Ekspert: Prezidentin Qərbi azərbaycanlılarla görüşü hədəflərimizi açıq şəkildə göstərdi
Bakı, 27 dekabr, AZƏRTAC
Müharibədən əvvəl Prezident İlham Əliyev görüşlərini öz yurd-yuvalarından didərgin düşmüş vətəndaşlarımızla keçirirdisə və onların tezliklə qayıtmasına söz verirdisə, müharibədən sonrakı iki ildə dövlətimizin başçısı ad günlərini əsgərlərimizlə qeyd edir. Bu, Ali Baş Komandan tərəfindən Silahlı Qüvvələrimizin Qarabağa və Şərqi Zəngəzura qayıdışını alqışlaması demək idi. Amma Prezidentin sonuncu dəfə ad gününü Qərbi Azərbaycandan olan vətəndaşlarımızla birgə keçirməsi, bizə yaxın və orta perspektivdə hədəflərimizin nədən ibarət olduğunu aşkar şəkildə göstərdi.
Bu fikirləri AZƏRTAC-a müsahibəsində hərbi ekspert Ədalət Verdiyev deyib.
Qeyd edib ki, Azərbaycan tarixi torpaqlarına qayıtmağa, bu istiqamətdə Ali Baş Komandanın rəhbərliyi ilə fəaliyyətlərini daha da genişləndirməyə hazırdır. Bu istiqamətdə dost və müttəfiqlərimizlə birgə məqsədyönlü fəaliyyətlər ən yaxın müddətdə vətəndaşlarımızın bütün tarixi torpaqlarımıza qayıdışını təmin edəcək. Ali Baş Komandanın rəhbərliyi ilə bu gün Azərbaycan Ordusu artıq Bala Göyçə sahilində mövqelərini möhkəmləndirir. Bu gün biz Göyçə gölünü gözümüzlə görürük. Azərbaycan əsgəri Basarkeçər, Qafan, Qarakilsə, İstisu rayonlarındakı düşmən yerdəyişmələrini heç bir texniki vasitə olmadan açıq gözlə müşahidə etməkdədir. Bu imkanlar düşmənin gələcək mümkün təxribatlarının qarşısını almaqda mühüm rol oynayır.
Ədalət Verdiyev vurğulayıb ki, Prezidentin növbəti ad gününü Qərbi Azərbaycan icmasının binasının açılışında həmin ərazilərdə doğulmuş görkəmli şəxslərlə keçirməsi siyasi və tarixi məna daşıyır. Dövlətimizin başçısının bu açılışda iştirakı insanlarımızın Qərbi Azərbaycana qayıdışının başlanması üçün siqnal da hesab oluna bilər. Əgər Qarabağ problem artıq Azərbaycan üçün geridə qalmışsa və həll olunmuş bir məsələdirsə, bizim növbəti hədəfimiz Qərbi Azərbaycana qayıtmaqdan ibarətdir. Bunu da Prezident dəfələrlə söyləyib.
Qarabağın azad olunmasından sonra azərbaycanlı icmasına məxsus binanın Qərbi Azərbaycan icmasının binası kimi fəaliyyətini davam etdirməsi isə Azərbaycanın növbəti hədəflərinin məhz Qərbi Azərbaycandan olan əhalimizin doğma yurdlarına qayıdışının təmin olunmasından ibarət olduğunu da aşkar şəkildə nümayiş etdirir”, - deyə ekspert əlavə edib.
Başa çatmaqda olan 2022-ci ilin Azərbaycan üçün vacib qələbələrin əldə edildiyi bir il kimi yadda qaldığını söyləyən ekspert deyib: “Ölkəmizə qarşı çox böyük ədalətsizliklərin və haqsızlıqların olunmasına baxmayaraq, Azərbaycan Ali Baş Komandanın rəhbərliyi ilə hərbi qulluqçularımızın fədakarlığı, xalqımızın və dövlətimizin birliyi sayəsində bu il ərzində çox böyük nəticələr əldə etdi. Ordumuzun çətin iqlim və relyef şəraitində qazandığı hərbi nailiyyətlər hələ də dünyanın bir çox beyin mərkəzlərində dərindən təhlil edilməkdədir.
Məhz bu il Azərbaycan Ordusu Ermənistan silahlılarının bir neçə dəfə irimiqyaslı təxribatlarının qarşısını aldı. Nəticə etibarilə bu təxribatlar Ermənistan üçün çox ağrılı-acılı nəticələrlə müşayiət olundu. Azərbaycan tərəfi sentyabr döyüşlərində düşməni böyük itkilərə məruz qoydu. Ermənistan tərəfi həmin döyüşlərdə bir milyard manata yaxın müxtəlif təyinatlı silah sistemlərini və texnikalarını itirdi”.
Hərbi ekspertin sözlərinə görə, bu gün İrəvan-Qafan yolu Azərbaycanın qəhrəman övladlarının atəş nəzarəti altındadır: “Qərbi Zəngəzur ərazisində düşmənin bütün manevrlərini müşahidə altında saxlayırıq. Çıxılmazlıq sindromuna məruz qalan Ermənistan hər həftə, hər ay növbəti siyasi, hərbi, diplomatik məğlubiyyətlərə məruz qalır. Azərbaycan xalqının 30 il ərzində çiynində daşıdığı ağır məğlubiyyət yükünü artıq iki ildir ki, Ermənistan daşıyır. Bu yükü Ermənistanın nə qədər daşıyıb-daşıya bilməyəcəyi də sual altındadır”.
Sonda ekspert inamını ifadə edib ki, Müzəffər Ali Baş Komandanın möhkəm iradəsi və Azərbaycan xalqının əzmkar Qələbə ruhu bizi bundan sonra da daha böyük nailiyyətlərə aparacaq.
Bölmənin digər xəbərləri
