Jan Kasteks: Fransada yerli və qlobal karantin planları artıq hazırdır
Paris, 28 avqust, AZƏRTAC
Yerli və qlobal karantin planları, həmçinin xəstəliyin yeni dalğası üçün xəstəxana sistemi hazırdır. Ancaq qlobal karantindən yayınmaq üçün bütün imkanlardan istifadə edilməlidir.
AZƏRTAC xəbər verir ki, bu fikirləri Fransanın Baş Naziri Jan Kasteks mətbuat konfransında səsləndirib.
Baş Nazir xəbərdarlıq edib ki, virus ölkə daxilində fəaldır və yoluxmaların sayı artır. Bəzi departamentlərdə virus sürətlə yayılır və virusun daha çox təsir etdiyi 21 departament “qırmızı zona” elan edilib. Paris şəhərində və Buş-du-Ron departamentində virus sürətlə yayılmaqdadır.
J. Kasteks yerli və qlobal karantin planlarının hazır olduğunu diqqətə çatdıraraq, Parisdə virusun yayılması ilə bağlı narahatlığını bildirib. Qeyd edib ki, yaxın günlərdə Paris küçələrində də maska taxmağın məcburi olması ilə bağlı rəsmi xəbərdarlıq ediləcək.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
