham Əliyevin məqsədyönlü və prinsipial siyasəti əsasən bu istiqamətə yönəlmişdir. Ordu quruculuğu hər zaman dövlət siyasətinin prioritet istiqaməti olub. Uzun illər ərzində danışıqlar masasında prinsipiallıq göstərən Azərbaycan, eyni zamanda, güclü ordu yaradırdı. Qarşıya qoyulan əsas vəzifələrdən biri büdcədə hərbi xərclərin artırılması Silahlı Qüvvələrimizin daha da gücləndirilməsi, hərbi sənaye kompleksinin inkişaf strategiyası idi. Tədricən bu problem öz həllini tapdı və Ordunun döyüş qabiliyyəti möhkəmləndi, yüksəldi, ordumuz müasir silah-sursat, texnika ilə təchiz edildi. Bir ölkədən asılı olmamaq üçün hərbi texnika bir çox mənbələrdən alındı.
Tanınmış hüquqşünas Azərbaycan Prezidentinin çoxşaxəli və effektiv xarici siyasətindən söhbət açaraq deyib ki, beynəlxalq təşkilatlarla səmərəli əməkdaşlıq tərəfdaş ölkələrin sayının artmasına səbəb olmuşdur. Azərbaycan münaqişə boyunca bütün aparıcı beynəlxalq təşkilatlarla əməkdaşlıq edib və münaqişənin həlli üçün hüquqi bazanı hazırlayıb. BMT Baş Assambleyası, Qoşulmama Hərəkatı, Avropa Şurası, Avropa Parlamenti, İslam Əməkdaşlıq Təşkilatı, Türk Dövlətləri Təşkilatı və digər təşkilatlar qətnamələr qəbul edib. Avropa İttifaqı ilə paraflanmış sənəddə sərhədlərimizin toxunulmazlığına, suverenliyimizə və ölkəmizin ərazi bütövlüyünə dəstək göstərilirdi. BMT Təhlükəsizlik Şurasının Ermənistan silahlı qüvvələrinin işğal olunmuş Azərbaycan ərazilərindən dərhal çıxarılmasını tələb edən 4 qətnaməsi kağız üzərində qalmış və icra olunmamışdır. Lakin işğalçı Ermənistan xarici himayədarlarına arxayın olaraq ölkəmizə qarşı təxribatlarını davam etdirmişdir. 2020-ci il sentyabrın 27-də isə bu təxribatları müharibəyə çevirmişdir. Bu dəfə xəbis niyyətlərinə nail ola bilmədilər və elə ilk gündən Azərbaycan Ordusunun güclü təzyiqləri ilə qarşılaşdılar və 44 gün ərzində təslim oldular. Azərbaycan dövləti, xalqı və ordusu 44 gün ərzində öz qüdrətini göstərdi. Silahlı Qüvvələrimiz düşmən ordusunu məhv edərək öz ərazi bütövlüyünü bərpa etdi.
Hüquq müdafiəçisi Türkiyə və Azərbaycanın əbədi dostluğundan da söhbət açaraq Vətən müharibəsində dünya birliyi bu dostluğun daha aydın şəkildə şahidi olduğunu bildirib: “İkinci Qarabağ müharibəsi zamanı Türkiyə Prezident Rəcəb Tayyib Ərdoğanın müharibənin ilk saatlarında “Azərbaycan tək deyil, Türkiyə onun yanındadır” deməsi Azərbaycana əlavə güc verdi. Tarixi Şuşa Bəyannaməsini imzalayaraq Türkiyə və Azərbaycan rəsmən müttəfiqlik zirvəsinə ucaldı. İkinci Qarabağ müharibəsi ölkəmizdə milli həmrəyliyi, milli birliyi daha da gücləndirdi.
Ç.Qənizadə deyib ki, Ermənistan məğlub olsa da, işğalçılıq siyasətindən əl çəkmir, yenə də təxribatlar törədir, günahsız insanları, hərbçiləri qətlə yetirirdilər. Ona görə də Qarabağda lokal xarakterli antiterror əməliyyatının keçirilməsi qaçılmaz idi. Müharibədən 3 il sonra Qarabağda bir gündən az davam edən antiterror əməliyyatı nəticəsində separatçıların kökü birdəfəlik kəsildi, Azərbaycan öz dövlət suverenliyini tam bərpa etdi, beynəlxalq hüquq zəfər çaldı və Azərbaycan öz gücünü bir daha göstərdi. 15 oktyabr 2023-cü ildə Azərbaycan Prezidenti, Silahlı Qüvvələrinin Müzəffər Ali Baş Komandanı İlham Əliyev Xankəndi şəhərinin mərkəzi meydanında Azərbaycan Bayrağını qaldırdı.
Hüquq müdafiəçisi Azərbaycanın yeni inkişaf mərhələsinə qədəm qoyduğunu bildirib: “Qarabağda və Şərqi Zəngəzurda genişmiqyaslı yenidənqurma, bərpa-quruculuq missiyası başlanıb. Bundan sonra Azərbaycan yalnız inkişafa doğru gedəcək. Azərbaycan tarixinin ən parlaq və şərəfli səhifəsi olan şanlı Qələbə xalqımızla əbədi olacaq. Xalqımız, gələcək nəsillər bu tarixi Qələbə ilə haqlı olaraq fəxr edəcək, qürur duyacaq”.
Bölmənin digər xəbərləri
