RƏSMİ XRONİKA


ŞAMAXIDA “AZƏRELEKTRONİKA” MƏİŞƏT CİHAZLARI ZAVODU İSTİFADƏYƏ VERİLMİŞDİR

Şamaxı, 26 noyabr (AZƏRTAC). Noyabrın 26-da Prezident İlham Əliyev Şamaxıda “Azərelektronika” məişət cihazları istehsalı zavodunun açılışında iştirak etmişdir.

Müəssisənin kollektivi dövlətimizin başçısını hərarətlə qarşıladı.

Prezident İlham Əliyev düyməni basaraq müəssisəni işə saldı, istehsal prosesini izlədi.

Məlumat verildi ki, 13 hektar sahəni əhatə edən zavodun inşasına 2005-ci ildə başlanılmış, tikinti işləri 2008-ci ilin mayında başa çatdırılmışdır. İstehsal sahəsi 20 min kvadratmetr olan zavodda kondisioner sexi fəaliyyət göstərir. Burada ilkin mərhələdə 250 nəfər işlə təmin olunmuşdur. Zavodun istehsal gücü ildə 600 min kondisionerdir. Gələcəkdə müəssisədə soyuducu, tozsoran və digər məişət avadanlığı sexlərinin yaradılması nəzərdə tutulur. Həmin sahələr istifadəyə verildikdən sonra zavodda 1000 nəfər işlə təmin olunacaqdır. Burada Türkiyədən, Malayziyadan, İrandan gətirilən xammaldan, habelə yerli materiallardan istifadə olunacaqdır. Bundan əlavə, zavodda boya, polifon, plastik kütlə əridən sexlər, 250 tonluq 6 hidravlik pres də quraşdırılmışdır.

Prezident İlham Əliyev müəssisədə istehsal olunmuş məhsullara baxdı, zavodun inzibati binası ilə tanış oldu.

######

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin