Bakı, 27 oktyabr, AZƏRTAC

Bakı Dövlət Universitetinin (BDU) fizika fakültəsində tədrisin yeniləşdirilməsinə, elmi araşdırmaların aparılmasına xüsusi önəm verilir. Bu barədə fakültənin dekanı, professor Məhəmmədəli Ramazanov AZƏRTAC-a müsahibəsində məlumat verib.

Dekan bildirib ki, gələn il Bakı Dövlət Universitetinin yaradılmasının 100 ili tamam olacaq. Azərbaycan Prezidenti İlham Əliyevin müvafiq Sərəncamına əsasən universitetin yubileyi geniş şəkildə qeyd ediləcək. BDU-nun bütün fakültələri, o cümlədən fizika fakültəsi yubileyi yüksək nailiyyətlərlə qarşılamağa çalışır. Ötən il fizika fakültəsinin alimləri “Tomson Reuter”, “Scopus” tərəfindən indekslənən impakt faktorlu jurnallarda 118 məqalə dərc etdiriblər. Keçirdiyimiz beynəlxalq konfransın seçilmiş materialları “Tomson Reuter” Agentliyinin siyahısına daxil edilib. Son zamanlar isə fakültədə tədrisin müasirləşdirilməsi, elmi-tədqiqatların genişləndirilməsi, təhsilin Bolonya prosesinin tələblərinə uyğunlaşdırılması istiqamətində mühüm tədbirlər reallaşdırılır.

Fakültənin bakalavriat pilləsində 1100, magistratura pilləsində 150 tələbənin təhsil aldığını deyən professor M.Ramazanov qeyd edib ki, bu gün magistraturada 17 ixtisaslaşma üzrə mütəxəssis hazırlanır. İxtisaslaşmaların 7-si yeni açılıb. Təhsilin bu pilləsində radiasiya materialşünaslığı, nüvə fizikası və texnologiyası, yüksək enerjilər fizikası ixtisaslaşmaları üzrə kadr hazırlığına da başlanılıb. Bu sahədə mütəxəssis hazırlığı Nəqliyyat, Rabitə və Yüksək Texnologiyalar Nazirliyinin tabeliyindəki “Milli Nüvə Tədqiqatları Mərkəzi” Qapalı Səhmdar Cəmiyyəti ilə birgə reallaşdırılır. Eyni zamanda, yaxın vaxtlarda astrofizika kafedrasının bazasında daha yeni bir ixtisasın - kosmologiya ixtisasının açılması nəzərdə tutulur. Xatırladım ki, bu yaxınlarda kafedranın Şamaxı Astrofizika Rəsədxanasında filialı yaradılıb. Həmin filialda tələbələrin astrofizika sahəsində elmi təcrübələr keçməsinə geniş imkanlar olacaq.

Professor M.Ramazanov bildirib ki, fakültənin müasir cihaz və avadanlıqla təchiz edilmiş laboratoriyalarında yeni istiqamətlərdə elmi-tədqiqatlar aparılır və uğurlu nəticələr əldə edilir. Nanotexnologiya elminin əsasları fakültənin bakalavr pilləsində tədris edilməyə başlayıb. Nanohissəciklərin fizikası, nanomaterialların fiziki kimyası və nanobiotexnologiya ixtisaslaşmalarında magistr hazırlığı aparılır. İndiyədək bu istiqamətdə 30-dan çox magistr hazırlanıb, 12 nəfər doktorantura üzrə dissertasiya müdafiə edib.

“Fakültəmizin əməkdaşları hazırda Avropanın iki böyük layihəsində iştirak edirlər. Gənc tədqiqatçılar Birləşmiş Nüvə Tədqiqatları İnstitutu ilə üç qrant layihəsi üzrə iş aparırlar. İtaliyanın La Sapianze Universiteti ilə yeni bir qrant layihəsi də hazırlanır. Bu layihəyə Fransa, İtaliya Yunanıstan, Almaniya, Azərbaycanın Təhsil Nazirliyi və BDU qatılacaq.

Almaniyanın CARL ZEİSS şirkətindən LSM 800 markalı lazer skanedici mikroskopun alınması ilə bağlı danışıqlar aparılır və düşünürəm ki, bu məsələ də müsbət həllini tapacaq. Bu il də alimlərimiz müxtəlif istiqamətlərdə yeni nailiyyətlər qazanmağa çalışır, “Tomson Reuter”, “Scopus” tərəfindən indekslənən impakt faktorlu jurnallarda məqalələr çap etdirirlər. Dünyanın ayrı-ayrı ölkələrində keçirilən beynəlxalq tədbirlərdə əməkdaşlarımızın elmi məruzələri böyük maraq doğurur”, - deyə M.Ramazanov söyləyib.