Həkim əməyinin qiymətləndirilməsi səhiyyənin gələcəyinə qoyulan sərmayədir – Füzuli Əliyev
Bakı, 4 sentyabr, AZƏRTAC
Həkimlərin əməkhaqlarının artırılması yalnız tibb işçilərinin sosial rifahının yaxşılaşdırılması deyil, eyni zamanda, səhiyyənin gələcəyinə qoyulan mühüm sərmayədir. Həkim əməyinin maddi və mənəvi baxımdan layiqincə qiymətləndirilməsi tibbi xidmətlərin keyfiyyətinə, peşəkar kadrların yetişməsinə və səhiyyə sisteminin inkişafına birbaşa təsir göstərir.
Bu fikirləri AZƏRTAC-a açıqlamasında ümumi cərrah Füzuli Əliyev söyləyib. O bildirib ki, həkimlik digər peşələrdən öz məsuliyyəti ilə fərqlənir. Çünki həkim hər gün insan həyatına və sağlamlığına birbaşa cavabdehlik daşıyır. Xüsusilə cərrahiyyə sahəsində bu məsuliyyət daha böyükdür: “Cərrahiyyə elə bir sahədir ki, burada saniyələr, bəzən isə saniyənin hissələri belə çox şeyi dəyişə bilər. Əməliyyat zamanı həkim həm düzgün qərar verməli, həm də həmin qərarın nəticəsinə görə məsuliyyət daşımalıdır. Bəzən saatlarla davam edən mürəkkəb əməliyyatdan sonra həkimin özü yorğunluğunu belə hiss etmir. Çünki onun üçün əsas məsələ xəstənin əməliyyatdan sağlam çıxmasıdır”.
Füzuli Əliyev qeyd edib ki, həkimlərin əməyinin qiymətləndirilməsi yalnız əməkhaqqı məsələsi kimi qəbul edilməməlidir. Həkim özünü inkişaf etdirmək, yeni tibbi texnologiyaları öyrənmək, müasir müalicə və əməliyyat metodlarını mənimsəmək üçün daim zaman və resurs sərf edir.
“Bu gün tibb çox sürətlə dəyişir. Dünən ən müasir hesab etdiyimiz metod bu gün daha yeni texnologiya ilə əvəzlənə bilər. Həkim bu dəyişikliklərin arxasınca getməli, daim oxumalı, araşdırmalı, təcrübəsini artırmalıdır. Bu, cərrah üçün xüsusilə vacibdir. Çünki insan orqanizmi ilə işləyirsən və burada səhvin qiyməti çox ağır ola bilər”, - deyə müsahibimiz qeyd edib.
“Yaxşı həkim olmaq üçün yalnız diplom kifayət etmir. Həkim ömrü boyu tələbə olaraq qalır. Bizim sahədə öyrənməyin sonu yoxdur. Konfranslar, elmi məqalələr, yeni əməliyyat üsulları, beynəlxalq təcrübə – bütün bunlar həkimin gündəlik fəaliyyətinin bir hissəsinə çevrilməlidir. Ona görə də həkim əməyinin layiqincə qiymətləndirilməsi, məncə, təkcə həkim üçün deyil, bütövlükdə xəstə üçün qazancdır”, - deyə cərrah bildirib. O diqqətə çatdırıb ki, səhiyyə sistemində peşəkar kadrların qorunub saxlanılması da mühüm məsələlərdəndir. Uzun illər ərzində formalaşan həkim təcrübəsi səhiyyə üçün böyük dəyərdir və təcrübəli mütəxəssislərin sistemdə fəaliyyətini davam etdirməsi vacibdir.
“Bir həkimin yetişməsi illər tələb edir. Xüsusilə cərrahın formalaşması daha uzun və çətin prosesdir. Tələbəlik, rezidentura, uzunmüddətli praktika, gecə növbələri, əməliyyatlar və illərlə toplanan təcrübə – bunların hər biri peşəkar cərrahın formalaşmasının mərhələləridir. Buna görə də hazırda çalışan həkimlərin əməyini qorumaq və gənc nəslin bu peşəyə marağını artırmaq strateji əhəmiyyət daşıyır”, - deyə Füzuli Əliyev bildirib.
Müsahibimiz vurğulayıb ki, həkim əməyinə verilən maddi dəyər bu əməyin cəmiyyət və dövlət tərəfindən qiymətləndirilməsinin göstəricisidir.
“Güclü səhiyyə sistemi yalnız xəstəxana və avadanlıqdan ibarət deyil. Onun əsas dayağı insandır - həkim, tibb bacısı, bütün səhiyyə işçiləridir. Bu insanların əməyinə verilən dəyər nə qədər yüksək olarsa, səhiyyənin inkişafı da bir o qədər dayanıqlı olar. Həkimin əməyinə qoyulan hər bir sərmayə əslində insan sağlamlığına qoyulan sərmayədir”, - deyə cərrah fikrini yekunlaşdırıb.
Müxbir - Tünzalə Arazlı
Bölmənin digər xəbərləri
