AZƏRTAC-ın müxbiri xəbər verir ki, Şamaxı şəhər mədəniyyət evində 2005-ci ildə rayonun sosial-iqtisadi inkişafı ilə əlaqədar görülmüş işlərin yekunlarına həsr edilmiş hesabat yığıncağı keçirilmişdir. Tədbir iştirakçıları və qonaqlar əvvəlcə ulu öndərimiz Heydər Əliyevin əzəmətli abidəsi önünə tər çiçək dəstələri qoymuş, sonra mədəniyyət evinin geniş foyesində təşkil edilmiş sərgiyə baxmışlar. Nümayiş etdirilən kənd təsərrüfatı, sənaye və emal müəssisələrinin müxtəlif çeşidli məhsulları, rayonun dinamik inkişafını əks etdirən statistik məlumatlar yığıncaq iştirakçılarında böyük maraq doğurmuşdur.

Yığıncaqda Şamaxı Rayon İcra Hakimiyyəti başçısı Natiq Məmmədovun hesabat məruzəsi dinlənilmiş, müzakirələr olmuşdur. Göstərilmişdir ki, Dağlıq Şirvan iqtisadi zonasına daxil olan Şamaxıda ötən il sosial-iqtisadi sahədə diqqətəlayiq uğurlar qazanılmışdır. İl ərzində 45545 min manat dəyərində məhsul istehsal olunmuşdur ki, bu, 2004-cü illə müqayisədə 13527,7 min manat və yaxud 42,3 faiz çoxdur. Ötən il əsas kapitala yönəldilən investisiyaların həcmi 19914,7 min manata çatdırılmışdır.

Aqrar bölmə rayon iqtisadiyyatının aparıcı sahəsi olaraq qalmaqdadır. Ümumi məhsul istehsalının 15939 min manatı kənd təsərrüfatının payına düşür. 2005-ci ildə 13095 hektar sahənin məhsulu biçilmiş, 307448 ton taxıl istehsal olunmuşdur. Hər hektardan 23,5 sentner məhsul götürülmüşdür ki, bu, inişilkindən 0,3 sentner çoxdur. Kartof istehsalı 4,7 ton artaraq 4530 tona, tərəvəz istehsalı 17,1 ton artaraq 3905 tona çatmışdır.

Keçən il 50 hektarda yeni üzüm plantasiyaları salınmış, daha 49 hektarda plantaj şumu qaldırılmışdır. Dövlət Proqramına uyğun olaraq üzümçülüyün inkişafı üçün ciddi tədbirlər görülür.

Kənd təsərrüfatının aparıcı sahələrindən olan heyvandarlıqda da dinamik inkişafa nail olunmuşdur. 2005-ci ildə qaramalın sayı inişilkinə nisbətən 523 baş artaraq 33354 başa, davarların sayı isə 5667 baş çoxalaraq 163489 başa çatmışdır. Heyvandarlıq məhsulları istehsalında da nəticələr uğurludur.

Maddi-texniki bazanın möhkəmləndirilməsi, torpaq mülkiyyətçilərinin yeni texnika ilə təminatı istiqamətində həyata keçirilən tədbirlər də aqrar sektorda nailiyyətlərin artmasına səbəb olan amillərdəndir. Belə ki, respublika Nazirlər Kabinetinin 2005-ci il 21 oktyabr tarixli Sərəncamına əsasən “Aqrolizinq” ASC-nin Şamaxıda regional aqroservis və təchizat bazası yaradılmışdır. Keçən il aqrokredit təşkilatının Şamaxı filialı tərəfindən verilən 547 milyon manat vəsait hesabına rayona 1 kombayn, 2 traktor, 2 taxılsəpən, 1 gübrəsəpən, 2 otbağlayan, çiləyici aparat və kotan alınmışdır. Habelə, kənd təsərrüfatı ilə məşğul olan sahibkarlara 555 milyon manat kredit verilmişdir. Rayonun Çuxuryurd kəndindəki “Ruslan və Lüdmila” sahibkar müəssisəsinin nəzdində, Sabir qəsəbəsində aqrotexservislər yaradılmışdır.

Hesabat ilində özəl toxumçuluq təsərrüfatlarının yaradılması və inkişaf etdirilməsi, mal-qaranın və davarların cins tərkibinin yaxşılaşdırılması məqsədi ilə damazlıq təsərrüfatlarının təşkili sahəsində tədbirlər həyata keçirilmişdir.

