Politoloq: Azərbaycanın ŞƏT çərçivəsində artan rolu ölkəmizin beynəlxalq nüfuzunu daha da gücləndirir
Bakı, 4 sentyabr, AZƏRTAC
Azərbaycan xeyli vaxtdır ki, Şanxay Əməkdaşlıq Təşkilatı (ŞƏT) ilə dərin əməkdaşlıq edir və bu əməkdaşlıq ölkəmizin dünya miqyasında bir daha tanınması, ölkəmizin beynəlxalq arenada, xüsusilə də ŞƏT daxilində nüfuzunun daha da yüksəlməsi istiqamətində çox böyük əhəmiyyət daşıyır. Azərbaycan Şanxay Əməkdaşlıq Təşkilatı ilə çox sıx əməkdaşlıq edir və biz Prezident İlham Əliyevin ŞƏT-in 25 illiyi münasibətilə Bişkekdə keçirilən tədbirlərdə iştirakını xüsusi vurğulamalıyıq.
Bu fikirləri AZƏRTAC-a açıqlamasında politoloq Sahil Kərimli deyib.
Onun sözlərinə görə, Azərbaycan bu gün dünyada sülhə və təhlükəsizliyə, xüsusilə də regionumuzda sabitliyə, rifaha və təhlükəsizliyə mühüm töhfə verən ölkə kimi nüfuz qazanıb. Azərbaycanın sülh və təhlükəsizlik çağırışları, dünyada baş verən qlobal böhranlar, qanlı toqquşmalar və müharibələr fonunda ölkəmizin humanist və sülhpərvər siyasət yürütməsi, əlbəttə ki, dünya ictimaiyyəti və beynəlxalq aləm tərəfindən yüksək qiymətləndirilir. Təsadüfi deyil ki, ŞƏT-in builki tədbirləri də məhz sülh və təhlükəsizlik çağırışları ətrafında keçirilirdi. Bu yanaşma Azərbaycanın həyata keçirdiyi xarici siyasətlə tamamilə üst-üstə düşür. Azərbaycanın bu məsələlərdə nümayiş etdirdiyi prinsipial və ardıcıl mövqe ölkəmizin beynəlxalq əməkdaşlıq platformalarında etibarlı tərəfdaş kimi mövqeyini daha da möhkəmləndirir. Bu səfər Azərbaycanın təşkilat çərçivəsində artan rolunun və ŞƏT ölkələri ilə qarşılıqlı münasibətlərinin yüksək səviyyəsinin göstəricisi kimi xüsusi əhəmiyyət daşıyır.
“Dövlətimizin başçısının keçirdiyi görüşlər və həmin görüşlərdə Azərbaycan haqqında səsləndirilən yüksək fikirlər onu deməyə əsas verir ki, ölkəmiz bu gün yenidən formalaşan dünya nizamında getdikcə daha mühüm mövqeyə çıxır. Azərbaycanın nüfuzu, ölkəmizə olan inam və etimad durmadan artır. Təbiidir ki, Şanxay Əməkdaşlıq Təşkilatı, ilk növbədə, üzv və tərəfdaş ölkələr arasında iqtisadi əməkdaşlığın inkişafına yönəlmiş bir təşkilatdır. Lakin son dövrlərdə dəyişən dünya nizamı fonunda əməkdaşlığın siyasi müstəvidə də genişləndiyini görürük. Üzv və tərəfdaş ölkələr təhlükəsizlik məsələləri ilə bağlı birgə addımlar atır, müvafiq bəyanatlar qəbul edirlər”, - deyə politoloq əlavə edib.
Sahil Kərimli bildirib ki, gələcəkdə yarana biləcək təhdidlərə qarşı təhlükəsizliyin təmin olunmasına töhfə vermək də təşkilatın əsas məqsəd və istiqamətlərindən birinə çevrilir. Bu baxımdan Azərbaycan ŞƏT ilə gələcək əməkdaşlıq çərçivəsində yeni hədəf və vəzifələr müəyyənləşdirib. Bu hədəflər sırasında iqtisadi və ticarət əlaqələrinin genişləndirilməsi, nəqliyyat və tranzit imkanlarının daha səmərəli şəkildə reallaşdırılması, enerji və digər sahələrdə əməkdaşlığın dərinləşdirilməsi xüsusi əhəmiyyət kəsb edir. Azərbaycanın əlverişli coğrafi mövqeyi və Şərqlə Qərbi birləşdirən mühüm nəqliyyat-logistika imkanları bu əməkdaşlıq üçün geniş perspektivlər yaradır. Eyni zamanda, ŞƏT məkanında yerləşən və təşkilatla tərəfdaşlıq edən ölkələrlə ikitərəfli münasibətlərin inkişaf etdirilməsi Azərbaycanın bu platformadakı əməkdaşlıq imkanlarını daha da genişləndirir. Bu baxımdan Azərbaycanın ŞƏT çərçivəsində fəal iştirakı həm ölkəmizin milli maraqlarına, həm də regionlararası əməkdaşlığın genişləndirilməsi məqsədlərinə xidmət edir. Həyata keçirilən bütün bu addımlar, ölkəmizin milli dövlətçilik maraqlarına tam uyğun olan praqmatik və düşünülmüş siyasət gələcəkdə Azərbaycan üçün müxtəlif istiqamətlərdə mühüm dividendlər gətirəcək.
Bölmənin digər xəbərləri
