Lənkəran Dövlət Universitetində “Campus France günləri”nə start verilib
Lənkəran, 12 mart, Bağır Əliyev, AZƏRTAC
Martın 12-də Lənkəran Dövlət Universitetində (LDU) “Ətraf şəhərlərdə Campus France günləri” layihəsinin icrasına başlanılıb.
AZƏRTAC-ın bölgə müxbiri xəbər verir ki, Campus France Agentliyinin təşəbbüsü və təşkilati dəstəyi ilə Fransada təhsilin təbliği məqsədilə keçirilən layihə çərçivəsində iki gün ərzində LDU-da silsilə tədbirlərin reallaşdırılması planlaşdırılır.
Tədbirin birinci günündə LDU-nun rektoru vəzifəsini icra edən professor Natiq İbrahimov Fransanın Azərbaycandakı səfirliyinin təhsil işləri üzrə attaşesi, “Campus France” üzrə məsul şəxs, eyni zamanda, “Frans Alumni Azərbaycan” məzun şəbəkəsinin idarəçisi xanım Morin Raab və Azərbaycan Fransız İnstitutunda “Campus France” bürosu üzrə əlaqələndirici Mədinə Mollayeva ilə görüşüb. Söhbət zamanı qonaqlara LDU barədə ətraflı məlumat verilib.
Azərbaycan ilə Fransa arasında ikitərəfli əlaqələrin inkişafından məmnunluğunu bildirən professor Natiq İbrahimov universitetdə elm və təhsilin inkişafı istiqamətində görülən işlərdən, Avropa təhsilinə inteqrasiyadan, LDU-nun genişlənən beynəlxalq əlaqələrindən danışıb. Qeyd olunub ki, LDU-da təhsilin səviyyəsini yüksəltmək, keyfiyyətli kadr hazırlığına nail olmaq üçün çoxşaxəli işlər görülür. Bu məqsədlə Avropadan modern laboratoriyalar alınaraq quraşdırılıb, praktiki məşğələlərə diqqət artırılıb. Professor Natiq İbrahimov ixtisaslı müəllimlərə tələbatı ödəmək məqsədilə paytaxtdan və xaricdən müəllimlərin dəvət edildiyini, onlar üçün hər cür şəraitə malik xidməti mənzillərin inşa olunduğunu diqqətə çatdırıb. Professor yeni inşa olunan tələbə yataqxanası, tədris korpusları və sair barədə qonaqlara məlumat verib.
LDU-da turizm tədris-təcrübə bazasının olmasını yüksək dəyərləndirən xanım Morin Raab Fransada fəaliyyət göstərən ali təhsil ocaqları ilə Lənkəran Dövlət Universiteti arasında qarşılıqlı əlaqələrin yaradılmasını hər iki tərəf üçün səmərəli olduğunu deyib. O, bununla bağlı təkliflərini professor Natiq İbrahimovla bölüşərək bildirib ki, səfərin məqsədi tələbə və müəllimlərin diqqətini Fransanın Azərbaycandakı səfirliyinin təqdim etdiyi təqaüd proqramlarına yönəltməkdir.
Söhbət zamanı qarşılıqlı fikir mübadiləsi aparılıb, əməkdaşlığın forma və istiqamətləri müəyyənləşdirilib.
Fransalı qonaq universitetlə tanışlıq çərçivəsində beynəlxalq əlaqələr şöbəsinin əməkdaşları ilə görüşüb, LDU-nun xarici universitetlərlə əlaqələri barədə məlumatlandırılıb.
İki gün davam edəcək tədbirlər çərçivəsində universitetin professor-müəllim və tələbə heyəti ilə görüşlər, onlara Fransada ali təhsil, müxtəlif təqaüd proqramları barədə məlumatların verilməsi, bununla bağlı məlumat kitabçalarının və bukletlərin paylanması, fərdi görüşlərin, fransız dilində oxu dərnəyinin, danışıq klubunun, intellektual oyunların təşkili, tələbələrin suallarının cavablandırılması nəzərdə tutulur.
LDU-da, həmçinin “Campus France günləri” çərçivəsində tibb və mühəndislik təhsili üzrə təqdimatlar da keçiriləcək.
Bölmənin digər xəbərləri