Keçən il bölgədə ənənəvi sənaye sahələrinin inkişafı, yeni obyektlərin açılması istiqamətində mühüm işlər görülmüşdür. Bu sahədə “Evsen” şirkətlər qrupu irihəcmli layihələrin reallaşmasında xüsusi rol oynamışdır. Bu şirkətlər qrupu ötən il Şamaxıda 5 milyon manat dəyərində televizor istehsalı zavodunu istismara buraxıb. Hazırda 10 milyon manat dəyərində avtomobil, 20 milyon manat dəyərində məişət cihazları istehsalı zavodları inşa edilir.

Rayonda sahibkarlıq üçün yaradılan əlverişli şərait yerli iş adamlarının fəallığını artırmış və nəticədə yeni istehsal və xidmət obyektlərinin sayı artmağa başlamışdır.

Bütün bunlar bölgənin sosial-iqtisadi inkişafına, əhalinin məşğulluğunun artmasına, həyat şəraitinin getdikcə yaxşılaşmasına səbəb olmuşdur. 2005-ci ildə rayon üzrə 2333 yeni iş yeri, o cümlədən 669 daimi, 1654 müvəqqəti və mövsümi iş yerləri açılmışdır.

Əhalinin elektrik enerjisi, təbii qazla təminatı istiqamətində bir sıra tədbirlər həyata keçirilmişdir. Keçən il Muğanlı, Qaravəlli, Mirikənd, Məlçək kəndlərinə və Sabir qəsəbəsinə təbii qazın verilməsi bərpa olunmuşdur.

Məruzəçi və çıxış edənlər qazanılan nailiyyətləri, ölkə Prezidentinin ayrı-ayrı bölgələrin, o cümlədən Şamaxının, sosial-iqtisadi inkişafına göstərdiyi böyük diqqət və qayğının nəticəsi kimi dəyərləndirdilər. Göstərilmişdir ki, ötən il aprelin 26-sı Azərbaycan Prezidenti cənab İlham Əliyevin Şamaxıya tarixi səfəri ilə yaddaqalan olmuşdur. Səfər zamanı ölkə Prezidenti Şamaxı Olimpiya İdman Kompleksinin, “Star Ltd” televizor zavodunun, İmadəddin Nəsiminin heykəlinin açılış mərasimlərində iştirak etmiş, ümummilli liderimiz Heydər Əliyevin abidəsi önünə gül-çiçək dəstələri qoymuş, xatirə guşəsinə baxmışdır. Sakinlərlə birbaşa ünsiyyətdə olan Prezident onların qayğı və problemləri ilə maraqlanmışdır.

Ölkə başçısının böyük diqqət və qayğısı, göstəriş və tövsiyələri, rayonda yerli resursların və digər amillərin üzə çıxarılması və istifadəsi, sosial-iqtisadi həyatda böyük canlanmaya, inkişafın dinamik xarakter almasına səbəb olmuşdur.

Məruzə və çıxışlarda şəhərin su təchizatı, tikinti-quruculuq və abadlıq işləri, turizmin inkişafı ilə əlaqədar görülmüş işlərdən ətraflı bəhs edilmişdir. Təhsil, səhiyyə, mədəniyyət sahələrində həyata keçirilən tədbirlərdən söhbət açılaraq mövcud nöqsanlardan, həlli vacib məsələlərdən danışılmışdır. Belə bir fikir vurğulanmışdır ki, 2006-cı il Şamaxının sosial-iqtisadi inkişafında daha böyük nailiyyətlər ili olacaqdır.

Hesabat yığıncağında Azərbaycan Respublikasının Maliyyə Naziri Əvəz Ələkbərov çıxış etmişdir.

Rayonun sosial-iqtisadi, mədəni həyatında xüsusilə fəallıq göstərən 10 nəfərə rayon icra hakimiyyətinin Fəxri Fərmanı verilmişdir.

Yığıncaqda müzakirə olunan məsələ ilə əlaqədar qərar qəbul olunmuşdur.

Yığıncaq iştirakçıları Azərbaycan Prezidenti cənab İlham Əliyevə müraciət qəbul etmişlər.

Prezidentin icra aparatının məsul işçisi Rövşən Ağayev və Milli Məclisin deputatı Maqsud İbrahimbəyov tədbirdə iştirak etmişlər.