Gəncə, 14 oktyabr, M.Əliyev, foto İ.Cəfərov, AZƏRTAC

Ermənilərin Gəncədə törətdikləri təxribatın heç bir izahı yoxdur.

Bunu AZƏRTAC-ın bölgəyə ezam olunmuş müxbirinə açıqlamasında Gəncədəki rus icmasının üzvü Marianna Pronina deyib.

“Mən bu gün Aleksandr Nevski Rus Pravoslav Kilsəsinə bütün Azərbaycan xalqı üçün, Vətənimiz üçün dua etməkdən ötrü gəlmişəm. Ermənilər başa düşməlidirlər ki, sülh və həmrəylik şəraitində yaşamaq lazımdır. Başqa xalqların torpağını mənimsəmək olmaz. Qarabağ Azərbaycan torpağıdır. Biz onun azad edilməsi uğrunda ədalətli mübarizə aparırıq”, - deyə o bildirib.

Qeyd edək ki, Ermənistan tərəfindən Gəncə şəhərində törədilmiş terror aktının qurbanlarının xatirəsinə ehtiram əlaməti olaraq oktyabrın 14-də Gəncədəki Aleksandr Nevski Rus Pravoslav Kilsəsində ibadət mərasimi keçirilib.