Karbohidratlar insan ömrünü uzadır
Bakı, 21 avqust, AZƏRTAC
Amerikalı alimlər insan ömrünün uzun olması üçün onun qida rasionunda zəruri karbohidratların miqdarını hesablayıblar. RİA Novosti agentliyi bildirir ki, bu araşdırmanın icraçıları səkkiz tədqiqatın gedişində Avropa, Şimali Amerika və Asiyanın 20 ölkəsindən 432.179 insan barədə məlumatları araşdırıblar.
AZƏRTAC Rusiya KİV-lərinə istinadla xəbər verir ki, bu tədqiqatlarda insanın cinsi, yaşı, zərərli vərdişləri, tutulduğu xəstəliklər və qida rasionunda məhsulların nisbi payları nəzərə alınıb. Təhlil nəticəsində məlum olub ki, qidasının orta hesabla 50 faizi karbohidratlardan olan insanlar daha uzunömürlü olur. Qida rasionunda karbohidratların nisbi payı 70 faizdən çox və ya 40 faizdən az olan insanların isə dünyasını tez dəyişməsi ehtimalı daha böyükdür.
Məsələn, 50 yaşa çatmış insanların qida rasionunda karbohidratların nisbi payı 50 faiz olduqda onların orta hesabla daha 33,1 il yaşamaq şansı var. Qida rasionunda karbohidratların nisbi payı 30 faizdən az olduqda isə həmin rəqəm 29,1 ilə bərabərdir. Ümumiyyətlə karbohidratlardan istifadə etməyən və onları heyvan mənşəli piylər və zülallarla (mal əti, donuz əti, toyuq, pendir) əvəz edənlər ömürlərini qısaltmağa risk edirlər.
Bölmənin digər xəbərləri
